ជាតិ
យ៉ុង កាដាវ ស្រាវជ្រាវរុក្ខជាតិខ្មែរ ផលិតសាប៊ូសរីរាង្គព្យាបាលសក់ជ្រុះ
× កញ្ញា យ៉ុង កាដាវ បានស្រាវជ្រាវរុក្ខជាតិខ្មែរមួយចំនួន មកផលិតជាសាប៊ូOrganic(សាប៊ូគ្មានសារធាតុគីមី) ដើម្បីព្យាបាលសក់ជ្រុះ និងការពារស្បែកក្បាល។ ផលិតផលទាំងនេះ ត្រូវបានធ្វើពិសោធន៍ និងទទួលស្គាល់ពីក្រសួងពាក់ព័ន្ធ មុននឹងដាក់លក់លើទីផ្សារ។
វត្ថុធាតុដើមដែលយកមកផ្សំផលិតជាសាប៊ូOrganicគនេះ មានដូចជាក្រូចសើច ប្រទាលកន្ទុយក្រពើ ខ្ញី ផ្កាអញ្ជ័នពណ៌ស្វាយ (ផ្កាប្រភេទវល្លិម្យ៉ាង) និងរុក្ខជាតិច្រើនប្រភេទទៀត។
កញ្ញា យ៉ុង កាដាវ ម្ចាស់សហគ្រាស ស៊ីង ប្រេន ឯ.ក ដែលមានការទទួលស្គាល់ពីក្រសួង បាននិយាយថា ផលិតផលOrganic ដែលខាងសហគ្រាសអ្នកនាង ដាក់លក់ក្នុងទីផ្សារនោះ មានសាប៊ូព្យាបាលសក់ជ្រុះ បំបាត់អង្គែ កាត់បន្ថយប្រេងនៅស្បែកក្បាល ម៉ាសបណ្ដុះសក់ ស្ព្រេបំបាត់ស្កូវ និងប្រេងលាបបណ្ដុះសក់ជាដើម។
កញ្ញាថា ផលិតផលទាំងនេះមានការទទួលស្គាល់ពីអតិថិជនច្រើន ព្រោះតែគេបានដឹងពីគុណភាពរបស់វា។ យ៉ុង កាដាវ បញ្ជាក់ដូច្នេះថា៖«អតិថិជនថ្មីយើងអត់ទាន់ដឹងពីមតិគាត់ទេ តែបើអតិថិជនចាស់គាត់ដឹងពីគុណភាពគាត់ថាល្អ ហើយគាត់មកទិញយកទៅតែម្ដង។ ពួកគាត់ទុកចិត្តយើងដោយសារតែ គាត់ប្រើហើយរយៈពេលតែ៤ ទៅ៥ដង ដឹងលទ្ធផល»។
ដើមឡើយ កាដាវ ក៏ជួបបញ្ហាប្រើប្រាស់សាប៊ូ មិនត្រូវនឹងស្បែកក្បាលរបស់នាងដែរ ប៉ុន្តែក្រោយពេលនាងឃើញម្ដាយរបស់នាង តែងតែចិតក្រូចសើចយកទៅកក់សក់ ទើបនាងអនុវត្តតាមម្ដាយខ្លួន ហើយក៏មានគំនិតចាប់ផ្តើមរករូបមន្ត បង្កើតជាសាប៊ូនេះឡើង។ នារីអាយុ២៤ឆ្នាំរូបនេះ បានពន្យល់ថា ការស្រាវជ្រាវរូបមន្តធ្វើសាប៊ូនេះ នាងប្រើរយៈពេល៣ខែ ដោយបានយករូបមន្តពីម្ដាយខ្លួនផង និងស្រាវជ្រាវតាមអ៊ីនធឺណិតផង មុននឹងមានការទទួលពីក្រសួង និងអនុញ្ញាតដាក់លក់នៅលើទីផ្សារ។ បើតាម កាដាវ ក្មេងអាយុ២ឆ្នាំឡើងទៅ ក៏អាចប្រើប្រាស់សាប៊ូOrganicនេះបានដែរ។
«យើងដឹងហើយ ពីមុនចាស់ៗគាត់ចូលចិត្តចិតក្រូចសើច យកមកកក់សក់ណាស់ ដូច្នេះខ្ញុំចាប់ផ្ដើមស្រាវជ្រាវរុក្ខជាតិខ្មែរយើង ធ្វើសាប៊ូតែម្ដងទៅ។ ពីដំបូងខ្ញុំគិតថា ធ្វើសាប៊ូនេះគ្រាន់តែលក់ជាទ្រង់ទ្រាយតូចទេ តែដល់មានគេគាំទ្រច្រើន ខ្ញុំក៏លក់តាមអ៊ីនធឺណិតដែរ។ ខ្ញុំគិតថា បើផលិតផលខ្មែរយើងល្អ ហើយអាចល្បីខ្លាំង នេះក៏ជាមុខមាត់ប្រទេសយើងដែរ»។ នេះជាការបញ្ជាក់របស់អ្នកនាង កាដាវ ដែលបានបន្ថែមថា ផលិតផលនេះ មានលក់ទូទាំងខេត្តកោះកុង រាជធានីភ្នំពេញ រួមទាំងបណ្ដាខេត្តមួយចំនួនទៀត។
ស្ត្រីវ័យ២៤ឆ្នាំរូបនេះ អំពាវនាវឲ្យពលរដ្ឋខ្មែរ ជួយគាំទ្រផលិតផលខ្មែរឲ្យបានច្រើន ដើម្បីចូលរួមកាត់បន្ថយការនិយមលើផលិតផលបរទេស។ យ៉ុង កាដាវ បញ្ជាក់៖ «ផលិតផលរបស់បរទេសខ្លះ ក៏មិនល្អទាំងអស់ដែរ ដូច្នេះសូមឲ្យខ្មែរយើង ងាកមកប្រើផលិតផលក្នុងស្រុកវិញព្រោះវាគ្មានសារធាតុគីមី។ ហើយផលិតផលរបស់ខ្ញុំ មុននឹងចេញលក់ ពួកខ្ញុំបានសាកល្បងប្រើដោយខ្លួនឯង ឃើញលទ្ធផលល្អហើយ បានហ៊ានលក់ ព្រោះផលិតផលក្នុងស្រុក តែធ្វើមិនល្អ គេវាយប្រហារខ្លាំងណាស់»៕
Tag:
ផលិតផលខ្មែរ
សាប៊ូសរីរាង្គ
កោះកុង
© រក្សាសិទ្ធិដោយ thmeythmey.com