ជាតិ
សេដ្ឋកិច្ច
លោក យន្ត មីន ចង់ប្រែក្លាយខេត្តព្រះសីហនុ ក្លាយជាខេត្តគំរូដែលគ្មានអាហារគីមី
× លោក យន្ត មីន អភិបាលខេត្តព្រះសីហនុ ចង់ឲ្យខេត្តខ្លួនក្លាយជាខេត្តគំរូលើសុវត្ថិភាពចំណីអាហារ ដោយលោកផ្តួចផ្តើមឲ្យមានការប្រកួតប្រជែងម្ហូបអាហារដែលគ្មានជាតិគីមី អនាម័យល្អ និងសេវាកម្មល្អ។ ថ្លែងប្រាប់សារព័ត៌មាន ThmeyThmey លោកអភិបាលខេត្ត បានបញ្ជាក់ថា ការប្រកួតប្រជែង នឹងប្រព្រឹត្តទៅនៅថ្ងៃទី១៨ ខែមិថុនា ខាងមុខ។
«ម្ហូបអាហារគឺជាឫសគល់នៃបញ្ហាសុខភាព ដែលជាចំណុចសំខាន់សម្រាប់មនុស្សគ្រប់រូប។ ដូច្នេះ ខ្ញុំរៀបចំការប្រកួតប្រកួតនេះឡើង គឺដើម្បីឲ្យអាហារដ្ឋានទាំងអស់ ប្រែក្លាយពីការប្រកួតប្រជែងគ្នាដើម្បីតែប្រាក់ចំណេញ មកធ្វើការប្រកួតប្រជែង ដោយផ្តល់សេវាម្ហូបអាហារ ដែលមានសុវត្ថិភាព ដល់សុខភាពអ្នកបរិភោគ ពោល អត់គីមី មានអនាម័យ និងសេវាកម្មល្អ ដើម្បីប្រាក់ចំណេញវិញ»។ នេះជាការបញ្ជាក់របស់លោក យន្ត មីន។
លោក អភិបាលខេត្តព្រះសីហនុ បានបញ្ជាក់ប្រាប់សារព័ត៌មាន ThmeyThmey ថា ការប្រកួតប្រជែងម្ហូបអាហារ ដែលគ្មានគីមី អនាម័យល្អ និងសេវាល្អ បានចាប់ផ្តើមធ្វើតាំងពីឆ្នាំមុនមកម្ល៉េះ ប៉ុន្តែមិនសូវមានការចូលរួមពីសំណាក់ម្ចាស់អាហារដ្ឋាននានានោះឡើយ។
សម្រាប់ឆ្នាំ២០១៨នេះ លោកសង្ឃឹមថា នឹងមានការចូលរួមច្រើនពីម្ចាស់អាហារដ្ឋាន ដោយអាជ្ញាធរ និងស្ថាប័នជំនាញនឹងផ្តល់វិញ្ញាបនបត្រ លើកទឹកចិត្ត ក៏ដូចជាការទទួលស្គាល់ចំពោះអាហារដ្ឋានដែលផ្តល់សេវាម្ហូបអាហារដែលមានសុវត្ថិភាព។
លោក យន្ត មីន បានះអាងថា៖ «កន្លងមកខេត្តព្រះសីហនុពុំមានបញ្ហាចោទទៅលើចំណីអាហារទេ ព្រោះម្ចាស់អាហារគ្រប់រូបមានការយល់ដឹងពីសុខភាពច្រើន ម្យ៉ាងវិញទៀតសមត្ថកិច្ចកាំកុងត្រូល បានចុះត្រួតពិនិត្យជាប្រចាំ ទៅលើចំណីអាហារ បន្លែ ត្រី សាច់ ជាដើម»៕
Tag:
ទេសចរណ៍
អាហារគីមី
ខេត្តព្រះសីហនុ
© រក្សាសិទ្ធិដោយ thmeythmey.com