អស់មធ្យោបាយ អាជ្ញាធរសម្រេចបណ្តែតប្រអប់អាហារចូលរូងភ្នំ

សង្គមអន្តរជាតិ

អន្តរជាតិ

អស់មធ្យោបាយ អាជ្ញាធរសម្រេចបណ្តែតប្រអប់អាហារចូលរូងភ្នំ

29, Jun 2018 , 5:42 pm

រូបភាព

ដោយ: ទេព ពិទូរ្យ

នៅថ្ងៃទី២៩ ខែមិថុនានេះ ក្រុមអ្នករុករកបានបន្តបង្ហូរទឹកចេញពីរូងភ្នំ Tham Laung ដើម្បីងាយស្រួលស្វែងរកក្មេងប្រុស១២នាក់រួមទាំងគ្រូបង្វឹកម្នាក់ដែលបានបាត់ខ្លួនយ៉ាងអាថ៌កំបាំងអស់រយៈពេល៧ថ្ងៃមកហើយនោះ។ ប៉ុន្តែយ៉ាងណា កម្រិតទឹកដែលបូមចេញហាក់នៅតែមិនធ្លាក់ចុះសោះ ខណៈភ្លៀងនៅតែបន្តធ្លាក់មិនដាច់។ ក្រោមហេតុផលនេះ ក្រុមអាជ្ញាធរថៃបានសម្រេចប្រើប្រាស់ប្រអប់ជ័រដោយមានផ្ទុកអាហារ និងរបស់របរផ្សេងៗបណ្តែតតាមទឹកចូលក្នុងរូងភ្នំនោះ ដោយរំពឹងថានឹងទៅដល់ពួកគេ។

រយៈពេល៧ថ្ងៃមកហើយ ពោលគឺចាប់ពីថ្ងៃទី២៣ ខែមិថុនាមក មនុស្ស ១៣ នាក់ដែលបាត់ខ្លួនក្នុងរូងភ្នំ Tham Luang Nang Non ស្ថិតក្នុងស្រុកមៃសៃ ខេត្តឈៀងរ៉ៃ នៅតែមិនទាន់មានតម្រុយណាមួយដែលបង្ហាញសញ្ញាវិជ្ជមាននៅឡើយទេ ស្របពេលអ្នករុករកបន្តស្វែងរកទាំងថ្ងៃទាំងយប់។

ដោយយល់ថាក្មេងៗជាប់ក្នុងរូងភ្នំរយៈពេលយ៉ូ គ្នាអ្វីបរិភោគ លោកឧត្តមសេនីយ៍ឯក Kraisi Boonthavorn បានបញ្ជាឲ្យក្រុមមន្ត្រីខ្លួនរៀបចំអាហារ ទឹកសុទ្ធ ពិល ប៊ិច ក្រដាស ទូរសព្ទ រួមទាំងផែនទីបង្ហាញផ្លូវក្នុងរូងភ្នំដាក់ចូលក្នុងប្រអប់ជ័រចំនួន ២០ រួចបង្ហូរតាមទឹក គ្រែងបានទៅដល់ដៃពួកគេ។

ក្នុងក្រដាសមួយសន្លឹកដែលដាក់ក្នុងប្រអប់នោះ មានសរសេរផ្តែផ្តាំថា«ប្រសិនបើអ្នកបានទទួលហើយ សូមឆ្លើយតមមកវិញផងតាមរយៈផែនទីចូលក្នុងប្រអប់នេះ រួចបណ្តែតតាមទឹកវិញ ពួកយើងនឹងទៅជួយអ្នកភ្លាម»។

ក្នុងប្រតិបត្តិការរុករកនេះ ក៏មានវត្តមានក្រុមអ្នកជំនាញមុជទឹកអង់គ្លេសបីនាក់ រួមទាំងកងទ័ពអាមេរិកនៃទីបញ្ជាការយោធាប្រចាំតំបន់ប៉ាស៊ីហ្វិក (USPACOM) ចំនួន៣០នាក់ផ្សេងទៀត កំពុងស្ថិតក្នុងការសង្គ្រោះ និងស្វែងរកក្មេងៗទាំងនោះដែរ។

ក្មេងៗទាំង ១៣នាក់ដែលមានអាយុចន្លោះពី១១ ទៅ១៦ឆ្នាំ ក្នុងនោះមានគ្រូបង្វឹកបាល់ទាត់ម្នាក់អាយុ២៥ឆ្នាំ បានបាត់ខ្លួនក្នុងរូងភ្នំមួយឈ្មោះ Tham Luang Nang Non បន្ទាប់ពីពួកគេចូលជ្រកភ្លៀង។ បើតាមការសន្និដ្ឋានរបស់អាជ្ញាធរ ដោយសារភ្លៀងធ្លាក់ខ្លាំងធ្វើឲ្យទឹកក្នុងរូងភ្នំឡើងខ្ពស់ ទើបធ្វើឲ្យពួកគេត្រូវរកផ្លូវផ្សេងជាទីសុវត្ថិភាព និងដើម្បីចាកចេញពីរូងភ្នំ៕