សង្គមអន្តរជាតិ
អន្តរជាតិ
ក្រុមសង្គ្រោះផ្តល់ចំណី ថ្នាំសង្កូវ និងបង្វឹកឲ្យក្មេងៗចេះមុជទឹកមុនជម្លៀសពួកគេចេញពីរូង
× ក្មេងប្រុស ១២ នាក់ និងគ្រូបង្វឹកម្នាក់ទៀតនោះទទួលបានការត្រួតពិនិត្យសុខភាព និងចំណីអាហារប៉ូវកម្លាំង ក្រោយពេលដែលក្រុងសង្គ្រោះរកឃើញពួកគេនៅយប់ថ្ងៃចន្ទទី ២ ខែកក្កដា។ ក្រៅពីទទួលអាហារបំប៉ន ក្មេងៗទាំងនោះក៏គេបានបង្រៀនឲ្យមុជទឹកជ្រៅដើម្បីអាចហែលឆ្លងចេញរួចពីរូងភ្នំដែលពួកគេកំពុងជាប់នោះផងដែរ។
ទីភ្នាក់ងារព័ត៌មាន AFP ដកស្រង់សម្តីទាហានថៃដែលដឹកនាំក្រុមសង្គ្រោះថា ចំណីអាហារប៉ូវកម្លាំងរួមទាំងជែលសម្រាប់បរិភោគដែលមានកាឡូរីខ្ពស់ និងថ្នាំប៉ារ៉ាសេតាម៉ុលផងនោះត្រូវបានគេផ្តល់ឲ្យទៅក្មេងៗទាំង ១២ និងគ្រូបង្វឹក។
បញ្ហាស្មុគស្មាញនៅពេលនេះគឺជួយជម្លៀសក្មេងៗទាំងនោះចេញ។ ជារួម វាចាំបាច់ត្រូវបង្រៀនឲ្យពួកគេចេះមុជទឹកដើម្បីហែលឆ្លងកាត់តាមផ្លូវទឹកដែលជាច្រកក្រោមដីដ៏ស្មុគស្មាញនោះដើម្បីចេញមកក្រៅរូងភ្នំបាន។
ប្រធានក្រុមកងទ័ពជើងទឹក Anand Surawan បានបញ្ជាក់ដូច្នេះ៖«យើងនឹងរៀបចំបញ្ជូនអាហារបន្ថែមទៅឲ្យពួកគេដើម្បីធានាថា ពួកគេអាចបរិភោគគ្រប់គ្រាន់មានកម្លាំង និងជួយបង្វឹកពួកគេឲ្យចេះហែលជ្រមុជទឹក ខណៈដែលយើងបន្តព្យាយាមបូមទឹកចេញផងនោះ»។
ក្មេងប្រុសដែលមានអាយុចន្លោះពី ១១ទៅ១៦ឆ្នាំនិងគ្រូបង្វឹកវ័យ ២៥ ឆ្នាំរបស់ពួកគេបានបាត់ខ្លួនកាលពីថ្ងៃទី ២៣ ខែមិថុនា អំឡុងពេលចូលទៅក្នុងរូងភ្នំ Tham Luang Nang Non ដែលមានប្រវែង ១០ គីឡូម៉ែត្រ ស្ថិតក្នុងស្រុកម៉ៃសៃ ខេត្តឈៀងរ៉ៃ ភាគខាងជើងប្រទេសថៃ។
ពួកគេត្រូវបានរកឃើញនៅយប់ថ្ងៃចន្ទម្សិលមិញនេះ ក្រោយក្រុមសង្គ្រោះចំណាយពេលជាង២២០ម៉ោងដើម្បីស្វែងរកនោះ។ក្រៅពីកងទ័ពជើងទឹកថៃ ទាហានអាមេរិក ទាហានអូស្ត្រាលី អ្នកជំនាញរូងភ្នំអង់គ្លេស និងក្រុមសង្គ្រោះជីវិតរបស់ចិនក៏ស្ថិតក្នុងប្រតិបត្តិការនេះដូចគ្នា។
ដោយឡែកអភិបាលខេត្តឈៀងរ៉ៃលោក Narongsak Osottanakorn នៅថ្ងៃអង្គារទី ៣ ខែកក្កដានេះ បានលើកឡើងថា ការរកឃើញក្មេងៗជារឿងមួយដែលនឹកស្មានមិនដល់ និងរំភើបបំផុតសម្រាប់លោក។ លោកបានរម្លឹកថា ភ្លៀងបន្តធ្លាក់រៀងរាល់ថ្ងៃ ហើយលោកចាត់ទុកប្រតិបត្តិការនេះថាជា ជាប្រតិបត្តិការមិនអាចទៅរួច ឬ«mission impossible»។ ប៉ុន្តែដោយការប្រឹងប្រែងមិនឈប់ឈរដោយប្រើប្រាស់គ្រប់មធ្យោបាយ គេអាចប្រយុទ្ធនឹងធម្មជាតិនិងប្រជែងពេលវេលាបាន។
យ៉ាងណាមិញពាក់ព័ន្ធនឹងសុខភាពរបស់ក្មេង អភិបាលខេត្តរូបនេះបានបញ្ជាក់ថា គ្រូពេទ្យបានផ្តល់ប្រឹក្សាយោបល់ថា ក្រុមសង្គ្រោះគួរបន្តផ្តល់ថ្នាំច្រើនប្រភេទដើម្បីជួយការពារមេរោគឆ្លង ឬជំងឺផ្សេងទៀត ដែលអាចធ្វើឲ្យពួកគេមានបញ្ហាសុខភាពនិងពិបាកជម្លៀសចេញមកក្រៅនោះ៕
Tag:
ក្មេងប្រុសបាត់ខ្លួននៅថៃ
រូងភ្នំ Tham Luang
© រក្សាសិទ្ធិដោយ thmeythmey.com