បទចោទប្រកាន់ធំៗបួនរួមមានរំលោភសេចក្តីទុកចិត្ត និងប្រើអំណាចប្រព្រឹត្តអំពើពុករលួយត្រូវបានគេប្រើប្រាស់ដើម្បីចោទប្រកាន់ប្រមុខរដ្ឋាភិបាលម៉ាឡេស៊ីលោក ណាជីប រ៉ាហ្សាក់ នៅថ្ងៃពុធទី ៤ ខែកក្កដានេះនៅសាលាដំបូងម៉ាឡេស៊ី។ បើសិនត្រូវកាត់ទោស លោក ណាជីប ដែលជាអតីតនាយករដ្ឋមន្ត្រីដំបូងគេដែលប្រឈមុខការចោទប្រកាន់ពីបទឧក្រិដ្ឋនឹងត្រូវជាប់ពន្ធធនាគារយ៉ាងតិច ២០ឆ្នាំឯណោះ។
បន្ទាប់ពីត្រូវបានចាប់ខ្លួន និងឃុំខ្លួនក្រុមការងារពិសេសស៊ើបអង្កេតសំណុំរឿង 1MBD លោក ណាជីប បានបង្ហាញខ្លួននៅតុលាការម៉ាឡេស៊ីនៅម៉ោងប្រហែលជាង ៨ នាទីព្រឹកថ្ងៃពុធនេះ នៅតុលាការម៉ាឡេស៊ី ដើម្បីស្តាប់ការចោទប្រកាន់ជាផ្លូវការ។
ទីភ្នាក់ងារព័ត៌មានម៉ាឡេស៊ី Bernama ពេលលោក ណាជីប អញ្ជើញមកដល់តុលាការ គេឃើញមានក្រុមអ្នកគាំទ្របក្ស UMNO ជាច្រើននាក់ឈរកាន់បដា និងបង្ហាញការគាំទ្រចំពោះអតីតនាយករដ្ឋមន្ត្រីនេះផងដែរ។
សូមទាញការចាប់អារម្មណ៍បន្តិចដែរថា ក្រោយការចាប់ខ្លួនប៉ុន្មានម៉ោងនោះ លោក ណាជីប បានបង្ហោះវីដេអូមួយសុំអភ័យទោសប្រជាជនម៉ាឡេស៊ី ប៉ុន្តែលោកនៅតែការពារជំហរខ្លួន និងបដិសេធរាល់ការចោទប្រកាន់ដែលមានទាំងអម្បាលម៉ានផង។
«ជាធមនុស្សធម្មតាម្នាក់ ខ្ញុំមិនល្អឥតខ្ចោះឡើយ ប៉ុន្តែជឿជាក់លើខ្ញុំចុះថា រាល់ការចោទប្រកាន់ដែលមានប្រឆាំងខ្ញុំ និងក្រុមគ្រួសារនោះមិនមែនជាការពិតឡើយ»។
១. ទោសជាប់ពន្ធនាគារ, វាយនឹងរំពាត់ និង ពិន័យជាប្រាក់
ត្រឡប់មកវិញ នីតិវិធីចោទប្រកាន់ប្រឆាំងលោក ណាជីប នេះដឹកនាំដោយអគ្គរាជអាជ្ញា Tommy Thomas ដោយមានអគ្គរាជអាជ្ញារងជាជំនួយ ១១ រូបផ្សេងទៀត។ លោក ណាជីប ត្រូវបានស្ថាប័នអយ្យការចោទប្រកាន់ពីបទឧក្រិដ្ឋចំនួនបីដែលពាក់ព័ន្ធនឹងការរំលោភសេចក្តីទុកចិត្ត (CBT) ក្នុងនិងមួយទៀតទាក់ទងការរំលោភអំណាចប្រពឹត្តអំពើពុករលួយក្នុងនាមជានាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុនោះ។
តាមការពន្យល់របស់ស្ថាប័នអយ្យការម៉ាឡេស៊ី បទចោទដែលមានខាងលើនេះគឺផ្នែកលើការណីបាត់លុយចំនួនជាង ១០ លានដុល្លារនៃគម្រោង SRC International ដែលផ្នែកមួយតូចនៃមូលនិធិរដ្ឋ 1MDB ប៉ុណ្ណោះ។ លុយប្រហែល ១០ លានដុល្លារនោះត្រូវបានផ្ទេរចូលគណនីផ្ទាល់ខ្លួនរបស់លោក ណាជីប។
បើសិនជាមានការកាត់ទោសមែននោះ បទល្មើសនីមួយៗអាចធ្វើឲ្យលោកជាប់ពន្ធនាគារយ៉ាងហោចណាស់ ២០ឆ្នាំ និងត្រូវពិន័យជាប្រាក់ផង។ ប៉ុន្តែក្នុងករណីលោក ណាជីប លោកអាចរួចផុតពីការវាយដោយរំពាត់ព្រោះលោកមានវ័យ ៦៤ឆ្នាំទៅហើយនោះ។
ការចាប់ខ្លួន និងចោទប្រកាន់អតីតមេដឹកនាំម៉ាឡេស៊ីនេះធ្វើឡើងដោយផ្អែកលើការស៊ើបអង្កេតរាល់ចរន្តហិរញ្ញវត្ថុទាំងអស់ដែលទាក់ទងនឹងមូលនិធិ 1MDB ដែលបាត់។ ក្រសួងយុត្តិធម៌អាមេរិកកន្លងមករកឃើញថា លុយដែលត្រូវគេលួចចេញពីមូលនិធិរដ្ឋម៉ាឡេស៊ីនេះមានយ៉ាងហោចណាស់ ៤,៥ពាន់លានដុល្លារ។ លុយដែលបាត់នោះត្រូវបានគេផ្ទេរនិងប្រើប្រាស់ក្នុងរូបភាពជាការលាងលុយ។
២.រាល់ការចោទប្រកាន់ជារឿងនយោបាយ?
បន្ទាប់ពីមានការចាប់ខ្លួន អ្នកនាំពាក្យលោក ណាជីប បានចេញមុខរិះគន់ចំណាត់ការរបស់អង្គភាពពុករលួយដែលចាប់ខ្លួន និងចោទប្រកាន់អតីតប្រមុខរដ្ឋាភិបាល។ អ្នកនាំពាក្យបានអះអាងថា ការចោទប្រកាន់ដែលមានទាំងអម្បាលម៉ានប្រឆាំងលោក ណាជីប ទាក់ទិននឹងមូលនិធិ 1MDB ជារឿងនយោបាយសុទ្ធសាធ ហើយលោក ណាជីប ត្រៀមតវ៉ារាល់ការចោទប្រកាន់ និងបង្ហាញភាពស្អាតស្អំរបស់ខ្លួនក្នុងតុលាការនៅពេលខាងមុខផង។
វាមិនមែនជារឿងថ្មីឡើយដែលលោក ណាជីប និងអ្នកគាំទ្រចាត់ទុកថា ការចោទប្រកាន់ជារឿងនយោបាយ និងបង្កើតឡើងដើម្បីធ្វើឲ្យលោកខូចឈ្មោះនោះ។ តាំងពីដើមមក លោក ណាជីប ទាត់ចោលរាល់ការចោទប្រកាន់ និងអះអាងថា ខ្លួនស្អាតស្អំ។ ប៉ុន្តែភស្តុតាងដែលមានទាំងលុយរាប់រយលាន និងគ្រឿងអលង្ការច្រើនសន្ធឹកដែលគេរឹបអូសបានពីផ្ទះរបស់លោក ណាជីប នោះ ជារឿងដែលធ្វើឲ្យសាធារណរជនម៉ាឡេស៊ីពិបាកជឿជាក់លើការបកស្រាយរបស់អតីតមេដឹកនាំពួកគេណាស់។
យ៉ាងណាក៏ដោយ ការចាប់ខ្លួនលោក ណាជីប ម្សិលមិញធ្វើឲ្យគណៈមេធាវីម៉ាឡេស៊ីប្រតិកម្មខ្លាំង។ បើតាមទូរទស្សន៍សិង្ហបុរី Channel News Asia ប្រធានគណៈមេធាវី George Varughese បានអះអាងក្នុងសេចក្តីថ្លែងការណ៍របស់ខ្លួនថា ក្រុមការងារពិសេសទទួលបន្ទុកសំណុំរឿង 1MDB ដែលចាប់ខ្លួនអតីតនាយករដ្ឋន្ត្រីធ្វើឲ្យប៉ះពាល់ដល់អំណាចស្ថាប័នយុត្តិធម៌ ។ លោកពន្យល់ថា ក្រុមការងារនេះគ្មានអំណាចយុត្តាធិការណាមួយដើម្បីចាប់ខ្លួនលោក ណាជីប ឡើយ ព្រោះរាល់ការចាប់ខ្លួនទាំងអស់ត្រូវធ្វើឡើងដោយប៉ូលិស និងអង្គភាពប្រឆាំងអំពើពុករលួយប៉ុណ្ណោះ។ មួយទៀត ក្រុមការងារនេះក៏គ្មានតួនាទីសម្រេចចិត្តថា តើលោក ណាជីប ត្រូវចោទប្រកាន់បែបណា ឬ ត្រូវចោទប្រកាន់នៅពេលណាមួយឡើយ។