ជាតិ
នយោបាយជាតិ
អតីតតំណាងរាស្ត្រCNRP ពីររូប ប្ដឹងទៅកំពូលលើករណីវាយដំខ្លួន ក្បែររដ្ឋសភា ជាង២ឆ្នាំមុន
× ភ្នំពេញ៖ អតីតគណបក្សសង្គ្រោះជាតិពីរនាក់ គឺលោក ញ៉យ ចំរើន និងលោក គង់ សភា បានដាក់ពាក្យបណ្ដឹងសារទុក្ខបន្តទៅតុលាការកំពូល ឲ្យពិនិត្យលើការសម្រេចរបស់តុលាការជាន់ទាបឡើងវិញ លើករណីក្រុមអង្គរក្សវាយដំខ្លួន នៅក្បែររដ្ឋសភា កាលពីចុងឆ្នាំ២០១៥។
លោក ញ៉យ ចំរើន និងលោក គង់ សភា នៅតែមិនពេញចិត្តចំពោះការសម្រេចរបស់សាលាដំបូងរាជធានីភ្នំពេញ លើករណីហិង្សាលើខ្លួន កាលពីជាង២ឆ្នាំមុន ។ មិនពេញចិត្ត ដោយសារតែការសម្រេចរបស់តុលាការជាន់ទាប ផ្ទុយពីការទាមទាររបស់លោក ញ៉យ ចំរើន និងលោក គង់ សភា ។ នេះជាការបញ្ជាក់របស់លោក សំ សុខគង់ មេធាវីការពារក្តីឲ្យអតីតតំណាងរាស្ត្រទាំងពីរ ដែលបានដាក់ពាក្យប្ដឹងសារទុក្ខទៅតុលាការកំពូល ដើម្បីឲ្យពិនិត្យលើករណីនេះឡើងវិញ។
បើតាមលោក សំ សុខគង់ អ្វីដែលកូនក្តីលោកចង់បាននោះ គឺទាមទារឲ្យតុលាការដាក់ទោសធ្ងន់ធ្ងរ និងផ្ដល់សំណងបន្ថែមដល់ពួកគេ ខណៈពួកគេកំពុងបន្តចំណាយថ្លៃព្យាបាលខ្លួនច្រើន ជាងថ្លៃសំណងដែលសាលាដំបូងរាជធានីភ្នំពេញ សម្រេចឲ្យកន្លងមក។
ថ្លែងប្រាប់សារព័ត៌មានថ្មីៗ លោក សំ សុខគង់ បានបញ្ជាក់ដូច្នេះថា៖«គាត់ទាមទារឲ្យជនល្មើសឲ្យបានធ្ងន់ធ្ងរ ។ ព្រោះពាក្យប្ដឹងគាត់ប្ដឹងកន្លងមក គឺបទប៉ុនប៉ងមនុស្សឃាត មិនបទហិង្សាដោយចេតនាទេ ប៉ុន្តែតុលាការកាត់ទោសជនល្មើសពីបទហិង្សាទៅវិញ ដូច្នេះខុសពីពាក្យបណ្ដឹងរបស់គាត់។ ហើយការខូចខាតរបស់ពួកគាត់កន្លងមក គាត់ស្នើសុំឲ្យសងទៅតាមចំណាយជាក់ស្ដែង ដែលបានដាក់ភ្ជាប់ជាមួយវិក័យបត្រព្យាបាលផ្សេងៗទៅតុលាការ ប៉ុន្តែការសម្រេចរបស់តុលាការគឺវាទាបមែនទែន មិនស្មើនឹងការចំណាយរបស់ពួកគាត់ម្នាក់ៗផង។ ហើយមកដល់ពេលនេះ ពួកគាត់ចំណាយអស់៥ទៅ៦ម៉ឺនដុល្លារអាមេរិក ដោយមិនគិតពីតម្លៃចំណាយតូចតាច»។
ការបន្តប្ដឹងសារទុក្ខទៅតុលាការកំពូលនេះ ធ្វើឡើងបន្ទាប់ពីសាលាឧទ្ធរណ៍តម្កល់ សេចក្តីសម្រេចរបស់សាលាដំបូងរាជធានីភ្នំពេញ ទុកជាបានការ។ លោក សំ សុខគង់ រំពឹងថា តុលាការកំពូល នឹងពិនិត្យលើអង្គហេតុកូនក្តីខ្លួន ដោយផ្ដល់យុត្តិធម៌សម្រាប់ពួកគេ។
សូមរម្លឹកថា លោក គង់ សភា និងលោក ញ៉យ ចំរើន ត្រូវបានជនដៃដល់មួយក្រុម ដែលគេស្គាល់ថា ជាក្រុមកងអង្គរក្សរបស់នាយករដ្ឋមន្ត្រី បានវាយដំលើអតីតតំណាងរាស្ត្រទាំងពីរនេះ បណ្តាលឲ្យរងរបួសធ្ងន់ នៅក្បែរវិមានរដ្ឋសភា កាលពីថ្ងៃទី២៦ ខែតុលា ឆ្នាំ២០១៥ ។ ក្រោយអំពើហិង្សានេះ កើតឡើងបានមួយសប្ដាហ៍ ពោលគឺនៅថ្ងៃទី៣ ខែវិច្ឆិកា ឆ្នាំ២០១៥ ក៏មានជនដៃដល់បីនាក់ ចូលបង្ហាញខ្លួនចំពោះមុខសមត្ថកិច្ច បន្ទាប់ពីមានបញ្ជាឲ្យតាមចាប់ខ្លួនពីសម្ដេច ហ៊ុន សែន។
ជនល្មើសទាំង៣នាក់នោះ រួមមានឈ្មោះ ម៉ៅ ហឿន ឈ្មោះ ចាយ សារិទ្ធ និងឈ្មោះ សុត វណ្ណនី ដែលត្រូវបានតុលាការសម្រេចផ្ដន្ទាទោសជាប់ពន្ធនាគារចំនួន ៤ឆ្នាំ ក្រោមបទចោទ «ប្រើអំពើហិង្សាដោយចេតនាមានស្ថានទម្ងន់ទោស» តែទោសនេះត្រូវអនុវត្តតែ ១ឆ្នាំប៉ុណ្ណោះ ដោយទោស ៣ឆ្នាំទៀតត្រូវបានព្យួរ។ ក្រៅពីនេះជនល្មើសទាំង៣នេះ ត្រូវបានតុលាការបង្គាប់ឲ្យសងសំណង់៨០លានរៀល ដល់ជនរងគ្រោះម្នាក់ៗ និង៦លានរៀលបង់ចូលរដ្ឋ។
ក្រោយពីអនុវត្តទោសរួច ជនដៃដល់ទាំងនេះ ត្រូវបានឡើងឋានៈ ក្នុងការងារអង្គរក្សរបស់ពួកគេ ដោយមានការរិះគន់ពីសំណាក់មជ្ឈដ្ឋានទូទៅយ៉ាងខ្លាំង។ តែយ៉ាងណារដ្ឋមន្ត្រីក្រសួងការពារជាតិ ធ្លាប់បានថ្លែងការពារថា ការដំឡើងឋានន្តរសក្តិនេះ គឺធ្វើតាមច្បាប់ និងលក្ខន្តិកៈការងារ មិនតាមលក្ខណបុគ្គលឡើយ៕
Tag:
ញ៉យ ចំរើន
គង់ សភា
ជូង ជូងី
© រក្សាសិទ្ធិដោយ thmeythmey.com