បក្សខ្មែររួបរួមជាតិ គ្រោងឃោសនាទ្រង់ទ្រាយធំនៅខេត្តសៀមរាប

ជាតិ

បោះឆ្នោត

នយោបាយជាតិ

បក្សខ្មែររួបរួមជាតិ គ្រោងឃោសនាទ្រង់ទ្រាយធំនៅខេត្តសៀមរាប

17, Jul 2018 , 8:59 am

រូបភាព

ដោយ:

ភ្នំពេញ៖ គណបក្សខ្មែររួបរួមជាតិ គ្រោងធ្វើយុទ្ធនាការឃោសនាបោះឆ្នោតទ្រង់ទ្រាយធំម្ដងទៀត នៅថ្ងៃទី២១ ខែកក្កដា នៅខេត្តសៀមរាប។ នេះបើតាមអ្នកនាំពាក្យគណបក្សលោក រុណ មាត្រា។

លោក រុណ មាត្រា បានប្រាប់សារព័ត៌មាន ThmeyThmey តាមទូរសព្ទថា ក្បួនឃោសនាធំរបស់គណបក្សខ្មែររួបរួមជាតិ (KNU) គ្រោងមានអ្នកចូលរួមប្រមាណ១០០ឡាន និងអ្នកជិះម៉ូតូហែហមដទៃទៀត ដែលចាត់ទុកថាជាក្បួនធំសម្រាប់គណបក្ស។ ក្បួនឃោសនានេះ នឹងធ្វើឡើងនៅថ្ងៃទី២១ ខែកក្កដា ក្នុងខេត្តសៀមរាប។

យ៉ាងណា ក្បួនឃោសនានេះ នៅមិនទាន់ប្រាកដ ថានឹងមានការចូលរួមពីលោក ញឹក ប៊ុនឆៃ ប្រធានគណបក្សនេះឡើយ។ ក្រៅពីការហែក្បួនឃោសនាធំក្នុងខេត្តសៀមរាប គណបក្សខ្មែររួបរួមជាតិ ក៏មានការហែក្បួនទ្រង់ទ្រាយមធ្យមនៅក្នុងខេត្តផ្សេងទៀតដែរ។

លោក រុណ មាត្រា បញ្ជាក់បែបនេះថា៖ «នៅតាមបណ្ដាខេត្តផ្សេងៗ យើងមានការឃោសនាទាំងអស់ តែមិនបានធំនោះទេ ត្រឹមមានម៉ូតូ ២០ ទៅ៣០គ្រឿងប៉ុណ្ណឹង។ តែយើងផ្ដោតលើការចុះផ្ទាល់នៅមូលដ្ឋាន។ ហើយខេត្តសៀមរាប គ្រោងមានការឃោសនាធំ តែមិនដឹងថាលោក ញឹក ប៊ុនឆៃ ចូលរួមឬអត់ទេ»។

គណបក្សខ្មែររួបរួមជាតិ មានលេខរៀងលំដាប់ទី១ក្នុងតារាងសន្លឹកឆ្នោត។ គណបក្សខ្មែររួបរួមជាតិ មានបេក្ខជនឈរឈ្មោះចំនួន២៥មណ្ឌល ស្មើនឹង ២៥រាជធានី-ខេត្ត។ កាលពីបោះឆ្នោតជ្រើសរើសក្រុមប្រឹក្សាឃុំ សង្កាត់ គណបក្សនេះ បានទទួលកៅអីមេឃុំមួយកន្លែងក្នុងខេត្តបន្ទាយមានជ័យ៕