អន្តរជាតិ
នយោបាយអន្តរជាតិ
ឥណ្ឌា៖រដ្ឋ Assam ស្នើរដ្ឋអាស៊ានបើកស្ថានកុងស៊ុល និងបង្កើនការហោះហើរត្រង់ដើម្បីជំរុញការផ្សាភ្ជាប់ និងពាណិជ្ជកម្ម
ប្រមុខរដ្ឋាភិបាលរដ្ឋ Assam លោក Sarbananda Sonowal ជួបជាមួយអ្នកសារព័ត៌មានអាស៊ាននៅថ្ងៃ ១៦ ខែកក្កដា
×![]()
(Guwahati)៖ រដ្ឋាភិបាលនៃរដ្ឋ Assam កំពុងអនុវត្តគម្រោងជំរុញការហោះហើរត្រង់មកកាន់បណ្តាប្រទេសអាស៊ានដើម្បីរឹតបន្តឹងការផ្សាភ្ជាប់រវាងប្រជាជននិងប្រជាជនជាពិសេសធ្វើឲ្យសកម្មភាពពាណិជ្ជកម្មមរមារញឹកឡើង។ រដ្ឋ Assam ក៏ទទូចឲ្យរដ្ឋអាស៊ានទាំងដប់ពិចារណាបើកស្ថានកុងស៊ុលរៀងៗខ្លួននៅរដ្ឋភាគឦសានដែលជាច្រកទ្វារចូលឥណ្ឌា និងបើកការហោះហើរត្រង់ដូចគ្នា។
ក្នុងជំនួបជាមួយអ្នកសារព័ត៌មានអាស៊ានស្ថិតក្នុងដំណើរផ្លាស់ប្តូរទស្សនកិច្ចថ្ងៃ ១៦ ខែកក្កដាប្រមុខលេខាធិការស្តីទីនៃរដ្ឋ Assam ទទួលបន្ទុកគោលនយោបាយសកម្មភាពនៅភាគខាងកើត (Act East Policy) លោក Ravi Capoor បានថ្លែងថា អាស៊ាននិងឥណ្ឌាជាពិសេសរដ្ឋ Assam ដែលមានទីតាំងភូមិសាស្ត្រកៀកនឹងអាស៊ានត្រូវបើកចំហព្រំដែន និងមានការផ្សាភ្ជាប់បន្ថែមទៀត។
បើកចំហព្រំដែននិងពង្រីកការផ្សាភ្ជាប់នេះ លោក Capoopr សំដៅលើការបង្កើនមធ្យោបាយធ្វើដំណើរតាមផ្លូវទឹក ផ្លូវគោក និងផ្លូវអាកាស និងធានាឲ្យពាណិជ្ជកម្ម និងវិនិយោគទ្វេភាគីឲ្យផុសផុលឡើងរវាងឥណ្ឌា និងអាស៊ីអាគ្នេយ៍ដែលមានប្រវត្តិទំនាក់ទំនងយូរលង់ និងមានវប្បធម៌ស្រដៀងគ្នា។
១. Assam ផ្តល់ការឧបត្ថម្ភធនដល់ក្រុមហ៊ុនអាកាសចរណ៍ដើម្បីបង្កើនការហោះហើរត្រង់មកអាស៊ាន
ពេលសាកសួរថាតើរដ្ឋាភិបាលកណ្តាលឥណ្ឌាជាពិសេសរដ្ឋាភិបាលនៃរដ្ឋ Assam ប្រឹងប្រែងបែបណាដើម្បីអនុវត្តគោលនយោបាយធ្វើសកម្មភាពភាគខាងកើតឆ្ពោះមកអាស៊ាន ប្រមុខលេខាធិការរូបនេះថែមទាំងព្រលយផងដែរ ឥណ្ឌាកំពុងព្យាយាមប្តូររដ្ឋ Assam ឲ្យទៅជាក្រុង Kunming របស់ចិនដែលវាអាចធ្វើជាស្ពានផ្សាភ្ជាប់សាច់ភ្ជាប់អាស៊ានជាមួយឥណ្ឌា។
បើតាមលោក Ravi Capoor យុទ្ធសាស្ត្រធំៗចំនួនពីរ ដែល Assam កំពុងអនុវត្ត។ យុទ្ធសាស្ត្រទីមួយគឺ រដ្ឋ Assam កំពុងចាប់ផ្តើមបង្កើនការហោះហើរត្រង់ដែលមានតម្លៃសមរម្យទៅកាន់តំបន់អាស៊ាន។ ចំណែកចំណុចទីពីរគឺ Assam ជំរុញការផ្លាស់ប្តូរទស្សកិច្ចសិក្សា អប់រំ និងវប្បធម៌រវាងប្រជាជនទាំងពីរអាស៊ាននិងឥណ្ឌាដើម្បីត្រួសត្រាយផ្លូវឲ្យមានការស្វែងយល់ពីគ្នាបន្ថែមទៀត។
«ក្នុងរយៈពេលបីខែទៀតពោលគឺខែ តុលា យើងនឹងចាប់ផ្តើមគម្រោងឧបត្ថម្ភធនដល់ក្រុមហ៊ុនទេសចរណ៍ឲ្យមានការហោះហើរផ្ទាល់ទៅកាន់ទីក្រុងមួយចំនួននៃរដ្ឋអាស៊ានដែលនៅកៀកៗ»។ លោក Capoor និយាយដូច្នេះ។ ់
«ក្រៅពីគម្រោងឧបត្ថម្ភធន ក្រោមក្របខណ្ឌនៃគោលនយោបាយធ្វើសកម្មភាពនៅទិសខាងកើត យើងក៏កំពុងស្វែងរកលទ្ធភាពពង្រឹងការផ្លាស់ប្តូរទស្សនកិច្ចសិក្សានិងវប្បធម៌ បង្កើនកិច្ចសហប្រតិបត្តិការរវាងស្ថាប័នអប់រំ និងស្រាវជ្រាវដើម្បីលើកស្ទួយការស្វែងយល់ពីគ្នាផង»។
ខណៈដែលឥណ្ឌាមានគម្រោងជំរុញផ្លូវហោះហើរត្រង់ខ្លួនឯងទៅអាស៊ាននោះ មន្ត្រីជាន់ខ្ពស់រូបនេះក៏បានស្នើសុំបណ្តារដ្ឋអាស៊ានជួយបង្កើនការហោះហើរត្រង់មកកាន់រដ្ឋ Assam ដូចគ្នាព្រោះ Assam ជាច្រកទ្វារភាគឦសានភ្ជាប់អាស៊ានទៅកាន់ឥណ្ឌា ។
(រូបភាព៖ ប្រមុខលេខាធិការស្តីទីនៃរដ្ឋ Assam ទទួលបន្ទុកគោលនយោបាយសកម្មភាពនៅភាគខាងកើត (Act East Policy) លោក Ravi Capoor)
(រូបភាព៖ ប្រមុខលេខាធិការស្តីទីនៃរដ្ឋ Assam ទទួលបន្ទុកគោលនយោបាយសកម្មភាពនៅភាគខាងកើត (Act East Policy) លោក Ravi Capoor)
សូមទាញការចាប់អារម្មណ៍បន្តិចថា ឥណ្ឌាក្រោមអាណត្តិរបស់នាយករដ្ឋមន្ត្រី Narasimha Rao បានដាក់ចេញគោលនយោបាយសំឡឹងទៅទិសខាងកើតនៅក្នុងឆ្នាំ ១៩៩២ ដោយសារឥណ្ឌាមើលឃើញពីសក្តានុពលនៃការភ្ជាប់ទំនាក់ទំនងជាមួយប្រទេសអាស៊ានដែលនៅមានទីតាំងភូមិសាស្ត្រកៀកគ្នានេះ។ គោលនយោបាយនេះត្រូវបានផ្លាស់ប្តូរមកជា«គោលនយោបាយធ្វើសកម្មភាពនៅទិសខាងកើត»វិញនៅឆ្នាំ ២០១៤ ពេលលោកនាយករដ្ឋមន្ត្រី នារិន្ទ្រា ម៉ូឌី ឡើងកាន់អំណាច។
ការពង្រឹងចំណងមិត្តភាពជាមួយអាស៊ានជារឿងអាទិភាពរបស់លោក ម៉ូឌី ព្រោះលោកចង់ឃើញមានសកម្មភាពនិងផ្លែផ្កាក្នុងទំនាក់ទំនងអាស៊ាន និងឥណ្ឌានេះ។ អ្វីដែលគួរឲ្យកត់សម្គាល់ លោកបានអញ្ជើញមេដឹកនាំអាស៊ានទាំងដប់មកចូលរួមកិច្ចប្រជុំពិសេសនៅឥណ្ឌាកាលពីចុងខែមករា ក្រោមមូលបទ « តម្លៃរួម ជោគវាសនារួមគ្នា»។ កិច្ចប្រជុំកំពូលនេះបានក្លាយជាវេទិកាដ៏សំខាន់មួយសម្រាប់មេដឹកនាំអាស៊ាន និងឥណ្ឌា ជជែកពិភាក្សាពីបញ្ហាប្រឈមរួមគ្នា និងឈានទៅពង្រឹងកិច្ចសហប្រតិបត្តិការទ្វេភាគី និងភាពជាដៃគូយុទ្ធសាស្ត្រដែលសម្រេចបាននៅឆ្នាំ ២០១២នោះ ឲ្យកាន់តែរឹងមាំនិងស៊ីជម្រៅបន្ថែមទៀត។
២.រដ្ឋាភិបាលនៃរដ្ឋAssam ចង់ឃើញអាស៊ានបើកស្ថានកុងស៊ុលនៅទឹកដីខ្លួន
ដោយឡែក ក្នុងជំនួបជាមួយអ្នកសារព័ត៌មានអាស៊ានដែរ ប្រមុខរដ្ឋាភិបាល (Chief Minister) នៃរដ្ឋ Assam លោក Sarbananda Sonowal ឯណោះវិញក៏បានលើកឡើងពីសារសំខាន់នៃគោលនយោបាយធ្វើសកម្មភាពនៅភាគខាងកើតរបស់លោក នារិន្ទ្រា ម៉ូឌី ដែរសម្រាប់ភ្ជាប់សាច់ភ្ជាប់ឈាមជាមួយអាស៊ាន។ លោកឆ្លៀតឱកាសនោះស្នើឲ្យរដ្ឋអាស៊ានពិចារណាបង្កើតស្ថានកុងស៊ុលប្រចាំនៅរដ្ឋ Assam ផងដែរ។
People-to-people contact & civil society exchange with #SoutheastAsia are key components of our #ActEastPolicy. Had an opportunity to interact with a delegation of journalists from #ASEAN countries in Guwahati today & talk about many areas of cooperation. @PMOIndia @SushmaSwaraj pic.twitter.com/1e4xi4ZMgw
— Sarbananda Sonowal (@sarbanandsonwal) July 16, 2018
លោក Sonowal បាននិយាយដូច្នេះ៖«បច្ចុប្បន្ននេះយើងមានស្ថានកុងស៊ុលរដ្ឋពីរមានប៊ូតង់ និងបង់ក្លាដែសនៅទីនេះ។ យើងស្នើសុំឲ្យមិត្តអាស៊ានពិចារណបើកស្ថានទូតនៅក្នុងរដ្ឋរបស់យើងដើម្បីសម្រួលដល់ការលើកស្ទួយទំនាក់ទំនងទ្វេភាគី ជាពិសេសរឹតបន្តឹងការផ្សាភ្ជាប់រវាងប្រជាជន និងប្រជាជនយើងតាមរយៈទេសចរណ៍ និងពាណិជ្ជកម្ម»។
លោកបន្ថែមថា៖«ការផ្សាភ្ជាប់រវាងប្រជាជន និងប្រជាជន ក៏ដូចជាផ្លូវប្តូរទស្សនកិច្ចនិងយោបល់ជាមួយសង្គមស៊ីវិលរវាងឥណ្ឌា និងអាស៊ីអាគ្នេយ៍ជាគន្លឹះសំខាន់នៃគោលនយោបាយធ្វើសកម្មភាពនៅទិសខាងកើតរបស់យើង»។
លោកបានសង្កត់ធ្ងន់ សក្តានុពលមានច្រើនដែលត្រូវស្វែងរករួមគ្នាជាពិសេសជំរុញទេសចរណ៍ និងពាណិជ្ជកម្មរវាង Assam និងរដ្ឋអាស៊ាន។ ម្យ៉ាងរដ្ឋ Assam ប្រជាជនមានសរុបរហូតដល់ ៣៣ លាននាក់ឯណោះ ដែលវាជាទីផ្សារធំបំផុតមួយសម្រាប់អាស៊ាននាំផលិតផលមកលក់ ខណៈដែលឥណ្ឌានិងអាស៊ានមានកិច្ចព្រមព្រៀងពាណិជ្ជកម្មសេរីរួមគ្នាហើយនោះ។ ឥឡូវនេះ Assam កំពុងបន្តនាំចេញ ឈើឬស្សីច្នៃ (Bamboo Wood), អង្ករ, ចំណីអាហារកែច្នៃ, តែ និងប្រេងជាដើមទៅកាន់ប្រទេសអាស៊ានផងដែរ។
កិច្ចព្រមព្រៀងពាណិជ្ជកម្មសេរីរវាងអាស៊ាន និងឥណ្ឌា ដែលបានបង្កើតឡើងជាផ្លូវការនៅឆ្នាំ ២០០៩ បានជំរុញទំហំពាណិជ្ជកម្មរវាងអាស៊ាននិងឥណ្ឌាឲ្យផុសផុលកាន់តែខ្លាំង ប៉ុន្តែមិនទាន់ប្រើប្រាស់អស់សក្តានុពលខ្ពស់នៅឡើយ។ ទំហំពាណិជ្ជកម្មទ្វេភាគីកើនឡើងដល់ ៧៥ ពាន់លានដុល្លារអាមេរិកនៅក្នុងឆ្នាំ ២០១៧ ហើយគេរំពឹងថាទំហំនេះនឹងបន្តកើនឡើងបន្ថែមទៀតនៅពេអនាគតខាងមុខ៕
Tag:
Assam
ឥណ្ឌា
អាស៊ាន
Act East Policy
© រក្សាសិទ្ធិដោយ thmeythmey.com
