កីឡាជាតិ
ជាតិ
Hun Sen Cup៖ បឹងកេត ណាហ្គា ទ័ព ភ្នំពេញក្រោន ស្វាយរៀង មានប្រៀបនៅថ្ងៃនេះ
× ការប្រកួតបាល់ទាត់ដណ្តើមពានរង្វាន់សម្តេច ហ៊ុន សែន ប្រចាំឆ្នាំ២០១៨ បានឈានដល់ការប្រកួតបញ្ចប់ជើងទី២ ដោយនៅថ្ងៃទី១៨ ខែកក្កដា ឆ្នាំ២០១៨ មានការប្រកួតចំនួន៧គូ។ ក្នុងនោះ៤គូធ្វើនៅម៉ោង៣:៣០នាទីរសៀល និង៣គូម៉ោង៦:៣០នាទីល្ងាច។ បឹងកេត, ណាហ្គាវើល, ក្រសួងការពារជាតិ, ភ្នំពេញក្រោន និងព្រះខ័នរាជស្វាយរៀង សុទ្ធតែមានប្រៀបក្នុងការប្រកួតនេះ។
អង្គរថាយហ្គឺរ ជួប សូលទីឡូអង្គរម៉ោង៣:៣០នាទីនៅកីឡដ្ឋានខេត្តសៀមរាប
ក្រុមមានមូលដ្ឋាននៅខេត្តសៀមរាបទាំងពីរនេះ គ្មានក្រុមណាមានប្រៀបជាងក្រុមណានោះទេ ពោលគឺពួកគេមាន១ពិន្ទុក្នុងដៃដូចគ្នា។ លទ្ធផលស្មើ ២-២ ក្នុងជើងទី១ ធ្វើឲ្យជំនួបជើងទី២នៅរសៀលនេះ ក្លាយជាជំនួបដ៏តានតឹង និងជក់ចិត្តសម្រាប់អ្នកគាំទ្រ ព្រោះក្រុមទាំងពីរត្រូវប្រជែងគ្នាយកឈ្នះរៀងៗខ្លួន។ ក្រុមណាឈ្នះក្នុងការប្រកួតនេះ នឹងទទួលបានកៅអីឡើងទៅវគ្គ៨ក្រុមចុងក្រោយ។
កំពតប៉ះណាហ្គាវើល ម៉ោង៣:៣០នាទីនៅកីឡដ្ឋានខេត្តកំពត
នេះជាជំនួបដ៏លំបាកមួយសម្រាប់ក្រុមកំពត ព្រោះក្រុមនេះត្រូវការឈ្នះណាហ្គាវើលលើសពី៥គ្រាប់ ដើម្បីទទួលបានកៅអីឡើងទៅវគ្គបន្ត។ ប៉ុន្តែវាមិនងាយស្រួលសម្រាប់ក្រុមឡើងមកពីវគ្គជម្រុះតាមខេត្តមួយនេះឡើយ ព្រោះណាហ្គាវើលជាក្រុមខ្លាំង និងមានកីឡាករល្អៗច្រើន។ ក្នុងជំនួបជើងទី១ ណាហ្គាវើលយកឈ្នះកំពតក្នុងលទ្ធផល ៥-១។
អាស៊ីអឺរ៉ុប ជួប ក្រសួងការពារជាតិ ម៉ោង៣:៣០នាទីរសៀលនៅកីឡដ្ឋានអេ អ៊ី យូ
ក្រុមអាស៊ីអឺរ៉ុបត្រូវការឈ្នះក្រសួងការពារជាតិលើសពី២គ្រាប់ដាច់ខាតក្នុងជំនួបជើងទី២នេះ ដើម្បីធានាកៅអីសម្រាប់វគ្គបន្ត។ ប៉ុន្តែវាមិនមែនជារឿងងាយស្រួលនោះទេសម្រាប់ម្ចាស់ផ្ទះអាស៊ីអឺរ៉ុប ព្រោះក្រសួងការពារជាតិជាក្រុមខ្លាំង ដែលមានទុន៣ពិន្ទុ ក្នុងដៃស្រាប់។ នាជំនួបជើងទី១ ក្រសួងការពារជាតិយកឈ្នះអាស៊ីអឺរ៉ុបក្នុងលទ្ធផល ៣-១។
គីរីវង់សុខសែនជ័យ ប៉ះ អគ្គស្នងការនគរបាលជាតិម៉ោង៣:៣០នាទីនៅកីឡដ្ឋានខេត្តតាកែវ
ដើម្បីធានាកៅអីទៅវគ្គបន្ត ទាមទារឲ្យក្រុមគីរីវង់សុខសែនជ័យយកឈ្នះក្រុមអគ្គស្នងការនគរបាលជាតិដាច់ខាតក្នុងជំនួបជើងទី២នេះ។ នាការប្រកួតជើងទី១នៅកីឡដ្ឋានស្តាតចាស់ ក្រុមទាំងពីរបានបញ្ចប់ក្នុងលទ្ធផលស្មើ ២-២។ ជំនួបជើងទី២រសៀលនេះ នឹងក្លាយជាជំនួប ដ៏តានតឹង និងស្វិតស្វាញបំផុត ព្រោះក្រុមទាំងពីរសុទ្ធតែត្រូវការឈ្នះជាដាច់ខាតរៀងៗខ្លួន។
ភ្នំពេញក្រោន ប៉ះ អគ្គសនីកម្ពុជាម៉ោង៦:៣០នាទីនៅកីឡដ្ឋាន RSN
ជំនួបនេះ ភ្នំពេញក្រោនហាក់មានប្រៀបជាងអគ្គិសនីកម្ពុជា ព្រោះភ្នំពេញក្រោនមាន៣ពិន្ទុក្នុងដៃជាទុន ក្រោយពួកគេយកឈ្នះអគ្គិសនីកម្ពុជា ២-១ នាការប្រកួតជើងទី១នៅលើទឹកដីរបស់ខ្លួន។ កត្តានេះ ធ្វើឲ្យម្ចាស់ផ្ទះអគ្គិសនីកម្ពុជាត្រូវការឈ្នះភ្នំពេញក្រោនលើសពី១គ្រាប់ក្នុងជំនួបជើងទី២នេះ ដើម្បីធានាកៅអីឡើងទៅវគ្គបន្ត។
វិសាខា ជួប ព្រះខ័នរាជស្វាយរៀងម៉ោង៦:៣០នាទីនៅកីឡដ្ឋានស្តាតចាស់
នេះអាចចាត់ទុកជាជំនួបពិសេសប្រចាំពានរង្វាន់សម្តេច ហ៊ុន សែន ក្នុងវគ្គ១៦ក្រុមចុងក្រោយ ព្រោះក្រុមទាំងពីរមានកីឡាករល្អៗ ពោរពេញដោយបទពិសោធច្រើន។ ទោះបីវិសាខា ជាក្រុមចំណូលថ្មីក្នុងពានរង្វាន់ក្របខណ្ឌមិត្តហ្វូនខេមបូឌានលីគ និងពានរង្វាន់សម្តេច ហ៊ុន សែន ក៏ដោយ តែក្រុមនេះមានសមត្ថភាពខ្លាំងគួរឲ្យកត់សម្គាល់។ ជាក់ស្តែងនាការប្រកួតជើងទី១នៅលើទឹកដីស្វាយរៀង វិសាខា ដែលបាត់បង់សមាជិក១រូបនៅតង់ទី១ របូតតែ១គ្រាប់ប៉ុណ្ណោះ ក្រោមថ្វីជើងព្រះខ័នរាជស្វាយរៀង។ នាការប្រកួតជើងទី១ក្រុមព្រះខ័នរាជស្វាយរៀងយកឈ្នះវិសាខាក្នុងលទ្ធផល ១-០។
បឹងកេត តទល់ជាមួយ វេស្ទើនភ្នំពេញម៉ោង៦:៣០នាទីនៅពហុកីឡដ្ឋានជាតិ
បឹងកេតអាចចាត់ទុកជាក្រុមមានប្រៀបក្នុងជំនួបនេះ ព្រោះពួកគេត្រូវការត្រឹមស្មើក្នុងធានាកៅអីទៅវគ្គបន្ត ខណៈវេស្ទើនភ្នំពេញត្រូវឈ្នះលើសពី៤គ្រាប់។ នាការប្រកួតជើងទី១នៅកីឡដ្ឋានវេស្ទើនភ្នំពេញ បឹងកេតយកឈ្នះវេស្ទើនភ្នំពេញក្នុងលទ្ធផល ៥-១៕
© រក្សាសិទ្ធិដោយ thmeythmey.com