ផ្លូវជាតិលេខ៤ ត្រូវបានហាមឆ្លងកាត់ដោយសារជំនន់ទឹកភ្លៀង ខណៈតំបន់ខ្លះក្នុងខេត្តកំពតរងការលិចលង់

ជាតិ

សង្គមជាតិ

ផ្លូវជាតិលេខ៤ ត្រូវបានហាមឆ្លងកាត់ដោយសារជំនន់ទឹកភ្លៀង ខណៈតំបន់ខ្លះក្នុងខេត្តកំពតរងការលិចលង់

18, Jul 2018 , 11:42 am

រូបភាព

រដ្ឋបាលខេត្តព្រះសីហនុ

ដោយ:

ព្រះសីហនុ៖ ដោយសារតែជំនន់ទឹកភ្លៀងនៅតែមានការកើនឡើងជាបន្តបន្ទាប់ កំណាត់ផ្លូវជាតិលេខ៤ នៅចន្លោះគីឡូម៉ែត្រលេខ១១៥-១១៦ ចំណុចស្ទឹងសំរោង ក្នុងឃុំអូរបាក់រទេះ ស្រុកកំពង់សីលា ខេត្តព្រះសីហនុ ត្រូវបានហាមឃាត់ការធ្វើដំណើរឆ្លងកាត់។

រដ្ឋបាលខេត្តព្រះសីហនុ បានបញ្ជាក់ថា បច្ចុប្បន្នជំនន់ទឹកភ្លៀងលើស្ពានសំរោងមានកម្ពស់ដល់ទៅ១,២០ ម៉ែត្រ បណ្ដាលឲ្យលិចលង់ ផ្ទះប្រជាពលរដ្ឋជាង៣០០គ្រួសារ ។ ចំណែកយាន្តយន្តគ្រប់ប្រភេទ មិនអាចធ្វើដំណើរឆ្លងកាត់បានឡើយ ដោយសារបញ្ហាជំនន់ទឹកភ្លៀងនេះ ។ រដ្ឋបាលខេត្តព្រះសីហនុ ស្នើឲ្យអ្នកធ្វើដំណើរទៅខេត្តព្រះសីហនុ វាងតាមផ្លូវជាតិលេខ៣ជំនួសវិញ ដើម្បីសុវត្ថិភាពផ្ទាល់ខ្លួន ។ ចំណែករថយន្តធុនធំ ដូចជាកុងតឺន័រ ជាដើមត្រូវរង់ចាំរយៈពេល១ថ្ងៃ ក្រោយទឹកស្រកអស់ ទើបអនុញ្ញាតឲ្យធ្វើដំណើរឆ្លងកាត់បាន។

រីឯជំនន់ទឹកភ្លៀងនៅខេត្តកំពតវិញ បានធ្វើឲ្យអាងស្តុកទឹកទំនប់វារីអគ្គិសនី កំចាយខេត្តកំពត ឡើងដល់កម្រិតត្រូវបង្ហូរចេញតាមទ្វាររំដោះទឹកដែរ ខណៈទឹកព្រែកកំពង់បាយហក់ឡើងខ្ពស់ ដែលបង្កឲ្យតំបន់មួយចំនួនទទួលរងគ្រោះទឹកជំនន់។ នេះបើតាមរដ្ឋបាលខេត្តកំពត ចេញផ្សាយផ្លូវការនៅថ្ងៃទី១៧ ខែកក្កដា៕