មន្ត្រីអតីតបក្សប្រឆាំង ជំរុញឲ្យអាមេរិក ដាក់ទណ្ឌកម្មបន្ថែមលើកម្ពុជា ឲ្យបានមុនបោះឆ្នោត

ជាតិ

នយោបាយជាតិ

មន្ត្រីអតីតបក្សប្រឆាំង ជំរុញឲ្យអាមេរិក ដាក់ទណ្ឌកម្មបន្ថែមលើកម្ពុជា ឲ្យបានមុនបោះឆ្នោត

19, Jul 2018 , 8:19 pm

រូបភាព

កញ្ញា កឹម មនោវិទ្យា និងថ្នាក់ដឹកនាំនៃអតីតគណបក្សសង្គ្រោះជាតិប្រចាំសាខាសហរដ្ឋអាមេរិក ថតជាមួយលោក Ed Royce សមាជិករដ្ឋសភាអាមេិក។ រូបពីទំព័រហ្វេសប៊ុករបស់លោក កឹម សុខា

ដោយ: ថ្មីៗ

ថ្នាក់ដឹកនាំមួយចំនួននៃអតីតគណបក្សសង្គ្រោះជាតិ បានទៅជួបសមាជិករដ្ឋសភាអាមេរិកបីរូប គឺលោក Ed Royce លោក Ted Yoho និងលោក Alan Lowenthal ដើម្បីជំរុញឲ្យអាមេរិក អនុម័តច្បាប់ថ្មីឲ្យលឿង ក្នុងការដាក់ទណ្ឌកម្មបន្ថែមមកលើរដ្ឋាភិបាលកម្ពុជា។ ពួកគេ ចង់ឲ្យច្បាប់ថ្មីនេះ កើតឡើងមុនការបោះឆ្នោតនៅកម្ពុជា។

មន្ត្រីអតីតគណបក្សប្រឆាំង ក៏បានស្នើឲ្យសហរដ្ឋអាមេរិក ដាក់មន្ត្រីរដ្ឋាភិបាលកម្ពុជាផ្សេងទៀត ចូលទៅក្នុងបញ្ជីឈ្មោះនៃអ្នករំលោភសិទ្ធិមនុស្ស។ លើសពីនេះ ពួកគេ ថែមទាំងសុំឲ្យក្រសួងពាណិជ្ជកម្មអាមេរិក បើកការស៊ើបអង្កេតពីកម្មវិធីអនុគ្រោះពន្ធមកលើកម្ពុជា ដើម្បីបង្ខំឲ្យរដ្ឋាភិបាលកម្ពុជា គោរពសិទ្ធិមនុស្ស និងដើរតាមគន្លងប្រជាធិបតេយ្យ។

អត្ថបទទាក់ទង

មុនបោះឆ្នោតនៅកម្ពុជា៖ អាមេរិក អឺរ៉ុប ដាក់សម្ពាធ, ជប៉ុន ចង់ឲ្យចរចា, ឯចិន គាំទ្រ

HRW ចោទឧត្តមសេនីយ៍ខ្មែរ១២រូបអំពីការរំលោភសិទ្ធិមនុស្ស មុនការបោះឆ្នោតមកដល់

ក្រុមសមាជិករដ្ឋសភាអាមេរិក ធ្វើច្បាប់ម្តងទៀត ដើម្បីបន្ថែមទណ្ឌកម្មលើរដ្ឋាភិបាលកម្ពុជា

ព័ត៌មានជំវិញជំនួបរវាងមន្ត្រីអតីតគណបក្សប្រឆាំង និងសមាជិករដ្ឋសភា ត្រូវបានបង្ហោះលើទំព័រហ្វេសប៊ុករបស់លោក កឹម សុខា អតីតប្រធានគណបក្សសង្គ្រោះជាតិ ដែលកំពុងជាប់ឃុំក្នុងពន្ធនាគារ។ មន្ត្រីអតីតគណបក្សប្រឆាំងបីរូប ប្រចាំសាខាក្នុងសហរដ្ឋអាមេរិក ដែលបានទៅជួបសមាជិករដ្ឋសភាអាមេរិក គឺលោកលោក ផាន ប្រាក់ លោក វ៉ា សាម៉ន លោក សុខ សុផាត និងលោក រាជ សុគុណ។

ព័ត៌មានខាងលើ មិនបានបញ្ជាក់ថាកញ្ញា កឹម មនោវិទ្យា កូនស្រីរបស់លោក កឹម សុខា បានចូលពិភាក្សាជាមួយសមាជិករដ្ឋសភាអាមេរិក ឬក៏អត់នោះទេ។ ប៉ុន្តែ រូបដែលបង្ហោះលើទំព័រហ្វេសប៊ុករបស់លោក កឹម សុខា មានរូបកញ្ញា កឹម មនោវិទ្យា ឈរថតជាមួយសមាជិករដ្ឋសភាអាមេរិកទាំងនោះ។

លោក សុខ ឥសាន អ្នកនាំពាក្យគណបក្សប្រជាជនកម្ពុជា ចំអកថា ការខ្នះខ្នែងរបស់អតីតក្រុមអ្នកប្រឆាំង មិនមានប្រយោជន៍នោះទេ។ លោក លើកឡើងថា ពួកគេ បានរត់ទៅពឹងពាក់អាមេរិក និងបរទេសជាយូរមកហើយ តែមកដល់ពេលនេះ នៅមិនឃើញទទួលបានលទ្ធផលវិជ្ជមានអ្វីឡើយ។

អ្នកនាំពាក្យគណបក្សកាន់អំណាចរូបនេះ បកស្រាយថា ត្រឹមសមាជិករដ្ឋសអាមេរិកពីរ-បីនាក់ មិនអាចមានឥទ្ធិពល ក្នុងការជំរុញឲ្យមានទណ្ឌកម្មមកលើរដ្ឋាភិបាលកម្ពុជានោះទេ។ លោក ប្រាប់សារព័ត៌មានថ្មីៗតាមទូរសព្ទ យ៉ាងដូច្នេះថា៖«ការដាក់ទណ្ឌកម្ម គឺមិនមែនងាយ ដូចក្រុមប្រឆាំង និយាយនោះទេ។ នៅមាននីតិវិធី ច្រើនណាស់»។

មួយរយៈចុងក្រោយនេះ ជាពិសេសខណៈការបោះឆ្នោត ជិតមកដល់ អតីតក្រុមអ្នកប្រឆាំងនៅក្រៅប្រទេស ដោយមានលោក សម រង្ស៊ី ជាអ្នកដឹកនាំ ខិតខំខ្លាំងណាស់ ក្នុងការជំរុញឲ្យសហគមន៍អន្តរជាតិ ដាក់សម្ពាធមកលើរដ្ឋាភិបាលកម្ពុជា។ ជាមួយគ្នានេះ ពួកគេ នៅតែអំពាវនាវកុំឲ្យប្រជាពលរដ្ឋទៅបោះឆ្នោត នៅថ្ងៃទី២៩ ខែកក្កដា ឆ្នាំ២០១៨៕