កីឡាអន្តរជាតិ
អន្តរជាតិ
កិច្ចសន្យាថ្មី នាំឲ្យ De Gea ក្លាយជាកីឡាករមានប្រាក់ឈ្នួលខ្ពស់បំផុតនៅ Man Utd
× អ្នកចាំទីដៃស្អិត David de Gea បានព្រមព្រៀងគ្នាជាមួយក្លិប Manchester United ក្នុងការបន្តកិច្ចសន្យាថ្មីបន្ថែមទៀតរហូតដល់ឆ្នាំ ២០២៣ ដោយទទួលបានប្រាក់ឈ្នួលខ្ពស់បំផុតចំនួន ៣១ម៉ឺនដុល្លារអាមេរិកក្នុងមួយសប្តាហ៍ ក្រោយបង់ពន្ធរួច។
De Gea វ័យ ២៨ ឆ្នាំបានបង្ហាញខ្លួន ឲ្យក្រុមបិសាចក្រហម ៣៦៧ប្រកួតចាប់តាំងពីលោក Sir Alex Ferguson ទិញរូបគេពី Atletico Madrid ក្នុងតម្លៃ ១៨,៩ លានផោន (២៣,៤៧លានដុល្លារ) កាលពីខែមិថុនា ឆ្នាំ២០១១។
តាមពិតទៅអ្នកចាំទីសញ្ជាតិអេស្ប៉ាញរូបនេះខិតជិតទៅនឹងការផ្លាស់ទៅ Real Madrid ទៅហើយអំឡុងពេលទីផ្សារដោះដូរកីឡាករសម្រាប់រដូវកាលថ្មីនេះ ស្របពេលកិច្ចសន្យារបស់គេនៅ Old Trafford ជិតដល់កាលកំណត់។ យ៉ាងណា ការចរចាមិនត្រូវរូវគ្នាទើប De Gea ត្រូវនៅបន្តរហូតព្រមព្រៀងផ្តល់កិច្ចសន្យាថ្មីចំនួន៤ឆ្នាំ រួមទាំងជម្រើសបន្ថែម១ឆ្នាំទៀតផង ពោលគឺរហូតដល់ឆ្នាំ២០២៤។
មុនកិច្ចព្រមព្រៀងថ្មីនេះ De Gea មានប្រាក់ឈ្នួលតែជាង ១៨ម៉ឺនដុល្លារក្នុងមួយសប្តាហ៍មុនបង់ពន្ធ។ កិច្ចសន្យាថ្មី បាននាំឲ្យ De Gea ក្លាយជាកីឡាករមានប្រាក់ឈ្នួលខ្ពស់បំផុតនៅ Man Utd ដោយទទួលបានប្រាក់ឈ្នួល ១៦,៧៦ លានដុល្លារអាមេរិកក្នុងមួយឆ្នាំ ឬ៣១ម៉ឺនដុល្លារក្នុងមួយអាទិត្យបន្ទាប់ពីបង់ពន្ធរួច។ តាមពិតទៅ Paul Pogba ឯណោះទេដែលមានប្រាក់ឈ្នួលខ្ពស់បំផុត ប៉ុន្តែដោយសារមិនអាចជួយក្រុមបានលេង Champions Leageu ទើបត្រូវកាត់បន្ថយប្រាក់ ២៥ភាគរយដែលបានចារក្នុងកិច្ចសន្យារួចហើយ លើកលែងតែ De Gea មួយប៉ុណ្ណោះ។
De Gea ដែលលេងឲ្យក្រុមជម្រើសជាតិអេស្ប៉ាញចំនួន ៤០លើក បានជួយ Man Utd ឈ្នះជើងឯក Premier League មួយលើកក្នុងរដូវកាល ២០១២-១៣ រួមទាំង FA Cup ៣លើក League Cup ២លើក និង Europa League រដូវកាល ២០១៦-១៧៕
Tag:
David de Gea
Manchester United
© រក្សាសិទ្ធិដោយ thmeythmey.com