ជនជាតិអាមេរិកាំងម្នាក់ ដាំផ្លែឈើធម្មជាតិជាង១០០ហិកតានៅខេត្តក្រចេះ ផ្គត់ផ្គង់ទីផ្សារក្នុងស្រុក

ជាតិ

បទយកការណ៍ / បទសម្ភាសន៍

ជនជាតិអាមេរិកាំងម្នាក់ ដាំផ្លែឈើធម្មជាតិជាង១០០ហិកតានៅខេត្តក្រចេះ ផ្គត់ផ្គង់ទីផ្សារក្នុងស្រុក

15, Dec 2019 , 10:59 pm

រូបភាព

លោក Chad Lehner និង ភរិយា ប្រមូលផលដំណាំរបស់ខ្លួននៅចម្ការជាង១០០ហិចតានៅខេត្តក្រចេះ

ដោយ:

ភ្នំពេញ៖ លោក Chad Lehner គឺជាជនជាតិអាមេរិកាំងម្នាក់ ដែលបានបោះទុនវិនិយោគលើការដាំដុះបន្លែផ្លែឈើធម្មជាតិ លើផ្ទៃដីជាង១០០ហិកតានៅស្រុកស្នួល ខេត្តក្រចេះក្នុងឆ្នាំ២០១៦។ ក្រោយដំណើរបានរយៈពេល៣ឆ្នាំ បច្ចុប្បន្ន ផលិតផលផ្លែឈើ រួមមាន៖ ផ្លែផាសិន ល្ពៅ ល្ហុង ខ្នុរ ស្រកានាគ និងដំណាំផ្សេងទៀត ត្រូវបានដាក់លក់នៅតាមផ្សារនានានៅរាជធានីភ្នំពេញ។

ជាបន្តសូមអញ្ជើញស្តាប់បទយកការណ៍ដែលរៀបចំដោយ លោក រ៉ឹម ភារី ដូចតទៅ៖

មានរូបរាងខ្ពស់ស្រឡះ និងមានសម្បុរស លោក Chad Lehner ជាម្ចាស់កសិដ្ឋានឈ្មោះថា Toom Toom (ទុំទុំ) ដែលមានទំហំ១០០ហិកតា ស្ថិតនៅស្រុកស្នួល ខេត្តក្រចេះ ក្បែរផ្លូវបំបែកទៅខេត្តមណ្ឌលគិរី។ ជាអតីតនិស្សិតជំនាញកសិកម្ម ជនជាតិអាមេរិកាំងរូបនេះ មានបំណងដាំបន្លែផ្លែឈើធម្មជាតិនាំចេញទៅប្រទេសចិន ប៉ុន្តែ ក្រោយមក លោកបានប្តូរគំនិត ដោយសម្រួចគោលដៅផលិតសម្រាប់លក់ឲ្យអតិថិជនខ្មែរវិញ។

បើតាមលោក Chad Lehner បច្ចុប្បន្ននៅកម្ពុជាមានតម្រូវការផ្លែឈើធម្មជាតិច្រើន ប៉ុន្តែខ្វះការផ្គត់ផ្គង់ ស្របពេលដែលពលរដ្ឋខ្មែរជាទូទៅមានកង្វល់ខ្លាំង ចំពោះផ្លែឈើ និងបន្លែ ដែលលក់នៅតាមទីផ្សារមានសារធាតុគីមីប៉ះពាល់ដល់សុខភាព។

លោកបានពន្យល់ពីមូលហេតុនៃការចូលមកវិនិយោគនៅកម្ពុជាយ៉ាងដូច្នេះថា៖ «ខ្ញុំចង់ចាប់ផ្តើមបង្កើតជំនួញដែលមាននិរន្តរភាព។ ដូច្នេះ យើងចង់ដាំផ្លែឈើគ្មានជាតិពុល ហើយលក់ឲ្យអតិថិជនដោយខ្លួនឯងផ្ទាល់ ដោយមិនត្រូវការឈ្នួញកណ្តាលនោះទេ។ ដូច្នេះ យើងព្យាយាមយកចិត្តទុកដាក់ការពារសុខភាពពលរដ្ឋ ដោយផ្តល់សាច់មាន់ សាច់គោធម្មជាតិ និងបន្លែផ្លែឈើសរីរាង្គដល់ពួកគេ។ វាជាគោលការណ៍ប្រកបដោយនិរន្តរភាពរបស់ក្រុមហ៊ុនយើង»។

បើទោះបីមិនមានដើមទុនច្រើន ប៉ុន្តែ លោក Chad Lehner ដែលមានចរិតរួសរាយរាក់ទាក់ បានប្រឹងប្រែងបង្កើតកសិដ្ឋានធម្មជាតិនៅខេត្តក្រចេះទាំងលំបាក ដ្បិតលោកបានចំណាយពេល២ឆ្នាំ ដោយមិនទាន់បានចំណូលត្រឡប់មកវិញ។ យ៉ាងណាក៏ដោយ នៅឆ្នាំ២០១៩នេះ លោកផ្តើមដាក់លក់ផលិតផលរបស់ខ្លួន រួមមាន៖ ល្ហុង ល្ពៅ ផ្លែផាសិន ឪឡឹកពូជហូឡង់ ម្នាស់ទឹកឃ្មុំ ស្រកានាគ ខ្នុរ ការ៉ុត និងដំណាំផ្សេងទៀតនៅលើទីផ្សារទូទៅ ផ្សារទំនើប និងសណ្ឋាគារមួយចំនួននៅរាជធានីភ្នំពេញ។

តាមពិតទៅ ក្រៅពីលក់ផ្លែឈើស្រស់ទៅក្នុងទីផ្សារ លោកក៏បានកែច្នែផ្លែឈើ ជាទឹកផ្លែឈើ ដំណាប់ និងស្ករគ្រាប់ហើយដែរ គ្រាន់តែបច្ចុប្បន្ន មិនទាន់ចេញលក់នៅទីផ្សារ ព្រោះត្រូវរង់ចាំការត្រួតពិនិត្យគុណភាព ពីក្រសួងពាក់ព័ន្ធជាមុនសិន។

លោក Chad Lehner ក្នុងវ័យ៥០ឆ្នាំ និងមានភរិយាជនជាតិខ្មែរ បានជួលដីរបស់ពលរដ្ឋជាង១០០ហិកតា រយៈពេល៣០ឆ្នាំ ដើម្បីបង្កើតកសិដ្ឋាន Toom Toom នេះឡើង។ ជាអតីតនិស្សិតជំនាញកសិកម្ម លោកទើបតែចាប់ផ្តើមវិនិយោគចម្ការបន្លែផ្លែឈើធម្មជាតិ ជាលើកដំបូងនៅប្រទេសកម្ពុជា។

បើទោះបីបន្លែផ្លែឈើធម្មជាតិ មានតម្លៃខ្ពស់ជាងបន្លែផ្លែឈើ ដែលដាក់លក់លើទីផ្សារជាទូទៅមែន ប៉ុន្តែការផ្គត់ផ្គង់នៅតែខ្វះខាតនៅឡើយ។ ម្យ៉ាងភូមិសាស្ត្រចម្ការដែលជាប់ទន្លេ និងដីមានជីជាតិល្អ ក៏បានក្លាយជាមូលហេតុដែលជនជាតិអាមេរិកាំងរូបនេះ ចង់បង្កើតកសិដ្ឋាននៅខេត្តក្រចេះ ដើម្បីដាំ និងកែច្នៃផ្លែឈើ ហើយដាក់លក់លើទីផ្សារកម្ពុជា។

អ្នកស្រី សៅ សារឹម ភរិយារបស់លោក Chad Lehner បានផ្តល់បទសម្ភាសដល់សារព័ត៌មានថ្មីៗថា បច្ចុប្បន្ន ក្រៅពីដាំបន្លែផ្លែឈើ កសិដ្ឋានរបស់អ្នកស្រី ក៏កំពុងចិញ្ចឹមមាន់ និងគោធម្មជាតិផងដែរ។

ក្នុងវ័យ៣១ឆ្នាំ នារីសម្បុរស្រអែម និងមកខេត្តស្វាយរៀង បានពន្យល់យ៉ាងដូច្នេះថា៖«ដោយសារ យើងយកអាចម៍គោ និងអាចម៍មាន់ ធ្វើជាជីកំប៉ុស្តដោយខ្លួនឯង។ ចំណែក ការធ្វើទឹកផ្លែឈើ ដំណាប់ និងស្ករគ្រាប់ ហើយកាកសំណល់ចេញពីទឹកផ្លែឈើហ្នឹង យើងយកទៅធ្វើជាជីកំប៉ុស្ត។ ហើយបើសិនអាចម៍គោ ឬអាចម៍មាន់ អត់គ្រប់គ្រាន់ យើងទិញពីអ្នកជិតខាងដែលចិញ្ចឹមគោ។ គោ និងមាន់ យើងលក់ឲ្យខ្មែរយើងនៅតាមអូតែល»។

បើតាម អ្នកស្រី សៅ សារឹម ការបង្កើតកសិដ្ឋាននេះ មានផលលំបាកជាច្រើន ដ្បិតការដាំបន្លែផ្លែឈើធម្មជាតិ តម្រូវឲ្យមានការចំណាយទាំងថវិកា ពេលវេលា និងកម្លាំងជាច្រើនលើការបង្កើតជីធម្មជាតិដោយខ្លួនឯង ព្រមទាំងព្យាយាមទប់ស្កាត់ការហូរចូលថ្នាំកសិកម្ម ពីចម្ការនៅក្បែរខាង។

លោកស្រីបានពន្យល់យ៉ាងដូច្នេះថា៖ «និយាយរួមទៅ បើទីផ្សារ អត់លំបាកទេ ព្រោះយើងមានម៉ូយច្រើន។ ហើយឥឡូវ ប្រជាជនខ្មែរយើងមានការយល់ដឹងច្រើន ដូច្នេះគាត់ជួយគាំទ្ររបស់ខ្មែរយើងច្រើន។ បើផ្លែឈើក៏មិនអីដែរ តែផលពិបាកខ្លាំង គឺការថែទាំ ដោយសារយើងអត់ប្រើជាតិគីមី»។

បើតាមអ្នកស្រី សៅ សារឹម ការបណ្តាក់ទុនវិនិយោគលើវិស័យកសិកម្មនេះ ក៏បណ្តាលមកពីអ្នកស្រីចង់បង្កើតការងារដល់ប្រជាជនកម្ពុជា និងស្របតាមចំណង់ចំណូលចិត្តរបស់ស្វាមីខ្លួន ដែលមានជំនាញផ្នែកកសិកម្មនេះស្រាប់។

អ្នកស្រី ខុន វឿន កម្មករម្នាក់ក្នុងចំណោមកម្មករទាំង១០នាក់ នៅក្នុងកសិដ្ឋាន ToomToom ដែលទើបឡើងមកពីកាត់ស្មៅខ្នុរក្នុងចម្ការ បានអះអាងថា ចម្ការនេះ មិនប្រើជីគីមីនោះទេ មានតែប្រើជីអាចម៍គោ និងជីអាចម៍មាន់។ អ្នកស្រី និងសមាជិកគ្រួសារ បានចូលមកធ្វើការនៅក្នុងចម្ការនេះ បាន៥ខែមកហើយ ដោយទទួលបានប្រាក់ខែម្នាក់ៗ ២០០ដុល្លារ និង ស្នាក់នៅក្នុងកសិដ្ឋាននេះតែម្តង។

ក្នុងវ័យ៥១ឆ្នាំ អ្នកស្រី ខុន វឿន ដែលជាអ្នកខេត្តកំពង់ចាម បានពន្យល់ការងាររបស់ខ្លួនថា មូលហេតុដែលអ្នកស្រី និងគ្រួសារមកធ្វើការងារនៅក្នុងចម្ការ គឺបណ្តាលមកពីអ្នកស្រីចង់រកលុយសងបំណុលគេ និងមិនចង់ចំណាកស្រុកទៅឆ្ងាយ។

អ្នកស្រីបញ្ជាក់យ៉ាងដូច្នេះថា៖ «ក្នុងចម្ការ ខ្ញុំជាអ្នកយកស្មៅម្នាស់ ស្មៅខ្នុរ ដាំកូនផាសិន ដាំកូនស្រកានាគ ដាំល្ហុង ល្ពៅ...។ ខ្ញុំសូមអរគុណគាត់ដែរហ្នឹង យើងមកនៅជាមួយគាត់ គាត់ទុកចិត្ត និងត្រេកអរជាមួយយើង និងកូនចៅ។ យើងមានកន្លែងដេកស្រួល បន្ទប់ជាផ្ទះល្វែង គ្រាន់តែយើងអត់មានភ្លើងប្រើ យើងយ៉ាប់តែភ្លើងមួយមុខទេ»។

បច្ចុប្បន្ន លោក Chad Lehner មិនទាន់មានគម្រោងពង្រីកកសិដ្ឋានរបស់ខ្លួននោះទេ ប៉ុន្តែ លោកកំពុងតែស្វែងរកម៉ូយបន្ថែមទៀត នៅតាមហាងទំនើបៗ ភោជនីយដ្ឋាន និងសណ្ឋាគារនៅប្រទេសកម្ពុជា។ លោកបានសំណូមពរឲ្យពលរដ្ឋកម្ពុជា គាំទ្រផលិតផលធម្មជាតិ បើទោះបីជាមានតម្លៃខ្ពស់មែន តែវានឹងផ្តល់សុខភាពសម្រាប់អ្នកបរិភោគ និងជួយផ្តល់ការងារដល់ប្រជាជនកម្ពុជា ព្រមទាំងចូលរួមលើកស្ទួយផលិតផលក្នុងស្រុក៕