អន្តរជាតិ
×![]()
រដ្ឋាភិបាលចិន កំពុងសម្លឹងដាក់មូលដ្ឋានទ័ពបន្ថែមនៅបរទេស ហើយក្នុងចំណោមនោះ ប្រទេសក្នុងតំបន់អាស៊ីអាគ្នេយ៍ចំនួន៤ ស្ថិតជាគោលដៅរបស់យក្សអាស៊ីមួយនេះ។ នេះបើតាមរបាយការណ៍ប្រចាំឆ្នាំរបស់ក្រសួងការពារជាតិអាមេរិកផ្ញើទៅកាន់សភា ដែលបានចុះផ្សាយកាលពីដើមខែកញ្ញានេះ។ តាមរបាយការណ៍ដដែល គោលដៅគឺដើម្បីអនុញ្ញាតឲ្យកងទ័ពរំដោះប្រជាជនចិនពង្រឹងនិងរក្សាអំណាចយោធាខ្លួននៅក្រៅទឹកដី។ 
មីយ៉ាន់ម៉ា ថៃ សិង្ហបុរី និងឥណ្ឌូណេស៊ី ត្រូវបានជាប់ឈ្មោះក្នុងចំណោមប្រទេសមួយចំនួនផ្សេងទៀតដែលចិនកំពុងពិចារណាដាក់មូលដ្ឋានទ័ពរបស់ខ្លួន។ របាយការណ៍កម្រាស់់២០០ទំព័រ ក្រោមចំណងជើងថា «ការអភិវឌ្ឍសន្តិសុខនិងយោធាពាក់ព័ន្ធសាធារណរដ្ឋប្រជាមានិតចិនឆ្នាំ២០២០ (Military and Security Developments Involving the People’s Republic of China 2020)» បានសរសេរបែបនេះ ។
«លើសពីមូលដ្ឋានទ័ពបច្ចុប្បន្នរបស់ខ្លួនក្នុងប្រទេស ជីប៊ូទី សាធារណរដ្ឋប្រជាមានិតចិន (PRC) ទំនងជាពិចារណា និងរៀបចំផែនការរួចរាល់ហើយសម្រាប់មូលដ្ឋានទ័ពនៅបរទេសបន្ថែមទៀត ដើម្បីគាំទ្រកងទ័ពថ្មើរជើង ជើងអាកាស និងជើងទឹក»។ របាយការណ៍របស់ក្រសួងការពារអាមេរិក សរសេរបែបនេះ មុននឹងបញ្ជាក់ឈ្មោះប្រទេសទាំង៤ក្នុងតំបន់អាស៊ីអាគ្នេយ៍ខាងលើ។
ក្រៅពីប្រទេសទាំងបួនខាងលើនេះ របាយការណ៍ក៏បានរៀបរាប់ឈ្មោះប្រទេសមួយចំនួនទៀត ដែលជាប់ឈ្មោះក្នុងចំណោមប្រទេសដែលចិនសម្លឹងដាក់មូលដ្ឋានទ័ពខ្លួន រួមមាន ប៉ាគីស្ថាន ស្រីលង្កា អេមីរ៉ាតអារ៉ាប់រួម កេនយ៉ា សីស្ហែល តង់សានី អង់ហ្គោឡា និងតាហ្ស៊ីគីស្ថាន។
បន្ថែមពីនេះ របាយការណ៍ដែលមាន៦ជំពូកធំៗនេះ ក៏បានលើកឡើងពីករណីកម្ពុជាពាក់ព័ន្ធមូលដ្ឋានទ័ពសមុទ្ររាមផងដែរ។ របាយការណ៍សរសេរដូច្នេះថា៖«កម្ពុជាបានបដិសេធសំណើរបស់សហរដ្ឋអាមេរិកដើម្បីជួយជួសជុលអគារដែលអាមេរិកផ្ដល់ឲ្យ ក្នុងមូលដ្ឋានទ័ពសមុទ្ររាម។ ជំនួសមកវិញ កម្ពុជាប្រហែលទទួលយកជំនួយពីចិន ឬប្រទេសដទៃដើម្បីអភិវឌ្ឍមូលដ្ឋានទ័ពសមុទ្ររាម»។
យ៉ាងណាមិញ ទាំងចិន និងកម្ពុជា បានច្រាលចោលជាសាធារណៈករណីចុះហត្ថលេខាលើកិច្ចព្រមព្រៀងអនុញ្ញាតឲ្យកងទ័ពជើងទឹករបស់ចិនប្រើប្រាស់មូលដ្ឋានទ័ពជើងទឹកសមុទ្ររាមរបស់កម្ពុជា។ នេះបើតាមរបាយការណ៍របស់ក្រសួងការពារអាមេរិកដដែល៕
Tag:
សហរដ្ឋអាមេរិក
ចិន
ក្រសួងការពារជាតិ
យោធា
មូលដ្ឋានទ័ព
© រក្សាសិទ្ធិដោយ thmeythmey.com
