ដោយ៖ម៉ម ពិសី /RFI ខេមរភាសា
បណ្តាប្រទេសទាំងអស់នៃពិភពលោក បានសន្យាគ្នាថា នឹងស្វែងរកឲ្យបាននូវសន្ធិសញ្ញាអន្តរជាតិមួយ ដើម្បីកាត់បន្ថយការបំពុលបរិស្ថានដោយប្លាស្ទិក នៅរវាងចុងឆ្នាំ២០២៤នេះ។ តែការប្រជុំចរចាគ្នា ក្នុងក្របខណ្ឌអង្គការសហប្រជាជាតិ ដែលបានប្រព្រឹត្តិធ្វើទៅនៅទីក្រុងអូតាវ៉ា ប្រទេសកាណាសា បានបិទបញ្ចប់ទៅកាលពីថ្ងៃចន្ទ ទី២៩មេសា ដោយគ្មានបានលទ្ធផលអ្វីទាំងអស់។ ប្រទេសខ្លះបានបដិសេធ មិនព្រមកំណត់ការដាក់កំហិត កាត់បន្ថយការផលិតទំនិញប្លាស្ទិកទេ ដោយគាំទ្រតែទៅលើវិធានការពង្រីកសមត្ថភាពកែច្នៃសំរាម។
កិច្ចប្រជុំចរចា ស្តីពីខ្លឹមសារនៃអនាគតសន្ធិសញ្ញាអន្តរជាតិគ្រប់គ្រងការបំពុលដោយប្លាស្ទិក ដែលធ្វើឡើងក្នុងក្របខណ្ឌអង្គការសហប្រជាជាតិ នៅទីក្រុងអូតាវ៉ា បានបិទបញ្ចប់ទៅកាលពីថ្ងៃចន្ទទី២៩មេសា។ បើទោះបីជាក្រុមការងារចរចា បានព្យាយាមបន្ថែមម៉ោងប្រជុំដល់យប់ជ្រៅ តែលទ្ធផលគឺសូន្យដដែល។ គ្មានការត្រូវរ៉ូវគ្នាអ្វីទាំងអស់ ទាក់ទិននឹងការកាត់បន្ថយការផលិតទំនិញធ្វើពីប្លាស្ទិក។
សូមរំលឹកថា កាលពីឆ្នាំ២០២២ សហគមន៍អន្តរជាតិបានសន្យាគ្នា ថានឹងសម្រេចឲ្យបាននៅរវាងចុងឆ្នាំ២០២៤នេះ នូវសន្ធិសញ្ញាអន្តរជាតិមួយដែលមានកម្លាំងចាប់បង្ខំផ្លូវច្បាប់ ដើម្បីប្រយុទ្ធប្រឆាំងនឹងការបំពុលបរិស្ថានដោយ ប្លាស្ទិក។ ជាសន្ធិសញ្ញាដែលនឹងកំណត់ជារួម នូវ “វដ្តជីវិត” របស់ប្លាស្ទិក ដោយរាប់ចាប់ពីការផលិត រហូតដល់ការកែច្នៃកាកសំណល់ប្លាស្ទិក។
ក៏ប៉ុន្តែ ការប្រជុំចរចានៅអូតាវ៉ាបានបង្ហាញថាសហគមន៍អន្តរជាតិ នៅមានការខ្វែងគំនិតគ្នាច្រើនណាស់។ ក្រុមឡុបប៊ីការពារប្លាស្ទិក ដែលមានដូចជាសហគ្រាសឧស្សាហកម្ម និងប្រទេសផលិតប្រេងដូចជាអារ៉ាប៊ីសាអូឌីត ព្រមទាំងចិនផងនោះ បានបង្ហាញការជំទាស់ មិនចង់ឲ្យអនាគតសន្ធិសញ្ញានេះ កំណត់អំពីការកាត់បន្ថយទំហំផលិតប្លាស្ទិក ឬក៏ហាមឃាត់សារធាតុគីមីមួយចំនួននោះទេ។ ក្រុមប្រទេសទាំងនេះ លើកឡើងថាគួរតែគិតគូរ តែពីការបង្កើនសមត្ថភាពនៃការការច្នៃកាកសំណល់ប្លាស្ទិកទៅ គឺវាគ្រប់គ្រាន់ហើយ។
យ៉ាងណាក៏ដោយ បើទោះជាការប្រជុំនៅអូតាវ៉ាបានបិទបញ្ចប់ដោយគ្មានលទ្ធផល តែប្រទេសទាំងអស់ បានស្រុះស្រួលគ្នា បង្កើតក្រុមការងារបច្ចេកទេស ឲ្យបានមុនការចាប់ផ្តើមចរចាដំណាក់កាលថ្មី ដែលគ្រោងធ្វើនៅទីក្រុងប៊ូសាន កូរ៉េខាងត្បូង នៅថ្ងៃទី២៥វិច្ឆិកា។ ក្រុមការងារបច្ចេកទេសនេះ នឹងពិនិត្យវិភាគកំណត់ឈ្មោះសារធាតុគីមីមួយចំនួន ដែលគេប្រើនៅក្នុងផលិតផលប្លាស្ទិក ហើយដែលអាចបង្កគ្រោះថ្នាក់។ ក្រៅពីនេះ គេនឹងពិនិត្យមើលដែរ អំពីគំនិតថ្មីៗ ទាក់ទិននឹងសំបកវេចខ្ចប់ធ្វើពីប្លាស្ទិក ព្រមទាំងថវិកាជួយប្រយុទ្ធប្រឆាំងនឹងសំរាមប្លាស្ទិកក្នុងបរិស្ថាន។
យ៉ាងហោចណាស់ មានប្រទេស៥០ដែលបានបង្ហាញជំហរគាំទ្រគំនិតស្នើដោយរវ៉ាន់ដា និងប៉េរូ ដែលចង់ឲ្យមានការវិភាគស៊ីជំរៅ ពីនេះដល់ខែវិច្ឆិកា ស្តីពីកម្រិតនិរន្តរភាពនៃការផលិតទំនិញប្លាស្ទិក។ តាមការប៉ាន់ស្មាន នៅរវាងឆ្នាំ២០៥០ ផលិតផលប្លាស្ទិកនឹងកើនទំហំ ១គុណជា៣។ យោងតាមលោកស្រី Juliet Kabera តំណាងក្រុមចរចារវ៉ាន់ដា គឺទំហំផលិតដ៏ច្រើនមហិមានេះ វាគ្មាននិរន្តរភាពទេ ព្រោះថាប្លាស្ទិកដែលផលិតថ្មី វាច្រើនលើសខ្លាំងពេក បើប្រៀបទៅសមត្ថភាពនៃការកែច្នៃ និងការគ្រប់គ្រងសំរាមប្លាស្ទិក។
គួរបញ្ជាក់ដែរថា មានប្រទេស២៨ដែលយល់ស្របគ្នា រក្សាទុកចំណុចស្តីពី ការគ្រប់គ្រងទំហំផលិតទំនិញប្លាស្ទិក ដើម្បីយកទៅជជែកគ្នាបន្តទៀត នៅក្នុងការប្រជុំចរចាខាងមុខ។ លោក Christophe Béchu រដ្ឋមន្ត្រីបារាំងទទួលបន្ទុកអន្តរកម្មថាមពល បានលើកឡើងថា របាយការណ៍វិទ្យាសាស្ត្របានបង្ហាញច្បាស់ៗហើយ ថាប្រសិនបើយើងចង់ប្រយុទ្ធប្រឆាំងនឹងការបំពុលបរិស្ថានដោយកាកសំណល់ប្លាស្ទិក គឺយើងត្រូវតែចាប់ផ្តើម ពីការចាត់វិធានការកាត់បន្ថយទំហំនៃការផលិតផលិតផលប្លាស្ទិក នៅទូទាំងពិភពលោក។
ដោយឡែក លោក Yang Xiaoling តំណាងក្រុមចរចាចិន បានប្រកាន់គោលជំហរថា ប្រទេសទាំងអស់គួរណាតែ ផ្តោតការជជែកគ្នា តែទៅលើបញ្ហាណាដែលមិនចោទជាជម្លោះ ឬការខ្វែងគំនិតគ្នា តួយ៉ាងដូចជា ទៅលើវិស័យបច្ចេកទេសដុតរំលាយសារធាតុប្លាស្ទិក ដើម្បីឲ្យប្រើវត្ថុធាតុដើមប្លាស្ទិកតិចបំផុត ឬក៏ដើម្បីឲ្យងាយយកវាទៅកែច្នៃប្រើប្រាស់ឡើងវិញ៕