សង្គមអន្តរជាតិ
អន្តរជាតិ
ឆ្នាំ២០១៥ សហរដ្ឋអាមេរិក មានមហាសេដ្ឋីច្រើនជាងគេនៅលើពិភពលោក
×
គិតមកដល់ដើមឆ្នាំ ២០១៥ នេះ ចំនួនមហាសេដ្ឋីនៅលើពិភពលោក ដែលមានប្រាក់ចាប់ពីរាប់ពាន់លានដុល្លារឡើងទៅនោះ គឺមានកើនឡើងដល់ ២០៨៩ នាក់ហើយ។ ក្នុងនោះប្រទេសឥណ្ឌា បានសាងប្រវត្តិសាស្ត្រលើកដំបូងរបស់ខ្លួន ដែលមានចំនួនមហាសេដ្ឋីច្រើនជាង អង់គ្លេស និងរុស្ស៊ី។ នេះបើយោងតាមស្ថិតិពី Hurun Global Rich List 2015 ។
ទិន្នន័យខាងលើក៏បានបង្ហាញថា ក្នុងឆ្នាំ២០១៥ នេះ ចំនួនមាហសេដ្ឋីពាន់លាន បានកើនឡើងចំនួន ២២២ នាក់បន្ថែមទៀត ដែលភាគច្រើននៃមហាសេដ្ឋីថ្មីៗទាំងនោះ គឺជាជនជាតិចិន។ បច្ចុប្បន្នមហាសេដ្ឋីទាំងជាង ២ ពាន់នាក់នោះ គឺជាប្រជាជនរបស់ប្រទេសចំនួន ៦៨ ដែលមានប្រទេសខ្លះ មានមហាសេដ្ឋីតែម្នាក់គត់។
បើតាមបញ្ជីរបស់ Hurun Global Rich List សហរដ្ឋអាមេរិក គឺជាទឹកដីដែលសំបូរទៅដោយមហាសេដ្ឋីច្រើនជាងគេបំផុត ដែលមានចំនួនរហូតដល់ទៅ ៥៣៧ នាក់ ខណៈពេលដែលប្រទេសចិនបានស្ថិតនៅចំណាត់ថ្នាក់បន្ទាប់នេះ ដោយមានចំនួនមហាសេដ្ឋីទាំងចាស់និងថ្មីសរុបចំនួន ៤៣០ នាក់។
ស្ថិតិដដែលក៏បានឲ្យដឹងថា ទីក្រុងញូវយ៉ក មានមហាសេដ្ឋីច្រើនជាងគេ រហូតដល់ ៩១ នាក់ ហើយលោក Bill Gates ស្ថាបនិក Microsoft នៅតែជាមហាសេដ្ឋីទីមួយ នៅលើពិភពលោកដោយទ្រព្យសម្បត្តិសរុបរបស់លោក បានកើនឡើងដល់ ៨៥ ពាន់លានដុល្លារ ៕
© រក្សាសិទ្ធិដោយ thmeythmey.com