ជាតិ
តើអ្នកគិតយ៉ាងណាចំពោះបុណ្យនៃសេចក្ដីស្រលាញ់?
× មកដល់ពេលនេះ អត្ថន័យនិងប្រតិកម្មចំពោះបុណ្យនៃសេចក្ដីស្រលាញ់(Valentine Day) ត្រូវបានគេយល់ដឹងនិងមើលឃើញស្ទើរតែគ្រប់គ្នាក្នុងសង្គមខ្មែរ។ ប្រតិកម្ម ឬការឆ្លើយតបខ្លះ មានលក្ខណៈគួរឱ្យសរសើរ ឯប្រតិកម្ម ឬការឆ្លើយតបខ្លះទៀត មានលក្ខណៈមិនសមស្របដែលហាក់ដូចជាបង្ហាញឱ្យថាមានការភ័យស្លន់ស្លោជ្រុលពេកចំពោះឥទ្ធិពលនៃបុណ្យ Valentine Day។
ឆ្លងតាមរយៈនៃការសង្កេត យើងបានមើលថា ប្រតិកម្មចំពោះ Valentine Day នេះ មានទាំងកម្រិតបុគ្គល កម្រិតស្ថាប័ន និងកម្រិតផ្សេងៗទៀត។ យុវវ័យមួយចំនួន ជាពិសេស យុវវ័យដែលមានសេរីភាពច្រើននិងរស់នៅទីក្រុង បានទទួលយកឥទ្ធិពលនៃបុណ្យនេះ ព្រមទាំងហ៊ានអះអាងដោយភាន់ច្រលំថា បុណ្យនេះគឺប្រពៃណីខ្មែរទៀតផង ឯយុវជនខ្លះទៀតមិនខ្វល់ថា បុណ្យនេះមានប្រភពមកពីណាទេ ពួកគេគ្រាន់តែដឹងថា ក្នុងឱកាសនេះ គេអាចបង្កការសប្បាយតាមរយៈការទិញផ្កាជូនសង្សា ឬមិត្តស្រី/មិត្តប្រុស ឬក៏នាំសង្សារបស់ពួកគេទៅកម្សាន្តតាមកន្លែងកម្សាន្តផ្សេងៗ ហើយក្នុងករណីខ្លះទៀតក៏ធ្លាប់មានការលើកឡើងថា ពួកយុវជនបានយកឱកាសនេះ ដើម្បីចាប់ផ្ដើមប្រគល់ខ្លួនប្រាណជាលើកដំបូង ឬលើកបន្តបន្ទាប់ជូនសង្សារបស់ពួកគេផងដែរ។
ចំពោះមជ្ឍដ្ឋានអ្នកអភិរក្សវិញ បានលើកឡើងថា មិនគួរអនុញ្ញាតឱ្យបុណ្យនេះមានឥទ្ធិពលមកលើសង្គមខ្មែរទេ ពីព្រោះនាំឱ្យប៉ះពាល់ដល់វប្បធម៌និងទំនៀមទម្លាប់របស់ខ្មែរ។ ស្របនឹងគំនិតនេះនិងក្នុងក្នុងបំណងចង់ធ្វើអន្តរាគមន៍ទប់ស្កាត់ Valentine Day យើងក៏បានឃើញក្រសួងខ្លះ អំពាវនាវឱ្យយកឱកាសនេះ ទៅធ្វើជាថ្ងៃនេះបុណ្យរំលឹកគុណឪពុកម្ដាយ អ្នកមានគុណ ឬលោកគ្រូ អ្នកគ្រូទៅវិញ។ ការបង្វែរថ្ងៃ Valentine Day នេះទៅជាថ្ងៃសម្រាប់ការធ្វើសកម្មភាពផ្សេងៗបែបវិជ្ជមាន ស្ដាប់ទៅហាក់ដូចជាគួរឱ្យសរសើរដែរ ប៉ុន្តែ បើយើងពិចារណាឱ្យវែងឆ្ងាយបន្តិចទៅ យើងអាចមើលឃើញថា ការធ្វើបែបនេះ ហាក់ដូចជា ដូនតារបស់យើងមិនចេះធ្វើអ្វីសោះ សូម្បីតែពិធីបុណ្យក៏មិនចេះបង្កើតដែរ រង់ចាំតែបង្វែរថ្ងៃបុណ្យរបស់បរទេសទៅជាថ្ងៃបុណ្យរបស់ខ្លួនតែប៉ុណ្ណោះ ដែលបង្ហាញឱ្យឃើញថា ខ្មែរគ្មានការបង្កើតថ្មី គ្មានការស្រាវជ្រាវ គ្មានរបបកគំហើញ គ្មានផែនការអភិវឌ្ឍន៍សង្គម គ្មានគំនិតច្នៃប្រឌិត គ្មានទស្សនវិជ្ជា ហើយគ្រាន់តែជាអ្នកចម្លងអ្វីៗពីគេដោយគ្រាន់តែយកមកកែសម្រួលបន្តិចបន្តួច។
យើងយល់ថា ខ្មែរបច្ចុប្បន្នមិនគួរធ្វើបែបនេះទេ ខ្មែរគួរបង្កើតថ្ងៃបុណ្យដោយខ្លួនឯង ខ្មែរគួរតែមានគ្រឹះវប្បធម៌ផ្ទាល់ខ្លួន ដូចដែលដូនតារបស់យើងបានបន្សល់ទុកមកដូច្នោះដែរ។ ខ្មែរគួរតែឱ្យតម្លៃទិវាបុណ្យរបស់ខ្មែរ ហើយប្រសិនបើមានតម្រូវការចាំបាច់ ខ្មែរគួរតែបង្កើតទិវាបុណ្យថ្មីៗទៀតដែលអាចបំពេញតម្រូវការរបស់ខ្លួន ប៉ុន្តែ មិនគួរអង្គុយរង់ចាំតែចម្លងទិវាបុណ្យរបស់បរទេសនោះទេ។
ការចង់ទប់ស្កាត់ឥទ្ធិពលនៃវប្បធម៌បរទេស គឺជារឿងដែលគួរធ្វើ ប៉ុន្តែ ការប្រតិបត្តជាក់ស្ដែង ពិតជាជួបការលំបាក ទាំងក្នុងក្របខណ្ឌច្បាប់ សីលធម៌ សិទ្ធិមនុស្ស និងបរិបទសាកលភាវូបនីយកម្ម។ ហេតុផលមួយក្នុងចំណោមហេតុផលនានា គឺការទប់ស្កាត់កុំឱ្យយុវវ័យឆាប់ចូលប្រឡូកក្នុងការរួមភេទ ប៉ុន្តែ ទំនាក់ស្នេហានិងការរួមភេទគឺសភាវគតិ និងជាតម្រូវការបែបធម្មជាតិ ដែលពិបាកនឹងរារាំងណាស់ បើទោះបីជាគ្មានថ្ងៃ Valentine Day ក៏វានៅតែកើតឡើងដែរ។
លើសពីនេះទៀត មានក្រុមហ៊ុន សាលារៀន សាកលវិទ្យាល័យ ស្ថានប័នឯកជន និងសង្គមស៊ីវិលមួយចំនួន រួមទាំងប្រព័ន្ធផ្សព្វផ្សាយ មានវទ្យុ ទូរទស្ស្សន៍ ជាដើម ដោយចង់បង្កភាពសប្បាយរីករាយដល់សិស្ស និស្សិត កម្មករ បុគ្គលិករបស់ខ្លួន និងក្នុងបំណងទាក់ទាញការចាប់អារម្មណ៍មកលើសេវាកម្ម ទំនិញ ការផ្សព្វផ្សាយ និងស្ថាប័នរបស់ខ្លួន ពួកគេក៏បានអបអរសាទរពិធីបុណ្យ Valentine Day នេះដែរ។ កត្តានេះហើយដែលធ្វើឱ្យពិធីបុណ្យ Valentine Dayនិងបុណ្យបរទេសផ្សេងៗទៀតកំពុងតែមានឥទ្ធិពលមកលើសង្គមខ្មែរជាបន្តបន្ទាប់។
យើងយល់ថា ស្ថាប័នរដ្ឋមិនគួរព្យាយាមបង្វែរទិវា Valentine Day ទៅជាទិវាអ្វីផ្សេងទេ ផ្ទុយទៅវិញស្ថាប័ននេះគួរអំពាវនាវកុំឱ្យប្រព័ន្ធផ្សព្វផ្សាយជួយផ្សព្វផ្សាយ បង្កើតក្មវិធី ឬនិយាយទាក់ទងដល់ពិធីបុណ្យ Valentine Day និងបុណ្យបរទេសផ្សេងៗទៀត ដែលជាហេតុចំបងក្នុងការធ្វើឱ្យរាលដាលនូវឥទ្ធិពលនៃវប្បធម៌បរទេស។ លើសពីនេះទៀត ប្រជាជនខ្មែរខ្លួនឯងត្រូវតែស្គាល់វប្បធម៌របស់ខ្លួន ស្រឡាញ់វប្បធម៌របស់ខ្លួន និងជួយណែនាំកូនចៅរបស់ខ្លួនកុំឱ្យភ្លឺតភ្លឺននឹងវប្បធម៌បរទេស។
© រក្សាសិទ្ធិដោយ thmeythmey.com