ជាតិ
សង្គមជាតិ
ឪពុកម្តាយលោក ថោង សារ៉ាត់ ស្នើដាក់បុរីមួយកន្លែងដើម្បីសុំធានាខ្លួននៅក្រៅឃុំ
×
ភ្នំពេញ៖ បន្ទាប់ពីតុលាការបង្គាប់ឲ្យនៅក្នុងពន្ធនាគារវិញ អស់រយៈជាង ២សប្តាហ៍រួចមក នៅថ្ងៃទី២៤ កុម្ភៈ កន្លងមក ឪពុកម្តាយរបស់ឧកញ៉ា ថោង សារ៉ាត់ បានជួបជាមួយមេធាវី ហើយពួកគេបានស្នើឲ្យមេធាវីដាក់បុរី ៩៩៩ មួយកន្លែង ដើម្បីធានាខ្លួននៅក្រៅឃុំបណ្តោះ អាសន្ន។
មេធាវី លោក ម៉ន កែវស៊ីវិន បានប្រាប់សារព័ត៌មានថ្មីៗថា លោកបានទៅជួបពិភាក្សា ជាមួយកូនក្តីលោក នៅក្នុងពន្ធនាគារព្រៃស កាលពីរសៀលថ្ងៃទី២៤ ខែកុម្ភៈ។ ក្នុងជំនួបចង់ដឹងពី ស្ថានភាពសុខភាពកូនក្តី ក្រោមការត្រួតពិនិត្យពីមន្ត្រីពន្ធនាគារនោះ មេធាវីរូបនេះ បានឲ្យដឹង ថា កូនក្តីលោក គឺ លោក ថោង ចំរើន និងអ្នកស្រី កែវ សារី បានស្នើសុំឲ្យលោកដាក់បុរី ៩៩៩ ណាមួយក៏បាន ដើម្បីធានាពួកគេឲ្យនៅក្រៅឃុំបណ្តោះអាសន្ន។
ឪពុកម្តាយលោក ថោង សារ៉ាត់ ដែលមេធាវីអះអាងកំពុងធ្លាក់ខ្លួនឈឺ និងពុំទទួលបានការ ថែទាំសុខភាពត្រឹមត្រូវពីពេទ្យក្នុងពន្ទនាគារនោះ បានប្រាប់តាមរយៈមេធាវីយ៉ាងដូច្នេះថា៖« ខ្ញុំសុំឲ្យលោកជួយយកបុរី ៩៩៩ ចាក់អង្រែក្រោម ឬ មួយក៏បុរីនៅដំបូលខ្ពស់ ដាក់ឲ្យតុលាការ ធានាខ្ញុំនៅក្រៅឃុំបណ្តោះអាសន្នផង»។
បើតាមការបញ្ជាក់របស់មេធាវី លោក ថោង ចំរើន បាននិយាយភាសាខ្មែរមិនសូវច្បាស់ស្នើសុំឲ្យជួយយ៉ាងដូច្នេះថា៖«ទោះបីជាយកបុរី ៩៩៩ មួយក៏ដោយ ឲ្យតែខ្ញុំបាននៅក្រៅឃុំ ដើម្បីខ្ញុំអាចចេញទៅព្យាបាលសុខភាព»។
ប៉ុន្តែ ទោះបីជា បុរី ៩៩៩ ដែលមានតម្លៃមិនក្រោម ១លានដុល្លារអាមេរិកក៏ដោយ ក៏មេធាវី គ្មានសង្ឃឹមថា តុលាការនឹងអនុញ្ញាតឲ្យនៅក្រៅឃុំ ជាលើកទីពីរនោះឡើយ។ លោកសង្ងត់ ធ្ងន់ថា៖«ខ្ញុំមិនសង្ឃឹមទេថាអាចនៅក្រៅឃុំ ទោះបឹ្តងដល់តុលាការកំពូលក៏ដោយ ប្រសិនបើតុលាការមិនឯករាជ្យ។ ចៅក្រមខ្លាចនាយករដ្ឋមន្ត្រី ខ្លាចបាត់បង់មុខតំណែងនោះ»។
គួរបញ្ជាក់ថា ការសម្រេចដោះលែងឪពុកម្តាយ លោក ថោង សារ៉ាត់ នៅក្រៅឃុំបណ្តោះ អាសន្ន កាលពីថ្ងៃទី៧ កុម្ភៈកន្លងមក កំពុងស្ថិតក្រោមការធ្វើអធិការកិច្ចរបស់ក្រសួងយុត្តិធម៌ និងឧត្តមក្រុមប្រឹក្សានៃអង្គចៅក្រមនៅឡើយ បន្ទាប់ពីមានការស្នើសុំរបស់លោកនាយករដ្ឋមន្ត្រី ហ៊ុន សែន។
នៅក្នុងពិធីចែកសញ្ញាបត្រ នៅថ្ងៃទី១៧ កុម្ភៈ លោកនាយករដ្ឋមន្ត្រី ហ៊ុន សែន បានប្រតិកម្មយ៉ាងខ្លាំងជុំវិញការដោះលែងនេះ។ លោកសង្ស័យថា ការដោះលែងនេះ អាចពាក់ព័ន្ធនឹងអំពើពុករលួយ ដោយលោកបានស្នើដល់ក្រសួងយុត្តិធម៌ និងឧត្តមក្រុមប្រឹក្សានៃអង្គចៅក្រម ចុះធ្វើអធិការកិច្ចលើការសម្រេចដោះលែងឲ្យស្ថិតនៅបណ្តោះអាសន្ននោះ។
សូមបញ្ជាក់ដែរថា លោក ថោង ចំរើន និង អ្នកស្រី កែវ សារី ត្រូវជាប់ចោទពី បទកាន់កាប់ និងរក្សាអាវុធដោយគ្មានការអនុញ្ញាត តាមមាត្រា ៤៩០ នៃក្រមព្រហ្មទណ្ឌ។ បច្ចុប្បន្ននេះ អ្នកទាំងពីរ កំពុងជាប់ឃុំខ្លួនបណ្តោះអាសន្នក្នុងពន្ធនាគារព្រៃសដដែល៕
© រក្សាសិទ្ធិដោយ thmeythmey.com