ជាតិ
រូបត្លុក
×![]()
ក្នុងដែនដីដ៏ធំល្វឹងល្វើយ និងសម្បូរហូរហៀរទៅដោយសម្បតិ្តធម្មជាតិ ដ៏ច្រើនក្រាស់ក្រែលមួយ ដែលស្ថិតក្នុងចុងបូព៌ាទិសនៃផែនដី ជាទីចាប់ចិត្តនៃពពួកសត្វទាំងឡាយ ទាំងទីជិតឆ្ងាយចាប់ចិត្តប្រតិពត្តិមួយ។
ចំណេរតមក ដែនដីដ៏ធំល្វឹងល្វើយនេះ ចេះតែបាត់បង់ រួមតូចបន្តិចម្តងៗ ទីបំផុត នៅសល់តែមួយចុងចង្កឹះចិន មកដល់សព្វថ្ងៃនេះ ហើយក៏ត្រូវបានធ្លាក់ទៅលើកូនចៅជំនាន់ក្រោយនៃត្រកូលមាន់ចែ ជាអ្នកស្នងមរតកដ៏មហាសាលជិតរលាយអស់នេះ។
ថ្វីត្បិតតែតូច ប៉ុន្តែខ្លឹម បានធ្វើឲ្យសព្វសត្វ ដែលរស់នៅក្បែរខាង និងនៅទីឆ្ងាយ ដូចជាសត្វខ្លា ចចក ឆ្កែព្រៃ ត្មាតជាដើម មានចិត្តប្រតិព័ទ្ធ ព្រមទាំងបានប្រើគ្រប់ឧបាយ សាបព្រួសមនោគមក្នុងសណ្តាន និង បានលាបពណ៌មាន់ម្ចាស់ស្រុក ដែលជាពូជមាន់ចម្បាំងស្រាប់ផង ចេញជាពណ៌ស និង ខ្មៅ ប្រយុទ្ធគ្នាយ៉ាងអង់អាច។
សម័យថ្ងៃមួយ នៃរដូវសម្បូរត្រី មាន់ខ្មៅ និងមាន់ស សុទ្ធតែមានគំនិតរៀងៗខ្លូន បានដាក់ចេញនូវយុទ្ធសាស្ត្រមួយ ដើម្បីប្រមូលផលត្រីពីទន្លេឲ្យអស់លទ្ធភាព ដែលខ្លួនអាចធ្វើទៅបាន ដើម្បីជាប្រយោជន៍ដល់ប្រជាជនមាន់ទូទៅក្នុងដែនដី។
មាន់ចែខ្មៅ៖ យើងនឹងបង្កើតស្ថានីយ៍ឆក់ត្រីឲ្យបានច្រើន នៅតាមដងទន្លេធំៗទាំងឡាយ ក្នុងមួយថ្ងៃ យើងប្រតិបត្តិការឆក់ត្រីមួយដង ត្រីនឹងហូរទៅតាមទឹកទៅដល់ដៃប្រជាជនមាន់ ដែលរស់នៅតាមដងទន្លេ រើសយកទៅធ្វើម្ហូបបានគ្រប់ៗគ្នា ដោយងាយ។
គ្រាន់តែបានឮពាក្យនេះភ្លាម ប្រជាជនមាន់ ដែលគ្រាំទ្រមាន់ខ្មៅ ក៏ស្រែកបន្ទរ ជយោ!!! អបអរគំនិតរបស់មេដឹកនាំគេភ្លាម និងព្រមទាំងពោលបន្តថា៖ នេះពិតជាគំនិតប្រកបដោយគតិបណ្ឌិតដ៏ល្អមែន... ដាច់ខាត!។
ពេលនោះ មាន់ស ក៏តាំងចេញមកប្រឆាំងយ៉ាងដាច់អហង្ការនឹងគំនិតរបស់មាន់ខ្មៅភ្លាមៗដែរ។ មាន់សក៏ពោល និងពេបជ្រាយគំនិតមាន់ខ្មៅឡើងថា៖ គំនិតមាន់ខ្មៅនេះ ពិតជាអន់ខ្លាំងណាស់ គំនិតសំរ៉ែ ល្ងិតល្ងង់ អវិជ្ជាជាដើម។ល។ ត្មះដៀលចប់ មាន់សបន្តទៀតថា៖ ជាយុទ្ធសាស្ត្រ ដើម្បីចាប់ត្រីឲ្យបានច្រើនជាអតិប្បរិមា យើងត្រូវតែលើកទំបន់ទប់ទន្លេ ម្តងមួយកង់ៗ ហើយបាចទឹកចេញចាប់ត្រីឲ្យអស់ រួចទម្លាយទំនប់ចាស់ ទៅទប់កន្លែងថ្មីទៀត នោះចំនួនត្រីដែលមានក្នុងទន្លេទាំងប៉ុន្មាន យើងអាចចាប់បានទាំងអស់ ចែកជូនប្រជាជនមាន់បានហូបហូរហៀរគ្រប់ៗគ្នា ហើយថែមទាំងអាចស្តារទន្លេបានទៀតផង មិនល្អទេឬ?!។
មាន់សពោលចប់ សំឡេងសាទរអបអរពីសំណាក់អ្នកគាំទ្រ ក៏ស្រែកបន្ទរ ជយោ!!! អបអរគំនិតរបស់មេដឹកនាំគេភ្លាម និងព្រមទាំងពោលបន្តថា៖ នេះពិតជាគំនិតប្រកបដោយគតិបណ្ឌិតដ៏ល្អមែន... ដាច់ខាត!។
ក្រោយពីបានលើកយុទ្ធសាស្ត្រឡើងរៀងៗខ្លួនមក មាន់ខ្មៅ និង មាន់ស ចាប់ផ្តើមប្រកាប់ប្រចាក់គ្នា អ្នកគាំទ្រប្រវ៉ាយប្រតប់នឹងអ្នកគាំទ្រទៅ ដោយទុកគំនិតប្រមូលផលមួយអន្លើ គិតតែពីប្រកែកប្រណាំង រកតែឈ្នះ រកតែល្អរៀងៗខ្លួន និងរកចំណុចប្រសព្វគ្នាមិនឃើញ រដូវសម្បូរត្រី ក៏កន្លងផុត ត្រីទាំងធំទាំងតូច ខ្លះហែលទៅខ្សែទឹកខាងលើ ខ្លះក៏ហូរចុះទៅតាមខ្សែទឹកខាងក្រោមអស់ទៅ ធ្វើឲ្យសព្វសត្វដែលរស់នៅក្បែរខាង និងនៅទីជិតឆ្ងាយ របស់មាន់ស និងខ្មៅ សប្បាយរីករាយយ៉ាងក្រៃលែង នឹងទទួលផលត្រីដ៏ច្រើនសន្ធឹកសន្ធាប់ ពីការខ្វែងគំនិតគ្នានៃពូជមាន់ចម្បាំងយ៉ាងខ្លាំង៕
© រក្សាសិទ្ធិដោយ thmeythmey.com
