កីឡាជាតិ
តើស្តាតចាស់អាចធ្វើជាម្ចាស់ផ្ទះជម្រុះ World Cup បានដែរឬទេ? រង់ចាំការសម្រេចនៅម៉ោង៤ល្ងាចនេះ
×![]()
ព័ត៌មានចចាមអារ៉ាមជាច្រើនសឹងតែផ្ដោតទៅលើកីឡដ្ឋានកងយោធពលខេមរភូមិន្ទ (ស្ដាតចាស់) ថានឹងទទួលសិទ្ធិធ្វើម្ចាស់ផ្ទះរវាងក្រុមជម្រើសជាតិកម្ពុជាជាមួយក្រុមកោះម៉ាកាវក្នុងវគ្គជម្រុះជើងទី១FIFA World Cup 2018 ជុំដំបូងប្រចាំទ្វីបអាស៊ីនៅថ្ងៃទី ១២ ខែ មីនាខាងមុខនេះ។
ប៉ុន្ដែធាតុពិតសហព័ន្ធកីឡាបាល់ទាត់កម្ពុជាបានបញ្ជូនពាក្យស្នើសុំទៅកាន់សហព័ន្ធកីឡាបាល់ទាត់ទ្វីបអាស៊ីដោយដាក់ជម្រើស ២ក្នុងការធ្វើជាម្ចាស់ផ្ទះនៅវគ្គជើងដំបូងនេះមានស្ដាតចាស់ និងកីឡដ្ឋានខេត្តស្វាយរៀង។
បើតាមប្រភពពីសហព័ន្ធកីឡាបាល់ទាត់កម្ពុជា(FFC) បានឱ្យដឹងថាមន្ត្រីបច្ចេកទេសរបស់ខ្លួនបានចុះត្រួតពិនិត្យទីលានស្ដាតចាស់ម្ដងរួចទៅហើយកាលពីថ្ងៃច័ន្ទហើយនៅវេលាម៉ោង ៤ល្ងាចថ្ងៃពុធ ទី ៥ មីនានេះនឹងចុះទៅពិនិត្យជាលើកទី២ដើម្បីឱ្យច្បាស់ថាកីឡដ្ឋានកណ្ដាលរាជធានីមួយនេះអាចធ្វើជាម្ចាស់ផ្ទះតំណាងឱ្យជាតិបានឬអត់។
ស្ដាតចាស់ជាទីលានហ្វឹកហាត់របស់ក្លិបបាល់ទាត់ក្រសួងការពារជាតិដែលកំពុងកែលម្អដើម្បីធ្វើម្ចាស់ផ្ទះ(Home/Away) ក្នុងលីកកំពូលកម្ពុជា (Metfone Cambodian League) ក្នុងឆ្នាំ២០១៥ នេះ។ ថ្នាក់ដឹកនាំក្លិបព្រមទាំងលោកគ្រូបង្វឹកទេព ឡុងរចនា និងកីឡាករទាំងអស់សុទ្ធតែមានចេតនាចង់ឱ្យស្ដាតរបស់ខ្លួនទទួលព្រឹត្តិការណ៍នេះខ្លាំងណាស់ដោយនាំគ្នារៀបចំបោសសំអាតបន្ទប់ទឹក បន្ទប់ផ្លាស់សំលៀកបំពាក់ក្រុមទាំង២ និង អាជ្ញាកណ្ដាល, បន្ទប់មន្ត្រីធ្វើការ, សំអាតបរិវេណជុំវិញទីលានប្រកួត, លាបថ្នាំកៅអីអង្គុយទស្សនាជាដើម។
ប្រភពមកពីថ្នាក់ដឹកនាំក្រុមជម្រើសជាតិសុំមិនបញ្ហាអត្តសញ្ញាណបានឱ្យដឹងថាស្ដាតចាស់មានភាគរយច្រើនលើសលប់បើធៀបទៅនឹងកីឡដ្ឋានខេត្តស្វាយរៀងព្រោះមានចំណុចវិជ្ជមានជាច្រើនចំពោះទទួលការប្រកួតជាលក្ខណៈអន្តរជាតិមួយនេះ។
នេះមិនមែនជារឿងថ្មីសម្រាប់ស្ដាតចាស់ទេដែលធ្វើម្ចាស់ផ្ទះជម្រុះពានរង្វាន់លំដាប់ពិភពលោកមួយនេះដោយមហាជនជាច្រើននៅចាំបានថាកាលពី FIFA World Cup 2002 ដែលប្រទេសកូរ៉េខាងត្បូងនិង ជប៉ុន ធ្វើជាម្ចាស់ផ្ទះកម្ពុជាបានយកកីឡដ្ឋាននេះធ្វើនៅវគ្គជម្រុះក្នុងពូល៩ ប្រចាំទ្វីប អាស៊ីផងដែរតែចាញ់ក្រុមភ្ញៀវ ចិន៤ ទល់ ០ និង ចាញ់ ឥណ្ឌូណេស៊ី ២ ទល់ ០ ។
វគ្គជម្រុះដំបូងប្រចាំទ្វីបមាន៥គូផ្សេងទៀតដែលជាប្រទេសមានចំណាត់ថ្នាក់ទាបជាងគេក្នុងចំណាត់ថ្នាក់ FIFA កាលពីខែមករាកន្លងទៅជើងទី១ ថ្ងៃទី ១២ ខែ មីនាមាន៖
– ឥណ្ឌា Vs នេប៉ាល
– យេមែន Vs ប៉ាគីស្ថាន
– ទីម័រខាងកើត Vs ម៉ុងហ្គោលី
– ចិនតៃវ៉ាន Vs ប្រ៊ុយណេ
– ស្រីលង្កា Vs ប៊ូតាន់
© រក្សាសិទ្ធិដោយ thmeythmey.com
