ពិភពតារា៖ សុវណ្ណ លីនដា លុយកាក់បានពីសិល្បៈ យកមកធ្វើអ្វីធំដុំមិនបានទេ
×
ភ្នំពេញ៖តារាសម្តែង និងម៉ូដែលរបស់ក្រុម sun super modelនាង សុវណ្ណ លីនដា បាននិយាយថា លុយកាក់បានពីការថតអត់យកមកធ្វើអីធំដុំបានទេ គឺគ្រាន់តែសម្រាប់ការតុបតែងខ្លួន និងទិញសម្លៀកបំពាក់ទៅវិញ ស្ទើរមិនគ្រប់ផង។
សុវណ្ណ លីនដា មានស្រុកកំណើតនៅភ្នំពេញនាងបានហក់ចូលប្រឡូកសិល្បៈនៅឆ្នាំ ២០០៩ តាមរយៈការដើរម៉ូដក្នុងក្រុមsun super model និងបានបង្ហាញវត្តមានដំបូងក្នុងរឿង “រាមតេជោយ៉ត” ជាតួអង្គចរិតប្រុស កាប់ដាវ និងវាយតប់។ បន្តបន្ទាប់មកទៀត ដូចជារឿង “ចន្ទចាកវេហា” , “ឧត្តមដួងចិត្ត”, “អច្ឆរិយស្នេហ៍” , “ពេជ្រក្នុងបេះដូង” , “ចង្រិតដែក ស្លាបមាស” សម្តែងជាតួឯក និង រឿង “ផ្ការីកក្នុងចិត្ត” ។
សុវណ្ណ លីនដាជាកូនច្បងក្នុងគ្រួសារ មានបងប្អូនស្រីពីរនាក់ នាងជាកូនច្បង និងមានឪពុកជាមន្ត្រីយោធាឈរជើងនៅព្រំដែនព្រះវិហារ ចំណែកម្តាយជាមេផ្ទះ។នាងជាអតីតសិស្ស វិទ្យាល័យទួលទំពូង ឈប់រៀនត្រឹមថ្នាក់ទី១២។
សុវណ្ណ លីនដា ដែលទៅណាមកណាតែងសណ្តោងម្តាយទៅជាមួយផងនោះ និយាយថាក្រោយពេលខ្ញុំប្រឡូកសិល្បៈ ទើបខ្ញុំដឹងថា លុយកាក់បានពីការថតអត់យកមកធ្វើអីធំដុំបានទេ គឺគ្រាន់តែសម្រាប់ការតុបតែងខ្លួន និងទិញសម្លៀកបំពាក់ទៅវិញ ស្ទើរមិនគ្រប់ផង។ ម្យ៉ាងខ្ញុំវាឆ្អែតចិត្តពេកហើយ នឹងសង្គមដែលមើលងាយមើលថោកពីអ្នកសិល្បៈ ដែលគេឡូយនឹងជីវភាពសម្បូរលុយ ឡាន សម្ភារៈនិយមទំនើបៗ ទើបខ្ញុំចង់តែសម្រេចចិត្តទទួលយកស្នេហាមួយដែលអាចមានអ្វីៗគ្រប់យ៉ាង។
លីនដា បានបដិសេធមិនលាតត្រដាងពីបុរសទ្រព្យស្ដុកម្នាក់ ដែលនាងប្រាប់ថាជិតស្និទ្ធជាងគេនោះទេ ដើម្បីទុកមុខមាត់ឲ្យគេ ប៉ុន្តែតាមការទម្លាយចេញ គឺបុរសនោះជាមន្ត្រីជាន់ខ្ពស់ ដែលមានមុខមាត់ធំ ក្នុងជួរទាហាន ដោយគេបានទាំងចុះមកទាក់ទងដល់ម្ដាយនាង និងសាច់ញាតិនាងជាច្រើនអន្លើ ដើម្បីក្រសោបយកនាងធ្វើជាកំណាន់ចិត្តក្នុងពេលដ៏ខ្លីខាងមុខ។
សុវណ្ណ លីនដា សារភាពឥតលាក់លៀមថាគាត់ទាក់ទងខ្ញុំអ៊ីចឹងមែន ហើយមើលទៅគាត់ចង់លេងមែនទែន ព្រោះស្អីក៏គាត់ហ៊ានឲ្យយើងដែរ តែមកពីខ្ញុំចេះតែខ្លាចទើបមិនទាន់ហ៊ានទទួល៕
© រក្សាសិទ្ធិដោយ thmeythmey.com