ពិភពតារា៖ ឆន សុវណ្ណរាជ និងប្រវត្តិពិតក្នុងជីវិតសិល្បៈ
×
ភ្នំពេញ៖តារាចម្រៀង ឆន សុវណ្ណរាជ មានស្រុកកំនើតកើតជានៅក្រុងភ្នំពេញ លោកមានបងប្អូន ៨ នាក់ ក្នុងនោះប្រុស២នាក់ និង ស្រី៦នាក់ ដែលលោកគឺជាកូនទី។ រាជ ចូលចិត្តនិងស្រលាញ់សិល្បៈតាំងតែពីកុមារភាពមកម្ល៉េះ ដោយតែងតែស្រមៃថា ថ្ងៃណាមួយខ្លួនអាចនឹងក្លាយជាតារាចម្រៀងមួយរូបប្រចាំប្រទេសដើម្បីសំរេចសេចក្ដីប៉ងប្រាថ្នា។
ជាភ័ព្វវាសនា ថ្ងៃមួយលោកត្រូវបានអញ្ជើញឲ្យទៅច្រៀងនៅឯកម្មវិធីជប់លៀងមួយរបស់មិត្តភក្តិរបស់លោក ហើយគាប់ជួនពេលនោះដែរ លោកត្រូវបានបុរសម្នាក់ដែលកំពុងអង្គុយស្ដាប់លោកច្រៀងក្នុងឱកាសនោះ មានការចាប់អារម្មណ៍នឹងទឹកដម ក៏ដូចជាសំនៀងរបស់លោកយ៉ាងខ្លាំង ហើយបានទាក់ទងរូបលោកឲ្យចុះកុងត្រាចូលធ្វើជាតារាចម្រៀងប្រចាំផលិតកម្មមួយ ដែលពេលនោះគឺជាការប្រឡូកឈានជើងចូលវិស័យសិល្បៈរបស់តារាចម្រៀង ឆន សុវណ្ណរាជជាលើកដំបូង គឺនៅឆ្នាំ២០០៥ ដែលលោកមិនដែលធ្លាប់បានចូលប្រលងក្នុងកម្មវិធីប្រលងចម្រៀងអ្វីឡើយដោយហេតុថា ខ្វះភាពជឿជាក់ក៏ដូចជារវល់ក្នុងការសិក្សា។
រាជ បានច្រៀងឲ្យផលិតកម្មនោះបានតែរយៈពេល៦ខែប៉ុណ្ណោះ ហើយក៏ចាកចេញ បន្ទាប់មកគាត់ក៏បានចូលទៅជ្រកក្រោមទ្រនំផលិតកម្មថ្មីគឺផលិតកម្មរស្មីហង្សមាសនៅក្នុងឆ្នាំ២០០៧ ដែលជាផលិតកម្មទទួលបានជោគជ័យ និងឈានមុខគេបំផុតក្នុងប្រទេសកម្ពុជា។ បទចម្រៀងរបស់លោកដែលត្រូវបានទស្សនិកជនទទួលស្គាល់ខ្លាំងជាងគេនោះគឺបទ ទីក្រុងគ្មានមេឃ ដែលជាបទចម្រៀងទទួលបានការពេញនិយមបំផុតក្នុងគ្រានោះពីស្រទាប់យុវវ័យ ហើយគាត់ក៏មានបទចម្រៀងជាច្រើនទៀតផងដែរ ដែលទទួលបានការពេញចិត្តដូចជា កុំដេញបងចេញ,ពេលអូនលំបាកមេឃឯកា, សង្សារចាស់Call មក ជាដើម។
កេរ្តិ៍ឈ្មោះរបស់ ឆន សុវណ្ណរាជ កាន់តែល្បីឡើងៗ ពាសពេញប្រទេស នៅក្រោមការគ្រប់គ្រងរបស់ផលិតកម្មរស្មីហង្សមាសរហូតធ្វើឲ្យលោកមានឱកាសក្នុងការចេញទៅសំដែងនៅក្រៅប្រទេសថែមទៀត ដូចជាប្រទេសអូស្ត្រាលី និងសហរដ្ឋអាមេរិកជាដើម។
ក្រៅពីអាជីពសិល្បៈ លោកឆន សុវណ្ណរាជក៏មានមុខជំនួញផ្ទាល់ខ្លួនរបស់លោក ជាមួយនឹងបងស្រីផងដែរ គឺហាងកាត់សំលៀកបំពាក់ ដែលសម្ភោធក្នុងឆ្នាំ២០០៧ ហើយនិងហាងថតរូបដែលត្រូវបានបើកបន្ទាប់ពីប៉ុន្មានឆ្នាំក្រោយមក។
ដោយឡែក ចំពោះកិច្ចការជួយសង្គម លោកបានធ្វើកិច្ចការសប្បុរសជាច្រើនតាមរយៈការច្រៀង ដើម្បីយកថវិការទាំងអស់នោះមកជួយដល់កុមារក្នុងសហគមន៍ដូចជា កុមារកំព្រា ឬក៏កុមារដែលត្រូវបានគេ
រំលោភបំពានផ្លូវភេទជាដើម។
លោកក៏ត្រូវបានតែងតាំងឲ្យធ្វើជាឯកអគ្គរដ្ឋទូតរបស់ផលិតផល Vaseline ប្រចាំប្រទេសកម្ពុជាផងដែរគឺ Vaseline Man ដែលផ្នែកមួយនៃផលិតផលរបស់ក្រុមហ៊ុន Unilever ហើយក្រុមហ៊ុននេះជាក្រុមហ៊ុនធំជាងគេលំដាប់ទី៣ ក្នុងការផ្គត់ផ្គង់ផលិតផលប្រើប្រាស់។
ឆន សុវណ្ណរាជ កើតនៅថ្ងៃទី១០ខែតុលា ឆ្នាំ១៩៨៥ មានកំពស់ ១៧៥ cm ៕
© រក្សាសិទ្ធិដោយ thmeythmey.com