ជាតិ
×![]()
ដោយ: ខន ចំប៉ា
លោកនេតសាវឿនអគ្គស្នងការនគរបាលជាតិកាលពីថ្ងៃទី២១កន្លងទៅ បានប្រកាសដល់កម្លាំងនគរបាល គ្រប់ស្នងការដ្ឋានទូទាំងប្រទេស ឲ្យរឹតបន្តឹង និងរក្សាសន្តិសុខ សុវត្ថិភាព នៅទីប្រជុំជននានា ជាពិសេសកន្លែងលក់គ្រឿងអលង្ការនិងប្តូរប្រាក់ដែលអាចនឹងកើតមានអំពើប្លន់ប្រដាប់អាវុធ។
ការប្រកាសជាបន្ទាន់នេះធ្វើឡើងក្រោយពេលដែលកើតមានករណីប្លន់ប្រដាប់អាវុធបានកើតឡើងបន្តបន្ទាប់គ្នា នៅក្នុងស្រុកស្ទោង ខេត្តកំពង់ធំខេត្តព្រះសីហនុនិងខេត្តពោធិ៍សាត់ជាដើម។នេះបើយោងតាមការចុះផ្សាយនៅក្នុងគេហទំព័ររបស់អគ្គស្នងការដ្ឋាននគរបាលជាតិ។
បើតាមប្រភពដដែលក្រៅពីដាក់បញ្ជាឲ្យគ្រប់ស្នងការដ្ឋានទាំងអស់ត្រូវរៀបចំកម្លាំងដែលមានក្រុមប្រតិបត្តិការជាប្រចាំ២៤ម៉ោង នៅគ្រប់ទីផ្សារ ទីប្រជុំជនពិសេសកន្លែងលក់គ្រឿងអលង្ការ ទីតាំងប្តូរប្រាក់ អគ្គស្នងការនគរបាលជាតិដដែលក៏បានព្រមានផងដែរដល់គ្រប់ស្នងការអធិការ រួមទាំងកម្លាំងនគរបាលដែលទទួលខុសត្រូវនៅតាមទីតាំងនិងមូលដ្ឋានទាំងអស់អាចប្រឈមនឹងការត្រួតពិនិត្យឬដកតំណែង ប្រសិនបើពួកគេធ្វេសប្រហែស និងបណ្តាលឲ្យករណីប្លន់ប្រដាប់អាវុធកើតឡើង ដោយគ្មានការទទួលខុសត្រូវផ្នែកសន្តិសុខនិងសុវត្ថិភាពនោះ។
ជាមួយគ្នានោះដែរលោកនេតសាវឿនក៏បានដាក់បញ្ជាឲ្យផ្នែកជំនាញថ្នាក់កណ្តាល ចូលរួមរក្សាសន្តិសុខ សុវត្ថិភាព និងស្វែងរកចាប់ខ្លួនជនសង្ស័យក្នុងអំពើប្លន់ប្រដាប់អាវុធដែលបានកើតមាននាពេលកន្លងមកផងដែរ។
សូមបញ្ជាក់ថាទាក់ទិននឹងករណីប្លន់នៅក្នុងស្រុកស្ទោង ខេត្តកំពង់ធំ សមត្ថកិច្ចបានចាប់ខ្លួនជនសង្ស័យជាចោរប្លន់បានចំនួន២នាក់ និងរឹបអូសបានម៉ូតូបានចំនួន៣គ្រឿង។ដោយឡែកករណីប្លន់ប្រដាប់អាវុធនៅក្នុងស្រុកក្រវ៉ាញខេត្តពោធិ៍សាត់ សមត្ថកិច្ចចាប់ខ្លួនជនសង្ស័យបានចំនួន៥នាក់រឹបអូសបានអាវុធ២ដើម និងមាសមួយចំនួន ព្រមទាំងកំពុងតាមស្វែងរកចាប់ខ្លួនជនសង្ស័យផ្សេងទៀត៕
© រក្សាសិទ្ធិដោយ thmeythmey.com
