ជាតិ
នយោបាយជាតិ
×![]()
ដោយ: លីម តុលា
ភ្នំពេញ៖ ព្រះអង្គម្ចាស់នរោត្តម រណឫទ្ធិ ដែលត្រូវបានគេធ្វើបក្សប្រហារទម្លាក់កាលពីឆ្នាំ២០០៦កន្លងមក ទើបត្រូវបានគណបក្សហ្វ៊ុនស៊ិនប៉ិចយាងអោយចូលមកដឹកនាំគណបក្សឡើងវិញកាលពីប៉ុន្មានខែមុននេះ។ គង់ជាព្រះប្រធានគណបក្សមិនទាន់បានប៉ុន្មានខែផងស្រាប់តែ ព្រះអង្គម្ចាស់ក្សត្រី នរោត្តម អរុណរស្មី ដែលធ្លាប់ជាព្រះប្រធានគណបក្សហ្វ៊ុនស៊ិនប៉ិចជំនួសព្រះអង្គម្ចាស់ រណឫទ្ធិ និងបច្ចុប្បន្នជាអនុប្រធានទី១នៃគណបក្សហ្វ៊ុនស៊ិនប៉ិច បានលាលែងចេញពីតំណែង។
ប្រភពស្និទ្ធនឹងព្រះអង្គម្ចាស់ នរោត្តម រណឫទ្ធិ បានអោយដឹងនៅថ្ងៃសៅរ៍នេះថា ព្រះអង្គម្ចាស់ក្សត្រី នរោត្តម អរុណរស្មី ដែលធ្លាប់ជាព្រះប្រធានគណបក្សហ្វ៊ុនស៊ិនប៉ិចជំនួសព្រះអង្គម្ចាស់ រណឫទ្ធិ និងបច្ចុប្បន្នជាអនុប្រធានទី១នៃគណបក្សហ្វ៊ុនស៊ិនប៉ិច បានលាលែងចេញពីតំណែងហើយ។ តែព្រះអង្គម្ចាស់ នរោត្តម រណឫទ្ធិ មិនទាន់សម្រេចថា តើត្រូវអនុញ្ញាតអោយឈប់ឬយ៉ាងណានៅឡើយទេ។
មូលហេតុនៃការសុំលាលែងមិនត្រូវបានគេប្រាប់អោយដឹងនៅឡើយទេ។ បច្ចុប្បន្ន ព្រះអង្គម្ចាស់ អរុណរស្មី កំពុងគង់នៅក្នុងប្រទេសម៉ាឡេស៊ី ក្នុងនាម ព្រះអង្គ ជាឯកអគ្គរាជទូតខ្មែរប្រចាំទីក្រុងកូឡាឡាំពួរ។ ព្រះអង្គម្ចាស់ អរុណរស្មី ធ្លាប់គង់ជាព្រះប្រធានគណបក្សហ្វ៊ុនស៊ិនប៉ិចផង និងធ្លាប់ឈរឈ្មោះជានាយករដ្ឋមន្ត្រីនៃអាណត្តិទី៥កន្លងមកផង។ ប៉ុន្តែ គណបក្សហ្វ៊ុនស៊ិនប៉ិចដែលដឹកនាំដោយព្រះអង្គមិនទទួលបានកៅអីឡើយនៅក្នុងរដ្ឋសភាជាតិ។
បើទោះបីជាគេមិនដឹងពីហេតុផលនៃការលាឈប់របស់ព្រះអង្គម្ចាស់ក្សត្រីចេញពីអនុប្រធានទី១នៃគណបក្សហ្វ៊ុនស៊ិនប៉ិចក៏ដោយក្តី ក៏ប្រភពផ្សេងៗធ្លាប់បានបង្ហើបប្រាប់ថា ព្រះអង្គម្ចាស់នរោត្តម រណឫទ្ធិ និងព្រះអង្គម្ចាស់ក្សត្រី អរុណរស្មី ធ្លាប់មានគំនិតផ្ទុយគ្នាក្នុងការដឹកនាំគណបក្សហ្វ៊ុនស៊ិនប៉ិច៕
© រក្សាសិទ្ធិដោយ thmeythmey.com
