ជាតិ
សង្គមជាតិ
×![]()
ដោយ: លីម តុលា
ខេត្តត្បូងឃ្មុំ៖ នៅក្នុងអាណត្តិទី៥នេះ រដ្ឋាភិបាលបានបង្កើតខេត្តត្បូងឃ្មុំមួយថ្មីបន្ថែមទៀតដោយកាត់ផ្តាច់ពីខេត្តកំពង់ចាម។ បច្ចុប្បន្ននេះ ស្រុកត្បូងឃ្មុំ បានក្លាយទៅជាខេត្តត្បូងឃ្មុំជាផ្លូវការរួចហើយ។ ការសាងសង់បានចាប់ផ្តើមឡើងហើយ។ តែស្របពេលជាមួយគ្នា ដីនៅតំបន់នេះ ឡើងថ្លៃប្រមាណជា១ពាន់ភាគរយប្រៀបធៀបទៅនឹងមុនពេលនៃការប្រកាសសាងសង់សាលាខេត្ត។
ការដ្ឋានសាងសង់ផ្លូវថ្នល់ និងការដ្ឋានសាងសង់សាលាខេត្តត្បូងឃ្មុំថ្មីដែលស្ថិតនៅក្នុងឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ បានចាប់ផ្តើមបន្ថិចម្តងៗហើយ។ ស្លាកសញ្ញាប្លង់ខេត្តត្បូងឃ្មុំត្រូវបានគេដាក់តាំងនៅលើផ្លូវជាតិធ្វើដំណើរឆ្ពោះទៅកាន់ខេត្តក្រចេះ។
សាលាខេត្ត និងមន្ទីខេត្តមិនទាន់ត្រូវបានសាងសង់រួចរាល់មែន។ ប៉ុន្តែ តម្លៃដីដែលស្ថិតនៅជុំវិញសាលាខេត្តបានឡើងថ្លៃពី៥០០ទៅ១០០០ភាគរយ។ មន្ត្រីសាលាខេត្តត្បូងឃ្មុំម្នាក់ដែលសុំមិនអោយបញ្ចេញឈ្មោះ បានអោយដឹងថា តម្លៃដីដែលស្ថិតនៅលើផ្លូវមេនៃសាលាខេត្តបានកើនឡើងពីតម្លៃក្រោម១ម៉ឺនដុល្លារក្នុង១ហិកតា កាលពីពេលមុន មកដល់ជិត១០ម៉ឺនក្នុង១ហិកតានាពេលបច្ចុប្បន្ននេះ។ ដីស្ថិតនៅឆ្ងាយពីផ្លូវមេសាលាខេត្តអាចឡើងថ្លៃដល់១ម៉ឺន ឬ២ម៉ឺនដុល្លារក្នុង១ហិកតា ផ្ទុយនឹងក្រោម១ម៉ឺនដុល្លារកាលពីពេលមុនការសាងសង់សាលាខេត្ត។ ប្រជាពលរដ្ឋនៅក្នុងខេត្តកំពង់ចាម ឬខេត្តក្រចេះដែលស្គាល់តំបន់សាលាខេត្តត្បូងឃ្មុំច្បាស់ បាននិយាយថា ដីតំបន់នេះកាលពីពេលមុនគ្មានហាងឆេងឡើយ។ តែក្រោយការប្រកាសសាងសង់សាលាខេត្តថ្មី តម្លៃដីឡើងថ្លៃគួរអោយភ្ញាក់ផ្អើល។ លោក ស៊ា ឆៃលីន អគ្គនាយកក្រុមហ៊ុនអចលនទ្រព្យ ឆៃលីន ស៊ា រៀល
ធី បានសម្តែងការភ្ញាក់ផ្អើលពីតម្លៃដីនៅតំបន់ខេត្តត្បូងឃ្មុំ។ លោកពន្យល់ថា វត្តមានសាលាខេត្តត្បូងឃ្មុំ ដែលមិនទាន់មានសកម្មភាពសេដ្ឋកិច្ចពិតប្រាកដ មិនគួរអាចជំរុញតម្លៃដីអោយឡើងក្នុងកម្រិតនេះបានឡើយ។ លោក ឆៃលីន ពិបាកនឹងជឿ ហើយចោទជាសំណួរថា មូលហេតុអ្វីបានជាតម្លៃកើនឡើងខ្លាំងយ៉ាងដូច្នេះ?
អ្នកវិភាគតម្លៃអចលនទ្រព្យផ្សេងទៀត បានអត្ថាធិប្បាយថា ការឡើងថ្លៃនេះ គឺដោយសារចលនាបំប៉ោងតម្លៃដីធ្លីដើម្បីកេងយកចំណេញ។ អ្នកទិញខ្លះ ក្រឡុកហាងឆេង បំប៉ោង ដើម្បីលក់ចេញវិញក្នុងតម្លៃខ្ពស់។ ដូច្នេះ អ្នកទិញចុងក្រោយគេ អាចជាប់គាំងប្រាក់ក្នុងដីដោះមិនចេញ។ អ្នកជំនាញដដែលបានពន្យល់ទៀតថា ស្ថានភាពខេត្តត្បូងឃ្មុំស្រដៀងគ្នាទៅនឹងសាលាខេត្តសៀមរាបថ្មីដែរ។ មុនការសាងសង់ និងអំឡុងពេលនៃការសាងសង់សាលាខេត្តសៀមរាបថ្មី តម្លៃដីធ្លីនៅតំបន់សាលាខេត្តថ្មីបានឡើងថ្លៃគួរអោយព្រឺឆ្អឹងខ្នង។ ប៉ុន្តែក្រោយការសាងសង់រួចហើយ គ្មានសកម្មភាពសេដ្ឋកិច្ចអ្វីទាំងអស់ អ្នកទិញចុងក្រោយ គឺជាអ្នកខាតប្រាក់កប់នៅក្នុងដីលក់មិនចេញរហូតមកដល់សព្វថ្ងៃនេះ៕
© រក្សាសិទ្ធិដោយ thmeythmey.com
