ជាតិ
ទឹកប្រាក់១៨ម៉ឺនដុល្លារនឹងចំណាយសម្រាប់មហោស្រពវប្បធម៌យុវជនអន្តរជាតិ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា
× កម្ពុជាគ្រោងនឹងចំណាយទឹកប្រាក់ប្រមាណ១៨ម៉ឺនដុល្លារ នៅក្នុងមហោស្រពវប្បធម៌យុវជនអន្តរជាតិ (IYFC)លើកទី១ ដែលនឹងប្រព្រឹត្តិទៅ រយៈពេល៦ថ្ងៃ ចាប់ពីថ្ងៃទី១២ដល់ថ្ងៃទី១៧ខែមេសា ខាងមុខនេះ នៅក្នុងខេត្តសៀមរាប។
មហោស្រពវប្បធម៌យុវជនអន្តរជាតិលើកទី១ ផ្តួចផ្តើមរៀបចំដោយក្រសួងអប់រំយុវជននិងកីឡា សហការជាមួយសហភាពសហព័ន្ធយុវជនកម្ពុជា នឹងប្រារព្ធឡើងក្រោមប្រធានបទ«ឯកភាពនិងសាមគ្គីភាព៖កម្លាំងក្នុងវប្បធម៌ ចំរុះ» ។
មហោស្រពនេះ រៀបចំឡើងដើម្បីអបអរសាទរការឈានចូលមដល់នៃសមាហរណកម្មអាស៊ាន ដែលនឹងមកដល់នៅចុងឆ្នាំ២០១៥នេះ។
មហោស្រពនេះ ក៏ជាវេទិកាមួយដែលផ្តល់ឱកាសដល់យុវជនចែករំលែកចំណេះដឹងអំពីវប្បធម៌ អរិយធម៌ ទំនៀមទម្លាប់ប្រពៃណី ពង្រឹងទំនាក់ទំនងមិត្តភាពសាមគ្គីភាព ស្មារតីយោគយល់គ្នារវាងយុវជនមកពីបណ្តាប្រទេសជាសមាជិកអាស៊ាន និងប្រទេសជាដៃគូសន្ទនាក្នុងបរិបទនៃវប្បធម៌ចំរុះជាតិសាសន៍ ព្រមទាំងរួមចំណែកដល់ការអភិវឌ្ឍយុវជន ជំរុញឲ្យយុវជននៃប្រទេសនីមួយៗមានទំនាក់ទំនងល្អ និងយោគយល់គ្នាកាន់តែស៊ីជម្រៅ។
មហោស្រពនេះ ក៏ត្រូវរៀបចំធ្វើឡើងស្របជាមួយព្រឹត្តិការណ៍អង្គរសង្ក្រាន្តឆ្នាំ២០១៥ដែរ ដែលជាឱកាសដ៏ល្អបំផុតមួយ ឲ្យយុវជនមកពីបណ្តាប្រទេស អាស៊ាន និងក្នុងតំបន់ បានស្វែងយល់ពីវប្បធម៌ និងប្រពៃណីរបស់កម្ពុជា៕
© រក្សាសិទ្ធិដោយ thmeythmey.com