ជាតិ
នយោបាយជាតិ
គ.ជ.ប ថ្មី៖ លោក ហង្ស ពុទ្ធា នឹងពិចារណាលើលក្ខខណ្ឌរបស់បក្សទាំងពីរ
× ភ្នំពេញ៖ លោកនាយករដ្ឋមន្ត្រី ហ៊ុន សែន និង លោក សម រង្ស៊ី បានឯកភាពគ្នាស្នើលោក ហង្ស ពុទ្ធា នាយកប្រតិបត្តិអង្គការឃ្លាំមើលការបោះឆ្នោត (Nicfec) ជាសមាសភាពទី៩ នៃគណៈកម្មាធិការជាតិរៀបចំការបោះឆ្នោតថ្មី ជំនួសលោកស្រី ពុង ឈីវកេក។ នេះបើតាមការបញ្ជាក់របស់លោក ឈឹម ផលវរុណ អ្នកនាំពាក្យគណបក្សប្រជាជនកម្ពុជា។
ថ្លែងប្រាប់សារព័ត៌មានថ្មីៗ មុននេះបន្តិច លោក ឈឹម ផលវរុណ បានបញ្ជាក់ថា លោក ហង្ស ពុទ្ធា ត្រូវបានថ្នាក់ដឹកនាំគណបក្សទាំងពីរឯកភាពជ្រើសរើសរូបលោកជាផ្លូវការ។ ប៉ុន្តែ លោក មិនទាន់អាចបញ្ជាក់បានថា តើលោក ហង្ស ពុទ្ធា នឹងយល់ព្រមទទួលយកដំណែងនេះឬយ៉ាងណានោះទេ?
លោក ហង្ស ពុទ្ធា ដែលត្រូវបានស្នើជាសមាសភាពទី៩នៃគ.ជ.ប ថ្មី បានថ្លែងប្រាប់សារព័ត៌មានថ្មីៗថា លោកត្រូវការពេលវេលាពិចារណាលើសំណើរ និងលក្ខខណ្ឌដែលបក្សទាំង២ ស្នើមករូបលោកជាមុនសិន។ នាយកប្រតិបត្តិអង្គការឃ្លាំមើលការបោះឆ្នោតរូបនេះបានបញ្ជាក់ទៀតថា លោកស្នើសុំឲ្យគ.ជ.ប មានឯករាជ្យជាមុនសិន និងធានាឲ្យពលរដ្ឋខ្មែរទទួលបានផលប្រយោជន៍ពីច្បាប់ គ.ជ.ប ថ្មីនេះ៕
© រក្សាសិទ្ធិដោយ thmeythmey.com