ជាតិ
កម្មវិធីបុណ្យភូមិលើកទី២ ចាប់ផ្តើមនៅថ្ងៃស្អែក
×
កម្មវិធីបុណ្យភូមិ ដែលរៀបចំឡើង ក្រុមយុវជន ភ្លើងគប់ នឹងចាប់ផ្តើមនៅថ្ងៃស្អែកនេះ នៅវត្តព្រែកថ្លឹង ស្ថិតនៅតាមបណ្តោយផ្លូវជាតិលេខ២ ជាយរាជធានីភ្នំពេញ។
កម្មវិធីបុណ្យភូមិ លើកទី២នេះ រៀបចំឡើងរយៈពេល៣ថ្ងៃ គឺពីថ្ងៃទី៣ដល់ថ្ងៃទី៥ ខែមេសា រៀបចំឡើងដើម្បីអបអរសាទរបុណ្យចូលឆ្នាំថ្មី ប្រពៃណីជាតិ និងដើម្បីលើកកម្ពស់វប្បធម៌សិល្បៈខ្មែរ។
បុណ្យភូមិលើកទី២នេះ ក្រុមយុវជននឹងរៀបចំលេងល្បែងប្រជាប្រិយ របាំត្រុត រាំវង់ស្គដី រាំវង់លក់ផ្កាជាមួយតន្ត្រីជនពិការ ការលក់ចំណីអាហារខ្មែរ ការបង្ហាញម៉ូដពីសំរាមកែច្នៃ ការសម្តែងចាប៉ីដងវែង អាយ៉ៃ ល្ខោនបាសាក់ ល្ខោនយីកេ ល្ខោនស្បែកតូច ល្ខោនស្បែកធំ និងល្ខោនខោលជាដើម។
ជាមួយគ្នានោះដែរ ក្រុមការងារ ក៏បានរៀបចំរថយន្តសម្រាប់យុវជន និងសាធារណជន ដែលចង់ទៅចូលរួមលេង កំសាន្តក្នុងកម្មវិធីបុណ្យភូមិនេះ ដោយឥតគិតថ្លៃផងដែរ។ រថយន្តនឹងចេញដំណើរពីស្តាតអូឡាំពិក៥ជើង បន្តបន្ទាប់គ្នា គឺនៅម៉ោង៧ និងម៉ោង១០ព្រឹក ម៉ោង១ ម៉ោង៣ និង៤:៣០នាទីរសៀល។ ចំណែកជើងចេញដំណើរពីវត្តព្រែកថ្លឹង មកស្តាតអូឡាំពិកវិញ មានម៉ោង៩ព្រឹក ម៉ោង១២ថ្ងៃត្រង់ ម៉ោង៣រសៀល ម៉ោង៨ និង៩យប់៕
© រក្សាសិទ្ធិដោយ thmeythmey.com