ជាតិ
សេដ្ឋកិច្ច
រយៈពេល៣ខែ រដ្ឋប្រមូលពន្ធគយបានជាង២៦៧លានដុល្លារ
×
ក្នុងរយៈពេល៣ខែដើមឆ្នាំ២០១៥ អគ្គនាយកដ្ឋានគយ និងរដ្ឋាករកម្ពុជា ប្រមូលបានចំណូលចំនួន១,៤៧០ពាន់លានរៀល ស្មើនឹងប្រមាណ៣៦៧.៥លានដុល្លារ ចំនួននេះមានការកើនឡើងជិត១៣ភាគរយ បើធៀបទៅនឹងរយៈពេល១ត្រីមាស ក្នុងឆ្នាំ២០១៤ ។ នេះបើយោងតាមរបាយការណ៍របស់ អគ្គនាយកដ្ឋានគយ និងរដ្ឋាករកម្ពុជា ដែលបានផ្សព្វផ្សាយនៅ ក្នុងកិច្ចប្រជុំបូកសរុប ការងារគយនិងរដ្ឋាករប្រចាំខែមីនា ឆ្នាំ២០១៥ កាលពីថ្ងៃទី៩មេសាកន្លងទៅ។
របាយការណ៍ដដែលក៏បានបង្ហាញដែរថា ក្នុងខែមីនា ឆ្នាំ២០១៥កន្លងទៅថ្មីៗនេះ អគ្គនាយកដ្ឋានគយ និងរដ្ឋាករកម្ពុជា ប្រមូលបានចំណូលជាង៥២២ពាន់លានរៀល ស្មើនឹងប្រមាណ១៣០.៥លានដុល្លារ កើនឡើងជាង១៧ភាគរយ បើធៀបនឹងចំណូល កាលពីខែមីនា ឆ្នាំ២០១៤ ។
សូមបញ្ជាក់ថា ក្នុងឆ្នាំ២០១៤កន្លងទៅ អគ្គនាយកដ្ឋានគយនិងរដ្ឋាករកម្ពុជា បានប្រកាសថាខ្លួន ប្រមូលចំណូលពន្ធនាំចេញ នាំចូលបានចំនួន ១,៣៤ពាន់លានដុល្លារ កើនឡើង៣៣,៥ភាគរយ ធៀបទៅនឹងឆ្នាំមុន២០១៣ ៕
© រក្សាសិទ្ធិដោយ thmeythmey.com