ជាតិ
ក្រសួងរ៉ែចេញអាជ្ញាប័ណ្ណឲ្យកំពង់ផែស្វយ័តភ្នំពេញធ្វើការផ្គត់ផ្គង់ខ្សាច់នៅលើទីផ្សារ
×![]()
ដោយ: ខន ចំប៉ា
ក្រសួងរ៉ែ និងថាមពលបានសម្រេចចេញអាជ្ញាប័ណ្ណចំនួន២ទៅឲ្យកំពង់ផែស្វយ័តភ្នំពេញ ធ្វើការបូមផ្លូវនាវាចរណ៍ដែលរាក់ និងគោក ព្រមទាំងអនុញាតឲ្យធ្វើការផ្គត់ផ្គង់ខ្សាច់ក្នុងទីផ្សារ។ គោលដៅនៃការផ្តល់អាជ្ញាប័ណ្ណនេះ គឺដើម្បីសម្រួលដល់ការធ្វើនាវាចរផង និងដើម្បីទាញយកបរិមាណខ្សាច់មកផ្គត់ផ្គង់ ព្រមទាំងអាចរក្សាតម្លៃ នៅលើទីផ្សារ។ នេះបើយោងតាមសេចក្តីប្រកាសព័ត៌មានរបស់ក្រសួងរ៉ែ និងថាមពល។
បើតាមសេចក្តី ប្រកាសព័ត៌មាន ការសម្រេចផ្តល់អាជ្ញាប័ណ្ណទាំង២នេះ គឺបន្ទាប់ក្រសួងពិនិត្យឃើញថា តម្លៃខ្សាច់នៅលើទីផ្សារក្នុងរាជធានីភ្នំពេញ មានការកើនឡើងគួរឲ្យកត់សម្គាល់។
«អាជ្ញាប័ណ្ណទី១ ដែលក្រសួងរ៉ែ និងថាមពលផ្តល់ឲ្យកំពង់ផែស្វយ័តភ្នំពេញ ធ្វើការបូមផ្លូវនាវាចរណ៍ដែលរាក់ និងគោកនោះ គឺស្ថិតក្នុងឃុំស្តៅ ស្រុកកងមាស ខេត្តកំពង់ចាម និងឃុំរកាកោង ស្រុកមុខកំពូលខេត្តកណ្តាល ដើម្បីធានាការធ្វើនាវាចរណ៍ពីភ្នំពេញទៅខេត្តកំពង់ចាម។ ចំណែកឯអាជ្ញាប័ណ្ណទី២ គឺស្ថិតនៅភូមិខ្សុំ ឃុំបន្ទាយដែក រហូតដល់ប្រឡាយកោះកែវ ស្ថិតនៅឃុំសំរោងធំ ស្រុកកៀនស្វាយ ខេត្តកណ្តាល ដើម្បីធានាការធ្វើនាវាចរណ៍ពីក្អមសំណរ មកកាន់កំពង់ផែក្រុងភ្នំពេញ»។ នេះបើតាមសេចក្តីប្រកាសព័ត៌មានដដែល។
ផ្អែកតាមសេចក្តីប្រកាសព័ត៌មានដដែល ការបូមស្តារផ្លូវនាវាចរណ៍នេះ នឹងអាចបញ្ចេញបរិមាណខ្សាច់ និងល្បាប់ខ្សាច់ប្រហែល២ម៉ឺនម៉ែត្រត្រីគុណក្នុង១ថ្ងៃ ខណៈដែលតម្រូវការទៅផ្សារចំពោះខ្សាច់សំណង់មានប្រហែល១ម៉ឺន៥ពាន់ ម៉ែត្រត្រីគុណក្នុង១ថ្ងៃ។
«កំពង់ផែស្វយ័តភ្នំពេញក៏មានកាតព្វកិច្ចមួយចំនួនទៀតផងដែរ ដូចជាត្រូវបោះបង្គោល ឬពោងសម្គាល់ កំណត់ព្រំដែនអាជ្ញាប័ណ្ណឲ្យបានច្បាស់លាស់ ហើយប្រតិបត្តិការធនធានរ៉ែ ត្រូវធ្វើចាប់ពីម៉ោង៥ព្រឹក រហូតដល់ម៉ោង៨យប់ ដោយត្រូវពិគ្រោះយោបល់ជាមួយសហគមន៍មូលដ្ឋាន ព្រមទាំងត្រូវពិគ្រោះយោបល់ជាមួយអាជ្ញាធរមូលដ្ឋានពាក់ព័ន្ធ និងសហគមន៍មូលដ្ឋានដែលអាចរងផលប៉ះពាល់។ បន្ថែមពីលើការបង់សួយសារ និងកាតព្វកិច្ចសារពើពន្ធ កំពង់ផែស្វយ័តភ្នំពេញ ត្រូវបង់ប្រាក់ក្នុងអត្រា០.៤ដុល្លារ ក្នុង១ម៉ែត្រត្រីគុណខ្សាច់ ឬល្បាប់ខ្សាច់ចូលក្នុងថវិកាជាតិ។ បង់ប្រាក់ក្នុងអត្រា០.០២ដុល្លារក្នុង១ម៉ែត្រត្រីគុណខ្សាច់ ឬល្បាប់ខ្សាច់ចូលក្នុងមូលនិធិរ៉ែទ្រទ្រង់អភិវឌ្ឍន៍សមាគមន៍មូលដ្ឋាន ព្រមទាំងត្រូវបង់ប្រាក់ក្នុងអត្រា ០.០១ ដុល្លារក្នុង១ម៉ែត្រត្រីគុណខ្សាច់ ឬល្បាប់ខ្សាច់ចូលក្នុងមូលនិធិសម្រាប់ការគ្រប់គ្រង និងកសាងសមត្ថភាពរបស់មន្ត្រីក្រសួងរ៉ែ និងថាមពល»។ នេះបើយោងតាមសេចក្តីប្រកាសព័ត៌មានរបស់ក្រសួងរ៉ែ និងថាមពល។
សូមបញ្ជាក់ថា នៅក្នុងកិច្ចប្រជុំ ភាក្សា ពិគ្រោះយោបល់ពាក់ព័ន្ធ នឹងការផ្គត់ផ្គង់តម្រូវការខ្សាច់ រវាង ក្រសួងរ៉ែនិងថាមពល និងអាជីវករ អាជ្ញាធរមូលដ្ឋាន កាលពីដើមខែមេសាកន្លងទៅ ក្រសួងរ៉ែ និងថាមពល និងក្រុមអាជីរករបានឯកភាពគ្នាផ្អាកការធ្វើអាជីវកម្មរយៈពេល៣ទៅ៦ខែ ដើម្បីទុកពេលឲ្យក្រសួង ធ្វើការសិក្សាពីផលប៉ះពាល់នានាមុននឹងសម្រេចឲ្យដំណើរការអាជីវកម្មឡើងវិញ។ ការសម្រេចផ្អាកនេះ បានធ្វើការ ផ្គត់ផ្គង់បរិមាណខ្សាច់នៅលើទីផ្សារថយចុះ ជាហេតុធ្វើឲ្យតម្លៃខ្សាច់ហក់ឡើងគួរឲ្យកត់សម្គាល់៕
© រក្សាសិទ្ធិដោយ thmeythmey.com
