×![]()
ភ្នំពេញ៖ អតីតស្រីស្អាតកម្មវិធីអង្គរសង្ក្រាន្ត ២០១៤ កញ្ញា ចន្ធី វល័ក្ខ ត្រូវបាត់វត្តមានពីការសម្តែងក្នុងខ្សែវីដេអូភាគ រឿង ទឹកចិត្តប្រពន្ធ វគ្គ២ ដែលក្នុងនោះនាងសម្តែងជាតួប្អូនស្រីរបស់កញ្ញា ភិន សុដាលីស និងជាតួសង្សាររបស់លោក សាយ សៀរ៉ា។
អ្នកគ្រប់គ្រងតារាសម្តែងនៅក្នុងផលិតកម្មមហាហង្សបានទម្លាយឲ្យដឹងថា តួប្អូនស្រីរបស់កញ្ញា ភិន សុដាលីស នាង ចន្ធី វល័ក្ខ ដែលមានឈ្មោះក្នុងសាច់រឿងថា សុផា ត្រូវបានកាត់ចេញពីខ្សែវីដេអូភាគនេះនៅវគ្គទី២ ដោយខាងនាង វល័ក្ខ ជាអ្នកស្នើសុំ។ អ្នកចាត់ការរូបនេះបន្តទៀតថា ហេតុផលដែល វល័ក្ខ សូមឈប់ថតនោះ គឺនាងថាជាប់រវល់ទៅបន្តការសិក្សានៅបរទេស។
ទោះជាយ៉ាងណាក្តី ខ្សែវីដេអូភាគ រឿង ទឹកចិត្តប្រពន្ធ នេះមានចំនួន២វគ្គ ដែលវគ្គទី១ មានចំនួន៦០ភាគ និងវគ្គទី២ មានចំនួន២០ភាគ។ កញ្ញា ចន្ធី វល័ក្ខ នាងថតតែត្រឹមវគ្គទី១ប៉ុណ្ណោះ ដែលការសូមឈប់របស់នាងធ្វើឲ្យមានបញ្ហាបន្តិចបន្តួចចំពោះអ្នកគ្រប់គ្រងតួ ដែលតម្រូវដូរតួសម្រាប់បន្តទៅវគ្គទី២ទៀត។
លោក វិឆ័យ សុភី អ្នកនិពន្ធរឿង ទឹកចិត្តប្រពន្ធ បានឲ្យដឹងថា ចំពោះការសូមឈប់សម្តែងនៅវគ្គទី២របស់កញ្ញា ចន្ធី វល័ក្ខ គឺតម្រូវឲ្យលោកកែសាច់រឿងខ្លះៗនៅភាគទី៦០ ដើម្បីភ្ជាប់សាច់រឿងសម្រាប់ឆ្លងទៅវគ្គទី២ទៀត។ លោក សុភី បញ្ជាក់ថា ការកែសាច់រឿងនេះគឺធ្វើឲ្យតួនាង សុផា ដែលសម្តែងដោយ ចន្ធី វល័ក្ខ នោះមានគ្រោះថ្នាក់ចរាចរ រួចយកនាងទៅកែមុខ ដើម្បីដាក់តួថ្មីជំនួស។
អ្នកគ្រប់គ្រងតារាសម្តែងនៅក្នុងផលិតកម្មមហាហង្សបានបង្ហើបឲ្យដឹងថា តួដែលត្រូវជំនួស ចន្ធី វល័ក្ខ អាចតម្រូវទៅលើតារាសម្តែងវ័យក្មេង លឹម មួយហ្គេច៕
© រក្សាសិទ្ធិដោយ thmeythmey.com
