ជាតិ
×![]()
ដោយ: ធឿន បញ្ញាឬទិ្ធ
អ្នកវិភាគវិទ្យាសាស្ត្រ នយោបាយ លោក សុខ ទូច បដិសេធមិនចូលរួមវេទិការរបស់គណបក្សសម្ព័ន្ធដើម្បីប្រជាធិបតេយ្យ(LDP)ដើម្បីធ្វើការសួរដេញដោលចំពោះមនោគមន៍វិជ្ជា LDP ដែលលោក សុខ ទូច ធ្លាប់បានបកស្រាយកន្លងមកនោះទេ។
ថ្លែងប្រាប់សារព័ត៌មានថ្មីៗនៅថ្ងៃនេះ អ្នកវិភាគរូបនេះ បានបញ្ជាក់ថា ការមិនចូលរួមតុមូលជាមួយលោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ (LDP) នេះ គឺលោកយល់ថាគណបក្សនេះគ្មានក្រមសីលធម៌វិជ្ជាជីវៈត្រឹមត្រូវនោះទេ«ខ្ញុំមិនទៅតាមការអញ្ជើញទេ ព្រោះគណបក្សនេះមានជំនាញខាងជេប្រមាជគេតែប៉ុណ្ណោះ»។ នេះជាការបញ្ជាក់របស់លោក សុខ ទូច។
អ្នកវិភាគរូបនេះថា ការដឹកនាំរបស់គណបក្សនេះ គឺដឹកនាំធ្វើឲ្យយុវជនងប់ ធ្វើអ្វីដោយភាពអាត្មានិយម ដែលបង្កឲ្យមានការព្រួយបារម្ភ និងគ្រោះថ្នាក់នាពេលអនាគត។ជាមួយគ្នានេះលោក សុខ ទូច អំពាវនាវដល់យុវជនយ៉ាងដូច្នេះថា៖ «យុវជនមានសិទ្ធិជ្រើសរើសគណបក្សនយោបាយដែលខ្លួនគាំទ្រ។ ប៉ុន្ដែកុំឲ្យមានភាពងប់ជាមួយរឿងនយោបាយពេក ដោយពួកគេត្រូវតែយកពេលវេលាទៅសិក្សាផង កុំឲ្យបាត់បង់ប្រយោជន៍របស់ខ្លួនឯងនៅពេលអនាគត»។
ជាការឆ្លើយតបលោក កូវ គា អ្នកនាំពាក្យគណបក្សសម្ព័ន្ធដើម្បីប្រជាធិបតេយ្យ (LDP) និយាយថា ការលើកឡើងរបស់លោកសុខ ទូច កន្លងមក និងការរិះគន់ថាគ្មានក្រមសីលធម៌នេះ គឺជាការលាបពណ៌គណបក្សរបស់ខ្លួន។ «ការនិយាយរបស់លោក សុខ ទូច គឺមិនសំខាន់ទេ។ សំខាន់លើប្រជាពលរដ្ឋជាអ្នកសង្កេតមើល។ កន្លងមកគណបក្សយើង ជេតែមនុស្សគួរជេ ថាឲ្យមនុស្សដឹងតែធ្វើមិនដឹង។ រាល់ការជេទាំងនេះគឺក្នុងគោលបំណងរិះគន់ពួកគេ។ ប៉ុន្ដែលោក សុខ ទូច និយាយសរុបលាបពណ៌គណបក្សយើង ថាគ្មានសីលធម៌ទៅវិញ»។ នេះជាការបញ្ជាក់របស់លោក កូវ គា។
គួរបញ្ជាក់ថា ការឆ្លងឆ្លើយគ្នារវាងគណបក្សសម្ព័ន្ធដើម្បីប្រជាធិបតេយ្យ (LDP) និងលោក សុខ ទូច នាពេលនេះ គឺធ្វើឡើងក្រោយពីលោក សុខ ទូច ថ្លែងប្រាប់វិទ្យុបារាំង RFI ថា មនោគមវិជ្ជារបស់ LDPគឺ គ្រោះថ្នាក់ ចំពោះយុវជន។ ការលើកឡើងនេះ គឺភ្ជាប់ទៅនឹងករណីយុវជន LDP ម្នាក់នៅខេត្តកណ្តាលដែលត្រូវបានគេកាប់ស្លាប់នាអំឡុងនៃពិធីបុណ្យចូលឆ្នាំថ្មីកន្លងមក៕
© រក្សាសិទ្ធិដោយ thmeythmey.com
