អន្តរជាតិ
នយោបាយអន្តរជាតិ
មីស៊ីលរុស្ស៊ីត្រៀមលក់អោយចិនធ្វើឲ្យភាគីជម្លោះចិនស្លន់ស្លោរ
×
ប៉ុន្មានថ្ងៃមុន គេឃើញរុស្ស៊ីត្រៀមបញ្ជូនប្រព័ន្ធការពារដែនអាកាសទៅកាន់ប្រទេសអ៊ីរ៉ង់ ដើម្បីជួយអ៊ីរ៉ង់ពង្រឹងវិស័យការពារជាតិខ្លួនទប់ទល់សត្រូវនៅមជ្ឈិមបូព៌ា។ ពេលនេះ ស្រាប់តែចិនប្រកាសនាំប្រព័ន្ធមីស៊ីលប្រឆាំងយន្តហោះជំនាន់ថ្មីពីក្រុងម៉ូស្គូផង ដែលក្នុងក្រសែរភ្នែកអ្នកវិភាគរឿងនេះជារឿងធម្មតាទេ តែវាអាចជាការគំរាមកោះតៃវ៉ាន់ និងមហាអំណាចអាមេរិកផង។
ព័ត៌មានថា ចិននឹងនាំចូលប្រព័ន្ធការពារដែនអាកាសពីប្រទេសរុស្ស៊ីបានក្លាយជាប្រធានបទក្តៅសម្រាប់អ្នកវិភាគ និងអ្នកតាមដានព្រឹត្តិការណ៍នយោបាយពិភពលោក។ ព័ត៌មានជុំវិញការនាំប្រព័ន្ធមីស៊ីលរុស្ស៊ីរបស់ក្រុងប៉េកាំងលេចឡើង នៅពេលដែលរុស្ស៊ីប្រកាសដកការហាមឃាត់ការនាំអាវុធចេញទៅកាន់ប្រទេសអ៊ីរ៉ង់ និងបញ្ជូនប្រព័ន្ធការពារដែនអាកាសប្រភេទ S-300 ទៅទីនោះផង។ ក្រុងប៉េកាំងបានសម្រេចចុះកិច្ចសន្យាទិញសព្វាវុធប្រភេទនេះ ពីរុស្ស៊ីកាលពីប៉ុន្មានសប្តាហ៍មុន ដោយរំពឹងថា សព្វាវុធនេះនឹងត្រូវយកមកប្រើប្រាស់ដើម្បីពង្រឹងឥទ្ធិពលយោធារបស់ខ្លួននៅក្នុងតំបន់និងកំញើញរដ្ឋណាមួយដែលគំរាមកំហែងផលប្រយោជន៍មហាយក្សមួយនេះ។ ដំណឹងនាំចូលអាវុធពីរុស្ស៊ី ជារឿងដែលគួរអោយព្រួយបារម្ភសម្រាប់តំបន់តៃវ៉ាន់ ជប៉ុន និងរដ្ឋដែលកំពុងមានជម្លោះផ្សេងទៀតជាមួយក្រុងប៉េកាំង។
ប្រព័ន្ធការពារដែនអាកាសរបស់រុស្ស៊ីដែលចិនបញ្ជាទិញនោះ គឺមានម៉ាក S-400 ដែលជាប្រភេទមីស៊ីលជំនាន់ថ្មី ទំនើប និងសាហាវដែលអាចកម្ទេចរាល់វត្ថុដែលហោះហើរបានរួមទាំងយន្តហោះចម្បាំង ឧទ្ធម្ភាគចក្រ និង មីស៊ីលច្រើនប្រភេទផ្សេងទៀតផងដែរ ។ តាមអ្នកជំនាញ អាវុធនេះមានសន្ទុះលឿនរហូតដល់៤.៨គីឡូម៉ែត្រក្នុងមួយវិនាទី ហើយបាញ់បានរយៈចម្ងាយ ៤០០គីឡីម៉ែត្រ ដែលនេះបញ្ជាក់ថា រាល់ការគំរាមកំហែងតាមផ្លូវអាកាសកម្រគេចផុតពីអាវុធនេះណាស់។ អ្វីដែលមិនអាចប្រកែកបាននោះគឺ បើមានការប៉ះទង្គិចណាមួយកើតឡើង កុំរំពឹងថាយន្តហោះចម្បាំងចូលក្នុងដីចិនបានអោយសោះ។
ដោយឡែកបើតាមការអោយដឹងពីសំណាក់អ្នកជំនាញសន្តិសុខ ប្រព័ន្ធមីស៊ីលប្រឆាំងយន្តហោះផលិតនេះដែរពិតជាមានឥទ្ធិពល និងអំណាចខ្លាំងក្នុងការគាំទ្រកងកម្លាំងរបស់ចិន ជាពិសេសការពារការឈ្លានពាន ឬវាយប្រហារផ្លូវអាកាសប្រឆាំងចិននៅពេលណាមួយខាងមុខ។ ដោយសារឥទ្ធិពលខ្លាំងមហិមារនៃអាវុធនេះហើយ ទើបបានជាប្រទេសដែលមានជម្លោះដែនសមុទ្រជាចិនដូចជាតៃវ៉ាន់ ឬជប៉ុនជាដើមចាប់ផ្តើមភ័យព្រួយ។
តាមយុទ្ធសាស្ត្រយោធា ក្រុងប៉េកាំងប្រាកដជានឹងប្រើប្រាស់អាវុធពិសេសនេះ ដើម្បីពង្រឹងការការពារដែនអធិបតេយ្យនិងតំបន់គ្រប់គ្រងរបស់ខ្លួនបច្ចុប្បន្នជាពិសេសនោះគឺតំបន់ការពារដែនអាកាសដែលប្រកាសដោយចិនកាលពីឆ្នាំ២០១៣ និងការពារដែនអធិបតេយ្យនៃដែនកោះជម្លោះ សមុទ្រចិនខាងកើតជាមួយជប៉ុន សេនកាគូ និងជម្លោះសមុទ្រចិនខាងត្បូងថែមទៀត។ ម្យ៉ាងវិញទៀត ចិនក៏ប្រហែលជានឹងពង្រាយមីស៊ីលទំនើបទាំងនេះទៅកាន់តំបន់ដែលកៀកកោះតៃវ៉ាន់ ដើម្បីកំញើញកោះមួយនេះមិនអាចធ្វើផ្តេសផ្តាសជាពិសេសប្រតិបត្តិការការពារដែនអាកាសប្រឆាំងខ្លួន។
គួរបញ្ជាក់ថា ប្រព័ន្ធការពារអាកាសបស់រុស្ស៊ីក្លាយជាអាវុធទាក់ទាញសម្រាប់បណ្តាប្រទេសដែលកំពុងមានជម្លោះនិងមិនមានទំនាក់ទំនងល្អជាមួយសហរដ្ឋអាមេរិក។ ក្រោពីការបញ្ជាទិញអាវុធ S-400របស់ចិនពីរុស្ស៊ីអ៊ីរ៉ង់និងស៊ីរី សុទ្ធតែចង់ទិញអាវុធប្រភេទ S-300 ពីរុស្ស៊ីដែរដើម្បីការពារខ្លួន ហើយអាវុធនេះក៏ធ្វើអោយសម្ព័ន្ធមិត្តអាមេរិកនៅមជ្ឈិមបូព៌ាដេកមិនលក់បកមិនល្ហើយផង៕
© រក្សាសិទ្ធិដោយ thmeythmey.com