អន្តរជាតិ
នយោបាយអន្តរជាតិ
×![]()
នៅថ្ងៃព្រហស្បតិ៍ម្សិលមិញ រដ្ឋាភិបាលឥណ្ឌូណេស៊ីបានប្រកាសថា ខ្លួនបានចេញបញ្ជាអោយរៀបចំកាត់ទោសប្រហារជីវិតមនុស្ស១០នាក់ ពីបទរត់ពន្ធគ្រឿងញៀន ក្នុងនោះមានជនជាតិបារាំងSerge Atlaouiផងដែរ។ គេមិនទាន់ដឹងពីថ្ងៃប្រហារជីវិតពិតប្រាកដនៅឡើយ។ ប្រមុខការទូតបារាំងបានចោទថា តុលាការឥណ្ឌូណេស៊ី មានដំណើរការខុសប្រក្រតី។
សូមស្តាប់ការបកស្រាយរបស់ ព្រំសឿន សូលីណា
ការប្រកាសអោយរៀបចំប្រហារជីវិតជនឧក្រិដ្ឋនេះ ធ្វើឡើងតែមួយថ្ងៃប៉ុណ្ណោះ បន្ទាប់ពីប្រធានាធិបតីបារាំងបានទទូចសុំអោយឥណ្ឌូណេស៊ីចៀសមិនប្រហារជីវិតពលរដ្ឋបារាំង Serge Atlaoui។ បារាំងអង្វរផង គំរាមការទូតផង តែរដ្ឋាភិបាលលោកចូកូវីមិនបានភ័យជ្រុះសក់សូម្បីតែមួយសរសៃឡើយ។ ដោយខឹងនឹងភាពរឹងរូសរបស់ឥណ្ឌូណេស៊ីពេក រដ្ឋមន្ត្រីការបរទេសបារាំង ឡូរ៉ង់ ហ្វាប៊ីយុស បានចោទតុលាការឥណ្ឌូណេស៊ីថា មានដំណើរការខុសប្រក្រតីធ្ងន់ធ្ងរ។ បារាំងចោទដូច្នេះ ដោយសារបារាំងមិនចង់អោយមានការកាត់ទោសប្រហារជីវិត បន្តមានក្នុងពិភពលោកនេះ។ ម្យ៉ាងទៀត បារាំងប្រហែលជឿដែរថា ពលរដ្ឋខ្លួនគ្មានកំហុសដូចការចោទប្រកាន់របស់តុលាការឥណ្ឌូណេស៊ីទេ។
ជនជាតិបារាំង ឈ្មោះSerge Atlaouiអាយុ៥១ឆ្នាំ ជាជាងផ្សាដែក អាចនឹងត្រូវឥណ្ឌូណេស៊ីបាញ់ប្រហារជីវិតក្នុងសប្តាហ៍ក្រោយៗនេះ។ គាត់ជាប់ពន្ធនាគារ១០ឆ្នាំមកហើយ។ ក្នុងឆ្នាំ២០០៥ គាត់បានមកដល់ឥណ្ឌូណេស៊ី ដើម្បីផ្សាដែកក្នុងរោងចក្រមួយ សម្រាប់រយៈពេល១សប្តាហ៍។ Serge Atlaouiប្រាប់ថា គាត់ងឿងឆ្ងល់ព្រោះបានឃើញថា រោងចក្រនោះមានកន្លែងហាមឃាត់ច្រើន និងមានកន្លែងចេញចូលចម្លែក។ គាត់ក៏សម្រេចចិត្តត្រលប់ទៅបារាំងវិញ តែដោយខ្វះលុយទិញសំបុត្រយន្តហោះ គាត់ក៏បន្តធ្វើការក្នុងរោងចក្រនោះយកលុយសិន។ គាត់អះអាងថា មិនបានដឹងថា រោងចក្រផលិតគ្រឿងញៀនទេ។ ប៉ូលិសបានចុះទៅចាប់មនុស្សនៅរោងចក្រ ហើយជនជាតិបារាំងបានរងការចោទប្រកាន់ថា ជាជនសំខាន់ក្នុងបណ្តាញគ្រឿងញៀន។ យោងតាមរដ្ឋាភិបាលបារាំង ការកាត់ទោសលោកSerge Atlaouiបានប្រព្រឹត្តទៅលឿនហួសពេក ដូច្នេះជាការកាត់ក្តីដោយភ័ន្តច្រឡំ។
ភ័ន្តច្រឡំ រឺមិនភ័ន្តច្រឡំ ឥណ្ឌូណេស៊ីបានច្រានចោលការសុំលើកលែងទោសពីជនជាប់ចោទ និងបានសម្រេចថាត្រូវតែប្រហារជីវិតតាមការគ្រោងទុក។ រដ្ឋាភិបាលឥណ្ឌូណេស៊ីរបស់លោកចូកូវី ត្រូវបានគេដឹងថា មិនងាយទន់ជ្រាយ លើកលែងទោសជនជាប់ចោទក្នុងបទឧក្រិដ្ឋគ្រឿងញៀនស្រួលៗឡើយ។ ជាក់ស្តែង កាលពីថ្ងៃ១៨មករា អ្នកទោស៦នាក់ ក្នុងនោះមាន៥នាក់ជាពលរដ្ឋបរទេស មកពីវៀតណាម ប្រេស៊ីល ម៉ាឡាវី នីហ្សេរីយ៉ា និងហូឡង់ ត្រូវបានឥណ្ឌូណេស៊ីបាញ់ប្រហារជីវិត។ ក្រុងចាកាតាមិនបានស្តាប់ពាក្យអង្វរករបស់រដ្ឋាភិបាលជនបរទេសទាំងនោះទេ។ ប្រធានាធិបតីចូកូវីធ្លាប់លើកឡើងរួចហើយថា ឥណ្ឌូណេស៊ីស្ថិតក្នុងស្ថានភាពអាសន្នគ្រឿងញៀន ដោយសារតែតាមតួលេខ ក្នុងមួយថ្ងៃៗ មានយុវជនឥណ្ឌូណេស៊ីជាង១០នាក់ ស្លាប់ដោយសារគ្រឿងញៀន។
បារាំងមានទំនាក់ទំនងពាណិជ្ជកម្មតិចតួូចជាមួយឥណ្ឌូណេស៊ី នាំផលិតផលឥណ្ដូណេស៊ីចូលត្រឹមតែ០,៣ភាគរយ តែបែរជា កាលពីថ្ងៃពុធ ហ៊ានកោះហៅឯកអគ្គរដ្ឋទូតឥណ្ដូណេស៊ីអោយទៅជួបរឿងសុំលើកលែងទោសជនជាប់ចោទគ្រឿងញៀន។ បារាំងស្មានថា អាចគំរាមការទូតឥណ្ដូណេស៊ីបានស្រួលតែពិតជាមិនងាយទេ!!! គ្រាន់តែប្រធានាធិបតីបារាំងចេញមុខផ្ទាល់ កាលពីថ្ងៃពុធ សុំអោយលើកលែងទោសប្រហារជីវិតដល់ពលរដ្ឋខ្លួនភ្លាម ថ្ងៃព្រហស្បតិ៍ម្សិលមិញ រដ្ឋាភិបាលលោកចូកូវីក៏ប្រកាសភ្លាមដែរថា ចេញបញ្ជារួចរាល់ហើយអោយត្រៀមរៀបចំប្រហារជីវិតជនជាប់ចោទ។ កុំថាឡើយបារាំងដែលគ្មានទំនាក់ទំនងពាណិជ្ជកម្មធុំដុំជាមួយឥណ្ដូណេស៊ី កន្លងមក សូម្បីតែអូស្ត្រាលីដែលមានគុណផ្តល់ជំនួយអភិវឌ្ឈន៍ដល់រដ្ឋាភិបាលចាកាតា ក៏មិនអាចធ្វើអ្វីកើតផង ដើម្បីសុំអោយពលរដ្ឋខ្លួន២រូបបានរួចផុតពីការប្រហារជីវិត។ បើអូស្ត្រាលីដៃដែកក្នុងរឿងអន្តោប្រវេសន៍អន្តរជាតិ ឥណ្ឌូណេស៊ីក៏ចង់ប្រាប់វិញថា ឥណ្ឌូណេស៊ីក៏មានដៃដែកអនុវត្តច្បាប់គ្រឿងញៀនចំពោះជនបរទេសដូចគ្នាដែរ។
រដ្ឋាភិបាលលោកចូកូវីថាម៉ាត់ណា គឺម៉ាត់នុងហើយ មិនអាចបកក្រោយទេ។ ទាល់តែមានៈម៉ឹងម៉ាត់បែបនេះ ទើបប្រជាជនក្នុងស្រុកកាន់តែពេញចិត្ត។ យោងតាមការស្ទាបស្ទង់មតិចុះផ្សាយក្នុងខែមិនាកន្លងទៅ ប្រជាជនឥណ្ឌូណេស៊ីជាង៨៤ភាគរយ បានគាំទ្រអោយកាត់ទោសប្រហារជីវិតជនឧក្រិដ្ឋគ្រឿងញៀន។ បើជនរងគ្រោះដោយគ្រឿងញៀនក្នុងស្រុកកាន់តែមានច្រើន គេប្រហែលជាមិនងាយប្តូរជំហរលោកចូកូវីបានទេ ទោះជាព្រះឥន្ទចុះពីលើមេឃមកអង្វរក៏ដោយចុះ៕
© រក្សាសិទ្ធិដោយ thmeythmey.com
