ជាតិ
នយោបាយជាតិ
ទូរទស្សន៍ «ព្រះអាទិត្យ» នឹងលេចចេញជារូបរាងមុនដំណាច់ឆ្នាំនេះ
×
ប្រធានគណបក្សសង្គ្រោះជាតិលោក សម រង្ស៊ី បានបញ្ជាក់ជាថ្មីថា ទូរទស្សន៍ «ព្រះអាទិត្យ» របស់គណបក្សសង្គ្រោះជាតិ នឹងលេចចេញជារូបរាងច្បាស់លាស់នៅមុនខែធ្នូ ឆ្នាំ២០១៥នេះ។
ក្នុងកិច្ចសម្ភាសជាមួយវិទ្យុអាស៊ីសេរី កាលពីថ្ងៃទី ២៣ មេសា លោក សម រង្ស៊ី បានឲ្យដឹងយ៉ាងដូច្នេះថា ៖«យើងនឹងខិតខំឲ្យបានលឿនជាទីបំផុត យ៉ាងយូណាស់ដាច់ឆ្នាំនេះ ប៉ុនសង្ឃឹមថាអាចមុន មុនខែ១២ (ធ្នូ) មិនទាន់ហ៊ានបញ្ជាក់ទេ ប៉ុន្ដែអាចនឹងធ្វើបាន ហើយនឹងខិតខំ»។
លោក សម រង្ស៊ី បានបញ្ជាក់ថា៖«ចាប់ពីខែក្រោយទៅ ខែឧសភា មានក្រុមហ៊ុនមួយនឹងបើកឲ្យសាធារណៈជន ចូលជាម្ចាស់ភាគហ៊ុន ភាគហ៊ុននីមួយៗគឺតម្លៃ១ពាន់ដុល្លារ ដូច្នេះបងប្អូនក្នុងគ្រួសារ ប្រមូល១ពាន់ដុល្លារបាន គឺទិញភាគហ៊ុនមួយ ដែលនឹងគ្រប់គ្រង មានឥទ្ធិពលនៃការរៀបចំកម្មវិធីនៃទូរទស្សន៍ «ព្រះអាទិត្យ» នេះ។ ហើយយើងនឹងប្រមូល៣លាន ដុល្លារ គឺ៣ពាន់ភាគហ៊ុន»។
កន្លងមកលោក សម រង្ស៊ី បញ្ជាក់ថា ទូរទស្សន៍គណបក្សសង្គ្រោះជាតិគឺនឹងអាចផ្សព្វផ្សាយគំនិត លើកតម្កើងវប្បធម៌សន្ទនា ដើម្បីឲ្យវប្បធម៌សន្ទនាចាក់ឬស ចាក់គល់ទៅ ហើយនាំមកនូវផ្លែផ្កា។ ហើយលោកជឿជាក់ថា ទូរទស្សន៍គណបក្សសង្គ្រោះជាតិ ជាកត្តាមួយដ៏សំខាន់ ដើម្បីជួយឲ្យប្រជារាស្ត្រយល់ពីស្ថានការណ៍ ចេះវិនិច្ឆ័យត្រឹមត្រូវ ចំពោះស្ថានការណ៍នយោបាយកម្ពុជា៕
© រក្សាសិទ្ធិដោយ thmeythmey.com