អន្តរជាតិ
នយោបាយអន្តរជាតិ
បណ្តារដ្ឋអាមេរិកខាងត្បូងមើលឃើញ រុស្ស៊ីល្អជាងសហរដ្ឋអាមេរិក
×
ប្រទេសនៅតំបន់អាមេរិកឡាទីនភាគច្រើនមិនសូវមានចំណងទំនាក់ទំនងល្អជាមួយក្រុងវ៉ាស៊ីនតោនឡើយ ព្រោះតាំងពីដើមមកសហរដ្ឋអាមេរិកតែងតែលូកដៃចូលលូកលាន់កិច្ចការផ្ទៃក្នុងប្រទេសទាំងនោះ។ រយៈពេលប៉ុន្មានឆ្នាំចុងក្រោយនេះដែរប្រទេសរុស្ស៊ីដែលកំពុងប្រឈមជាមួយអាមេរិករឿងអ៊ុយក្រែន ព្យាយាមចែរចូវរដ្ឋអាមេរិកខាងត្បូង ហើយរដ្ឋអាមេរិកខាងត្បូងទាំងនោះសម្លឹងឃើញរុស្ស៊ីជាមិត្តល្អជាងសហរដ្ឋមេរិក។
ក្នុងដំណើរទស្សនកិច្ចទៅកាន់ប្រទេសរុស្ស៊ី ប្រមុខរដ្ឋអាហ្សង់ទីនលោកស្រី Cristina Kirchner បានលើកឡើងពីសារសំខាន់នៃទំនាក់ទំនងរវាងរដ្ឋអាមេរិកខាងត្បូងជាពិសេសប្រទេសលោកស្រី ជាមួយរដ្ឋាភិបាលក្រុងម៉ូស្គូ។ លោកស្រីបានសង្កត់ធ្ងន់ថា ការលើកឡើងកន្លងមករបស់បណ្តាប្រទេសលោកខាងលិចដែលថារុស្ស៊ីជាគ្រោះថ្នាក់ មិនគួររាប់រក នោះជារឿងមិនសមហេតុផលនោះឡើយ។
ប្រធានធិបតីអាហ្សង់ទីននេះបានប្រៀបធៀប ការចោទប្រកាន់រុស្ស៊ីថាជាការគំរាមកំហែងមួយទៅនឹងវត្តមាន និងឥទ្ធិពលសហរដ្ឋអាមេរិកនៅក្នុងតំបន់អាមេរិកឡាទីន ដូចលោកស្រីចោទជាសំណួរថា បើសិនចាត់ទុករុស្ស៊ីជាគ្រោះថ្នាក់ ហេតុអ្វីបានជាគេមិនព្រួយបារម្ភចំពោះវត្តមានរបស់សហរដ្ឋអាមេរិកផង។ ក្រៅពីនេះ ស្ត្រីជើងខ្លាំងរូបនេះក៏បានលើកឡើងពីបញ្ហាស្តង់ដាពីរជាន់ដែលកំពុងកើតឡើងនៅលើពិភពលោកដែលមហាអំណាចមួយចំនួនកំពុងប្រើប្រាស់ នាពេលបច្ចុប្បន្នផងដែរ។
ក្នុងដំណើរទស្សនកិច្ចទៅកាន់រុស្ស៊ីលើកនេះ មេដឹកនាំអាហ្សង់ទីននិងប្រធានាធិបតីរុស្ស៊ី វ្ល៉ាឌីមៀ ពូទីន បានឯកភាពចុះកិច្ចព្រមព្រៀងទ្វេភាគីជាច្រើនក្នុងទំហំទឹកប្រាក់ប្រហែល៣ពាន់លានដុល្លារអាមេរិក។ ក្នុងនោះមានកិច្ចព្រមព្រៀងវិនិយោគវិស័យថាមពលនុយក្លេអ៊ែរមានទំហំ ២ពាន់លានដុល្លារដោយរុស្ស៊ីជួយអាហ្សង់ទីនសង់រោងចក្រផលិតថាមពលបរមាណូ និងកិច្ចព្រមព្រៀងរុករកឧស្ម័ននិងប្រេងទំហំ ១ពាន់លានដុលា្លរផ្សេងទៀត។
ចាប់តាំងពីមានជម្លោះអ៊ុយក្រែនកើតឡើង ទឹកដីអាមេរិកឡាទីននេះបានក្លាយជាទិសដៅសម្រាប់ការពង្រឹងចំណងការទូត និងពង្រីកឥទ្ធិពលរបស់រុស្ស៊ី ដូចដែលឃើញស្រាប់កាលពីខែមិនា លោក ពូទីន បានបញ្ជូនរដ្ឋមន្ត្រីការបរទេសខ្លួនទៅកាន់អាមេរិកឡាទីនដើម្បីពង្រឹងចំណងមិត្តភាពជាមួយប្រទេសទាំងនោះផង។ តាមពិតទៅក្រៅពីអាហ្សង់ទីន ប្រទេសអាមេរិកឡាទីនផ្សេងទៀតបានពង្រឹងទំនាក់ទំនងជាមួយរុស្ស៊ីស្ទើរគ្រប់វិស័យ ក្នុងនោះមានវេណេហ្ស៊ុយអេឡា គុយបា បូលីវី អេក្វាឌ័រ អ៊ុយរ៉ាហ្កាយ ប្រេស៊ីល នីការ៉ាហ្កា ក្វាតេម៉ាឡា កូឡុំប៊ី។វេណេហ្ស៊ុយអេឡាតាំងពីយូរយារណាស់មកហើយមិនមានទំនាក់ទំនងល្អជាមួយអាមេរិកទេ ហើយប្រទេសទាំងពីរនេះជារឿយៗតែងមានបញ្ហាប្រឈមផ្នែកការទូត ដោយរដ្ឋសង្គមនិយមនេះចោទអាមេរិកថាជាអ្នកបង្កបញ្ហាសន្តិសុខ និងព្យាយាមផ្តួលរំលំរបបសង្គមនិយមនៅក្នុងប្រទេសខ្លួនផង។ ចំណែកបូលីវី ក៏តែងរិះគន់រដ្ឋាភិបាលក្រុងវ៉ាស៊ីនតោនដូចគ្នាដែរដោយសារតែអាមេរិកចេះតែជ្រៀតជ្រែកចូលកិច្ចការផ្ទៃក្នុងប្រទេសនេះ។
គួរបញ្ជាក់ថា សហរដ្ឋអាមេរិក អាមេរិកនៅតែជាប្រទេសដែលដាក់ទុនវិនិយោគច្រើនជាងគេនៅក្នុងតំបន់អាមេរិកខាងត្បូង ប៉ុន្តែរយៈពេលប៉ុន្មានឆ្នាំចុងក្រោយមហាអំណាចពិភពលោកដែលជាដៃគូប្រជែងអាមេរិកដូចជា មហាយក្សចិននិងរុស្ស៊ីក៏ចាប់អារម្មណ៍តំបន់ដែលអាមេរិកកំពុងរកស៊ីដូចគ្នាដែរ។ ដោយសារបរិបទសេដ្ឋកិច្ចផ្លាស់ប្តូរផង ហើយបញ្ហានយោបាយ និងប្រវត្តិសាស្ត្រដែលធ្វើអោយទំនាក់ទំនងអាមេរិកនិងរដ្ឋអាមេរិកឡាទីនមួយចំនួនល្អក់ករកផងនោះបានជំរុញអោយប្រទេសទាំងនោះចាំបាច់ងាករក និងសហការជាមួយគូប្រជែងអាមេរិកវិញ៕
© រក្សាសិទ្ធិដោយ thmeythmey.com