អន្តរជាតិ
រញ្ជួយដីនេប៉ាល់ដែលមានអ្នកស្លាប់កើនជិត២០០០នាក់ជាហេតុការណ៍ដែលគេអាចដឹងទុកជាមុន
× គ្រោះរញ្ជួយដីកម្រិត៧,៨រ៉ិចទ័រ ដែលបានវាយប្រហារនេប៉ាល់ ថ្ងៃសៅរ៍ម្សិលមិញ មិនមែនជាហេតុការណ៍ដែលគេមិនអាចដឹងមុនទេ។ មុនកើតមានហេតុការណ៍ម្សិលមិញ ប្រជាជននេប៉ាល់ ក៏ដូចជាអ្នកជំនាញផ្នែករញ្ជួយដី សុទ្ធតែធ្លាប់ដឹងរួចហើយថា នេប៉ាល់អាចនឹងប្រឈមគ្រោះរញ្ជួយដី ក្នុងពេលឆាប់។ តាមតួលេខនៅព្រឹកថ្ងៃអាទិត្យនេះ ចំនួនអ្នកស្លាប់កើនដល់ជាង១៨០០នាក់ហើយ។
សារព័ត៌មានបារាំង Le Monde បានចុះផ្សាយថ្ងៃសៅរ៍ម្សិលមិញថា Kunda Dixit ជានាយកនិពន្ធសារព័ត៌មានNepali Times ធ្លាប់បានប្រាប់កាលពីខែធ្នូចុងឆ្នាំមុននេះថា គ្រោះរញ្ជួយដីកើតមាននៅនេប៉ាល់ រៀងរាល់៥០ឆ្នាំម្តង។ គាត់ថែមទាំងរំពឹងទៀតថា វានឹងកើតឡើងក្នុងពេលឆាប់ៗជាថ្មីទៀត។
ក្នុងប្រវត្តិសាស្ត្រ នេប៉ាល់ធ្លាប់រងគ្រោះរញ្ជួយដីច្រើនលើកមកហើយ។ កម្រិតរ៉ិចទ័រធ្ងន់ជាងគេ គឺមានដល់ទៅ៨,២ កើតឡើង កាលពី ឆ្នាំ១៩៣៤ សម្លាប់មនុស្សពី១ម៉ឺនទៅ២ម៉ឺននាក់។ ក្រោយមកទៀត ក្នុងឆ្នាំ១៩៨៨ គ្រោះរញ្ជួយដីកម្រិតរ៉ិចទ័រ ៦,៩ បានវាយប្រហារ ជាថ្មីទៀត សម្លាប់មនុស្ស១៥០០នាក់។ គ្រោះរញ្ជួយដីកម្រិតរ៉ិចទ័រ៧,៨ ថ្ងៃសៅរ៍ម្សិលមិញ អាចនឹងធ្វើអោយ មនុស្សស្លាប់ រាប់ពាន់នាក់បាន។ ដោយសារគ្រោះរញ្ជួយដីសុទ្ធតែមានកម្រិតធ្ងន់ ការខូចខាតក៏មានលក្ខណៈធ្ងន់តាមនោះដែរ។ មិនត្រឹមតែ មនុស្សសន្ធឹកសន្ធាប់ទេ ដែលបាត់បង់ជីវិត ទីកន្លែងនានា ជាក់ស្តែងម្សិលមិញ ទីកន្លែងប្រវត្តិសាស្ត្រដ៏ល្បី ដូចជារាជវាំង Hanuman Dhokka រឺក៏អគារBhimsen ត្រូវបានបាក់ស្រុតខូចខាតអស់។ គ្រោះមហន្តរាយនេះក៏បានធ្វើអោយអ្នកឡើងភ្នំEverest មួយចំនួនបាត់បង់ជីវិតដែរ។
គ្រោះរញ្ជួយដីម្សិលមិញនេះកើតឡើងចំពេលបាយថ្ងៃត្រង់ ចំថ្ងៃសៅរ៍ ជាថ្ងៃដែលប្រជាជនមិនធ្វើការ ក្មេងៗមិនទៅរៀន។ មនុស្សម្នាបានចេញទៅលំហែកាយក្រៅផ្ទះ ដូច្នេះមនុស្សច្រើននាក់ បានរត់ចៀសផុតពីមហន្តរាយ។ បើហេតុការណ៍នេះកើតចំថ្ងៃធ្វើការធម្មតា នេប៉ាល់អាចនឹងដុនដាបខ្លាំងជាងនេះ៕
© រក្សាសិទ្ធិដោយ thmeythmey.com