សង្គមអន្តរជាតិ
អន្តរជាតិ
ប្រជាជននេប៉ាល់៖ «ពួកយើងកំពុងឃ្លានខ្លាំង»
×
អ្នកស្លាប់នៅក្នុងគ្រោះថ្នាក់រញ្ជួយដីកាលពីថ្ងៃសៅរ៍សប្តាហ៍មុនកើនឡើងដល់ប្រហែល ៦០០០នាក់គិតត្រឹមថ្ងៃនេះ ចំណែកអ្នករបួសកើនឡើងជាង១ម៉ឺននាក់។ បច្ចុប្បន្នប្រតិបត្តិការរុករកនិងសង្គ្រោះនៅតែបន្ត ប៉ុន្តែអ្វីដែលគេព្រួយបារម្ភបំផុតនោះគឺប្រជាជននេប៉ាល់កំពុងប្រឈមភាពអត់ឃ្លានខ្លាំង ព្រោះតែខ្វះស្បៀង។ គេកំពុងដង្ហើយសុំជំនួយមនុស្សធម៌បន្ថែមអោយបានឆាប់រហ័សដើម្បីជួយសង្គ្រោះជីវិតប្រជាជននេប៉ាល់នៅតំបន់ឆ្ងាយ។
ក្រុមគ្រួសារប្រជាជននេប៉ាល់ជាច្រើនកំពុងរស់នៅភាពលំបាកវេទនា ក្រោយគ្រោះមហន្តរាយរញ្ជួយដីកម្រិត៧.៨រ៉ិកទ័រកាល ពីថ្ងៃសៅរ៍សប្តាហ៍មុន។ ខណៈពេលដែលចលនាជួយសង្គ្រោះ និងរុករកជនរងគ្រោះនៅតែបន្តយ៉ាងសស្រាក់សស្រាំ ការកង្វះខាតស្បៀងបានក្លាយជាកង្វល់សម្រាប់នេប៉ាល់។ រឿងរ៉ាវមួយដែលគួរអោយរន្ធត់និងខ្លោចចិត្តនោះ គឺស្ត្រីក្មេងចាស់នេប៉ាល់ រួមជាមួយក្មេងៗដែលជាជនរងគ្រោះមានទឹកមុខស្លេកស្លាំងនិងគ្មានកម្លាំងកំហែង បានស្រែកទ្រហ៊រយំពេលឃើញអ្នកចែកចាយជំនួយមនុស្សធម៌មកដល់ ហើយពួកគេថ្លែងប្រាប់អ្នកស្ម័គ្រចិត្តទាំងនោះថា «ពួកយើងឃ្លានខ្លាំងណាស់»។
កង្វះខាតស្បៀងនិងថ្នាំសង្កូវ រួមទាំងទឹកបរិភោគ កើតមានឡើងភាគច្រើននៅតំបន់ដែលដាច់ស្រយាល និងតំបន់ភ្នំដែលស្ថិតនៅដាច់ឆ្ងាយពីគេ ហើយក្រុមសង្គ្រោះពីបាកចូលទៅដល់ទៀត។ ប្រហែលស្ថានភាពលំបាកវេទនានេះ អាចនឹងធ្វើអោយប្រជាជននេប៉ាល់ខ្លះដែលកំពុងរងរបួសនិងមានបញ្ហាសុខភាពស្រាប់ធ្លាក់ខ្លួនឈឺធ្ងន់និងស្លាប់ផងក៏ថាបាន។
នៅភូមិមួយដាច់ស្រយ៉ាលឈ្មោះថា Gumbaមានមនុស្សស្លាប់ប្រហែល ៥នាក់ ប៉ុណ្ណោះ ប៉ុន្តែប្រជាជនឯទៀតនៅរស់រានមានជីវិតរស់នៅគ្មានជម្រក ហើយប្រឈមកង្វះខាតស្បៀងថែមទៀត។ ផ្ទះសម្បែងពួកគេត្រូវបានបំផ្លិចបំផ្លាញពេលរលករញ្ជួយកើតឡើង ហើយពួកគេកំពុងត្រូវការជម្រកបណ្តោះអាសន្នសិន។ ប្រជាជនទាំងនោះបានទទួលអំណោយជាស្បៀងអាហារ ៤០គីឡូក្រាមសម្រាប់បរិភោគសិនកាលពីថ្ងៃពុធម្សិលមិញ។ យ៉ាងណាមិញ ការលំបាកក្នុងការធ្វើដំណើរទៅដល់របស់អ្នកចែកចាយស្បៀង អាចនឹងធ្វើអោយពួកគេធ្លាក់ក្នុងស្ថានភាពអត់ឃ្លាន។
កម្មវិធីស្បៀងអាហារពិភពលោករបស់អង្គការសហប្រជាជាតិបានព្រមានអាជ្ញាធរនិងស្ថាប័នពាក់ព័ន្ធផងដែរ ចំពោះបញ្ហាកង្វះខាតស្បៀងនេះដែរ ព្រោះក្រុមនាំជំនួយមនុស្សធម៌កំពុងប្រឈមការលំបាកក្នុងការធ្វើដំណើរទៅកាន់តំបន់ភ្នំនិងតំបន់ដាច់ស្រយ៉ាល។ ឧទ្ធម្ភាគចក្រដឹកស្បៀង និងសម្ភារៈចាំបាច់ អាចត្រូវចំណាចយពេលច្រើនទម្រាំទៅដល់តំបន់ដែលស្ថិតក្នុងស្ថានភាពគ្រោះថ្នាក់ខ្លាំង៕
© រក្សាសិទ្ធិដោយ thmeythmey.com