សង្គមអន្តរជាតិ
អន្តរជាតិ
សណ្ឋាគារមួយនៅក្នុងទីក្រុងតូក្យូ បម្រើសេវា«បន្ទប់យំសម្រាប់ស្ត្រី»ដើម្បីបន្ថយភាពតានតឹង
×
សណ្ឋាគារមួយនៅកណ្តាលទីក្រុងតូក្យូប្រទេសជប៉ុន បានណែនាំដល់អតិថិជនរបស់ខ្លួន ពីសេវា«បន្ទប់យំសម្រាប់ស្ត្រី» ដើម្បីជួយប្រយុទ្ធប្រឆាំងនឹងភាពតានតឹងដែលពួកគេជួបប្រទះ ហើយមិនអាចរកកន្លែងយំដើម្បីរំសាយភាពស្មុគស្មាញបាន។នេះបើយោងតាមសារព័ត៌មាន RT ។
បើតាមប្រភពខាងលើ សណ្ឋាគារMitsui Garden Yotsuya hotelនៅក្នុងតំបន់ Shinjuku នៃទីក្រុងតូក្យូដែលផ្ដល់សេវាបន្ទប់ស្នាក់នៅសម្រាប់តែស្ត្រីតែប៉ុណ្ណោះបានចាប់ផ្តើមគម្រោងថ្មីមួយផ្សេងទៀតដើម្បីបំពេញតម្រូវការរបស់ស្ត្រីជនជាតិជប៉ុនដែលមានវិបត្តិនោះគឺជាបន្ទប់ដែលអនុញ្ញាតឱ្យស្ត្រី អាចយំដោយសេរីជាលក្ខណៈផ្ទាល់ខ្លួនបាន។
បើយោងតាមអ្នកនាំពាក្យរបស់សណ្ឋាគារបន្ទប់ពិសេសនេះ ក៏មានផ្តល់ជូននូវសេវាកម្មពិសេសមួយចំនួនទៀត ភាពយន្ដមនោសញ្ចេតនា រឿងកំប្លែងភាពយន្តកំនូជីវចល និងសៀវភៅប្រលោមលោកល្អៗ របស់អ្នកនិពន្ធជនជាតិជប៉ុនជាច្រើនសម្រាប់ពួកគេអាន។សណ្ឋាគារនេះក៏ផ្តល់នូវក្រដាសជូតទឹកភ្នែកទន់ៗ ឧបករណ៍ស្ទីមភ្នែក និងក្រដាសសើមសម្រាប់ជូតម្សៅចេញពីមុខផងដែរ។
អ្នកនាំពាក្យដដែលក៏បានឲ្យដឹងថា បន្ទប់នេះមានគោលបំណងដើម្បីជួយស្ត្រីមានបញ្ហាផ្លូវអារម្មណ៍និងដើម្បីយកឈ្នះលើភាពតានតឹងតាមរយៈការយំហើយពួកគេអាចចាប់ផ្ដើមកក់បន្ទប់បានហើយចាប់ពីតម្លៃ ជាង ៨៤ ដុល្លារក្នុងមួយថ្ងៃ រហូតដល់ថ្ងៃទី ៣១ ខែសីហា។
ប្រទេសជប៉ុនមានការផ្ដល់សេវាប្លែកៗជាច្រើន ដើម្បីបំបាត់អ្នកដែលមានអារម្មណ៍តានតឹងក្នុងនោះក៏មានហាងកាហ្វេមួយ ដែលគេស្គាល់ថា Soineyaគឺមានបម្រើសេវាដេកលើដៃនារីវ័យក្មេងតែពីរនាក់ក្នុងហាង ប៉ុន្តែសេវាផ្លូវភេទត្រូវបានហាមឃាត់យ៉ាងតឹងរ៉ឹងបំផុត៕
© រក្សាសិទ្ធិដោយ thmeythmey.com