ជាតិ
សង្គមជាតិ
កម្ពុជារៀបចំពិព័រណ៍សត្វស្លាបទេសន្តរប្រវេសន៍លើកទី១នៅសួនច្បារវត្តបទុមវតី
× នេះគឺលើកទី១ហើយ ដែលពិព័រណ៍សត្វស្លាបទេសន្តរប្រវេសន៍ ត្រូវបានរៀបចំឡើងនៅកម្ពុជា។ ក្រសួងបរិស្ថាន សហការជាមួយអង្គការសមាគមអភិរក្សសត្វព្រៃ(WCS) អង្គការជីវិតសត្វស្លាបអន្តរជាតិ(Birdlife International) និងមជ្ឈមណ្ឌលអាស៊ានទទូលបន្ទុកជីវៈចម្រុះ(ACB)បានរៀបចំពិព័រណ៍នេះ គឺដើម្បីអបអរទិវាសត្វស្លាបទេសន្តប្រវេសន៍ពិភពលោក។
ទិវាសត្វស្លាបទេសន្តប្រវេសន៍ពិភពលោកឆ្នាំ២០១៥នេះ រៀបចំឡើងក្រោមប្រធានបទ«សង្គ្រោះសត្វស្លាបទេសន្តរប្រវេសន៍ និងការពារទីជម្រករបស់វា»។ ទិវាសត្វស្លាបទេសន្តប្រវេសន៍ពិភពលោក ក៏ត្រូវបានបណ្តាប្រទេសជាច្រើនដែលមានវត្តមានសត្វប្រភេទនេះ រៀបចំឡើងនៅក្នុងខែឧសភាជារៀងរាល់ឆ្នាំផងដែរ។
សត្វស្លាបទេសន្តប្រវេសន៍ចំនួន១៣ប្រភេទ ត្រូវបានដាក់តាំងបង្ហាញ នៅសួនច្បារវត្តបទុមវតី ចាប់ពីថ្ងៃទី២៥ខែឧសភា ដល់ថ្ងៃទី៥ខែមិថុនា និងការធ្វើដំណើរទស្សនៈកិច្ចសិក្សាទៅតំបន់រ៉ាមសារ កោះកាពិ ក្នុងខេត្តកោះកុង។ រូបភាពសត្វស្លាបទេសន្តប្រវេសន៍ទាំង១៣ប្រភេទ ដែលដាក់បង្ហាញនៅក្នុងពិព័រណ៍នេះ គឺជាស្នាដៃរបស់ លោក ស៊ុយ សេងលីម។ លោក ស៊ុយ សេងលីម គឺជាអ្នកផ្តួចផ្តើមគម្រោងមួយដែលមានឈ្មោះថា គម្រោងការពារ និងអភិរក្សសត្វស្លាបនៅកម្ពុជា។
លោក ប៊ូ វីរៈស័ក្តិ ប្រធានកម្មវិធីរបស់អង្គការជីវិតសត្វស្លាបអន្តរជាតិ បានមានប្រសាសន៍ថា ពិព័រណ៍សត្វស្លាបទេសន្តប្រវេសន៍នេះ គឺរៀបចំឡើងក្នុងគោលបំណងបង្កើនការយល់ដឹងទីដល់សាធារណជនអំពីទិវាសត្វស្លាបទេសន្តរប្រវេសន៍ ចូលរួមការពារ និងអភិរក្សសត្វស្លាបទេសន្តរប្រវេសន៍ និងទីជម្រករបស់វា ព្រមទាំងផ្សព្វផ្សាយពីសារៈសំខាន់ និងអភិរក្សប្រភេទសត្វស្លាបទេសន្តរប្រវេសន៍ដែលមានតម្លៃជាអន្តរជាតិ។
សូមជម្រាបថា សត្វស្លាបទេសន្តរប្រវេសន៍ គឺជាប្រភេទសត្វស្លាបដែលផ្លាស់ទី ឆ្លងដែន និងទៀងទាត់តាមរដូវកាល ក្នុងរយៈចម្ងាយឆ្ងាយ និងដែលពឹងអាស្រ័យលើធនធានតំបន់ដីសើម។ ក្នុងចំណោមសត្វទាំងនោះ មានប្រភេទសត្វជិតផុតពូជ និងកំពុងទទួលរងកាគំរាមកំហែងនៅលើពិភពលោក៕
© រក្សាសិទ្ធិដោយ thmeythmey.com