សង្គមអន្តរជាតិ
អន្តរជាតិ
មហាសេដ្ឋីលំដាប់ទីមួយរបស់ចិន បាត់បង់លុយ ១៥ ពាន់លានដុល្លារក្នុងរយៈពេលកន្លះម៉ោង
×
លោក Li Hejun ដែលបានគ្រងតំណែងជា អ្នកមានជាងគេបំផុតនៅក្នុងប្រទេសចិននោះ បានខាតបង់ប្រាក់រហូតដល់ ១៥ ពាន់លានដុល្លារ ក្នុងរយៈពេលតែកន្លះម៉ោងតែប៉ុណ្ណោះ បន្ទាប់ពីតម្លៃភាគហ៊ុនរបស់ក្រុមហ៊ុនគាត់ បានធ្លាក់ចុះជិតពាក់កណ្ដាល។ នេះបើយោងតាម CNBC ។
ប្រភពដដែលក៏បានផ្សាយឲ្យដឹងថា តម្លៃភាគហ៊ុនរបស់ក្រុមហ៊ុនHanergy Thin Film Power Groupរបស់លោកLiបានធ្លាក់ចុះជិតពាក់កណ្តាលនៅក្នុងការជួញដូរមួយកាលពីថ្ងៃពុធ សប្ដាហ៍នេះ ហើយលោក Li មិនបានចូលរួមកិច្ចប្រជុំប្រចាំឆ្នាំរបស់ក្រុមហ៊ុននោះទេ។
ការខាតបង់ប្រាក់ដ៏ច្រើនសន្ធឹកសន្ធាប់នេះ អាចនឹងធ្វើឲ្យលោក Li Hejun ជាអ្នកដែលខាងបង់ប្រាក់ច្រើនជាងគេក្នុងពេលដ៏ខ្លី នៅក្នុងប្រវត្តិសាស្ត្រនៃការខាតបង់ប្រាក់របស់មហាសេដ្ឋី។ទ្រព្យសម្បត្តិសរុបរបស់លោក Li Hejunគឺមានប្រមាណជា ៣០ ពាន់លានដុល្លារនៅមុនពេលភាគហ៊ុនបានធ្លាក់ចុះ។
មុនពេលមានការធ្លាក់ចុះតម្លៃភាគហ៊ុនរបស់ក្រុមហ៊ុនHanergyនេះក្រុមអ្នកវិភាគបានអះអាងថា ភាគហ៊ុននេះបានកើនឡើងច្រើនជាង ៥ ដងបើគិតចាប់ពីខែកញ្ញា ឆ្នាំ ២០១៤ មកនោះ។ទីភ្នាក់ងារព័ត៌មាន Reuters បានរាយការណ៍ថានិយ័តករផ្សារហ៊ុនក្នុងទីក្រុងហុងកុងកំពុងតែស្វែងរកអ្នកដែលពាក់ព័ន្ធនឹងករណីនេះ ដោយអាជ្ញាធរបានចាត់ទុកថា អាចនឹងមានឧបាយកលណាមួយនៃការទម្លាក់តម្លៃនៅទីផ្សារភាគហ៊ុននេះ។
សូមបញ្ជាក់ថា នៅក្នុងសប្តាហ៍នេះដែរ មហាសេដ្ឋីអចលនទ្រព្យនិងអេឡិចត្រូនិចក្នុងទីក្រុងហុងកុងលោក Pan Sutongក៏ធ្លាប់បានខាងបង់ប្រាក់យ៉ាងច្រើនផងដែរ គឺរហូតដល់១១ ពាន់លានដុល្លារផងដែរ។ខណៈពេលដែលតម្លៃភាគហ៊ុនរបស់ក្រុមហ៊ុនធំៗទាំងពីររបស់គាត់ គឺក្រុមហ៊ុនGoldin Financial និងGoldin Property បានធ្លាក់ចុះជាង ៤០ ភាគរយ៕
© រក្សាសិទ្ធិដោយ thmeythmey.com