ជាតិ
សេដ្ឋកិច្ច
ក្រសួងព្រមានអ្នកបន្លំលាយអង្ករបរទេស ហើយថាជាផលិតផលកម្ពុជា
× ក្រសួងពាណិជ្ជកម្ម នឹងផ្អាកការផ្តល់វិញ្ញាបនបត្របញ្ជាក់ប្រភពដើម(C/O)បណ្តោះអាសន្ន ឬឈប់ផ្តល់វិញ្ញាបនបត្របញ្ជាក់ប្រភពដើម(C/O)ស្ថាពរ ចំពោះអ្នកនាំចេញ ឬម្ចាស់រោងម៉ាស៊ីនកិនស្រូវណា ដែលបន្លំយកអង្ករបរទេសមកលាយដោយប្រើឈ្មោះថាមានប្រភពដើមនៅកម្ពុជា ហើយនាំចេញទៅកាន់ទីផ្សារសហភាពអឺរ៉ុបដើម្បីទទួលបានអនុគ្រោះពន្ធ។
បើតាមសេចក្តីជូនដំណឹង ក្រសួងពាណិជ្ជកម្មនឹងចាត់ក្រុមអធិការកិច្ចរបស់ក្រសួង ចុះទៅពិនិត្យតាមក្រុមហ៊ុន និងរោងម៉ាស៊ីនកិនស្រូវនីមួយៗ ដោយមិនជូនដំណឹងជាមុននោះឡើយ។
ចំណាត់ការរបស់ក្រសួងក្រសួងពាណិជ្ជកម្ម បានធ្វើឡើងក្រោយពេលដែលសហភាពអឺរ៉ុបបានធ្វើការរឹតបន្តឹងលើការនាំចូលអង្ករពីបរទេស និងធ្វើការស៊ើបអង្កេតលើប្រភពដើមនៃផលិតផលអង្ករ។
បើតាមសេចក្តីជូនដំណឹងរបស់ក្រសួងពាណិជ្ជកម្មដដែល ប្រសិនបើសហភាពអឺរ៉ុបស្រាវជ្រាវរកឃើញថា អ្នកនាំចូលមិនបានគោរពទៅតាមវិធានប្រភពដើមទំនិញ និងបទបញ្ញត្តិនានារបស់សហភាពអឺរ៉ុបនោះទេ សហភាពអឺរ៉ុបនឹងចាត់វិធានការ ឬមិនអនុញាតឲ្យនាំចូលអង្ករទៅសហភាពអឺរ៉ុបដោយរួចពន្ធទៀតឡើយ។
សូមបញ្ជាក់ថា វិញ្ញាបនបត្របញ្ជាក់ប្រភពដើម(C/O) គឺជាឯកសារផ្លូវការមួយប្រើដើម្បីបញ្ជាក់ពីប្រភពដើមទំនិញដែលបានផលិត ឬបានទទួលទាំងស្រុងនៅក្នុងប្រទេសមួយ៕
© រក្សាសិទ្ធិដោយ thmeythmey.com