ពេជ្រ ម៉ារីដា មិនខ្លាចនឹងប្រាប់ថា មានស្នេហាភេទដូចគ្នា
× ភ្នំពេញ៖ តារាចម្រៀង ដើរម៉ូដ និងសម្តែង កញ្ញា ពេជ្រ ម៉ារីដា បានបង្ហើបឲ្យដឹងពីរឿងរ៉ាវជីវិតផ្ទាល់ខ្លួនថា សព្វថ្ងៃនាងមានសង្សារហើយ ដែលជាអ្នករស់នៅសហរដ្ឋអាមេរិក ប៉ុន្តែសង្សារនាង គឺជាមនុស្សស្រីដូចគ្នា។
ការទម្លាយចេញពីទំនាក់ទំនងស្នេហាភេទដូចគ្នារបស់តារាចម្រៀង និងសម្តែង ពេជ្រ ម៉ារីដា វាពិតជាធ្វើឲ្យមហាជនមួយចំនួន មានការភ្ញាក់ផ្អើលយ៉ាងខ្លាំង ចំពោះការសម្រេចចិត្តដោយមិនមានភាពស្ទាក់ស្ទើរ ដែលផុះចេញពីទឹកចិត្តរបស់នាងពិត។នៅពេលដែលឮដំណឹងបែបនេះ ប្រហែលជាធ្វើឲ្យបុរសៗមួយចំនួនលួចជញ្ជក់មាត់ ស្តាយរូបសម្រស់ដ៏ស្រស់ផូរផង់ របស់បុប្ផាមួយទងនេះមិនខាន ខណៈដែលនាងបានប្រគល់បេះដូងឲ្យទៅមនុស្សភេទដូចគ្នាបែបនេះ។
ទោះជាបែបណា ពេជ្រ ម៉ារីដា បានប្រាប់ពីមូលហេតុមួយចំនួន ដែលបណ្តាលឲ្យនាងសម្រេចចិត្តជ្រើសយកសង្សារភេទដូច គ្នាយ៉ាងដូច្នេះថា ដោយសារតែកន្លងទៅ នាងធ្លាប់ឈឺចិត្ត ស្អិតទ្រូងនឹងរឿងស្នេហាចំពោះបុរសម្នាក់ ដែលបានធ្វើបាបចិត្តនាង ជាន់ឈ្លីបេះដូងដ៏ស្មោះរបស់នាងដោយគ្មានអាណិត ទើបសម្រេចចិត្តថា ឈប់យកមនុស្សប្រុសជាគ្នាទៀតហើយ បើទោះជា ត្រូវរៀបការក៏មិនជ្រើសយកមនុស្សប្រុសដែរ។
នៅពេលដែលសួរថា តើការសម្រចចិត្តយកគូអនាគតជាភេទដូចគ្នាបែបនេះ ឪពុកម្តាយមិនបន្ទោសទេឬ? នាងឆ្លើយថា ប៉ាម៉ាក់នាងមិនបន្ទោសនោះទេ គាត់ស្របតាមការសម្រេចចិត្តរបស់នាង ពិសេសគឺរឿងគូអនាគតនេះឯង។
មតិខ្លះ លើកឡើងថា បើនាងរៀបការជាមួយស្វាមីភេទដូចគ្នានោះពិតមែន នាងនឹងគ្មានកូនបន្តវង្ស ត្រកូល មិនខាន។ ចំពោះបញ្ហានេះ ម៉ារីដា ប្រាប់ថា នាងមិនខ្វល់ពីរឿងអត់កូនចៅបន្តវង្សត្រកូលនោះទេ នាងនឹងពិភាក្សាជាមួយស្វាមី ដើម្បីរកកូនក្មួយមកចិញ្ចឹមជាកូនក៏បាន។
យ៉ាងណាក្តី កញ្ញា ពេជ្រ ម៉ារីដា បានសម្តែងសុំការអធ្យាស្រ័យពីមហាជនមួយចំនួន មេត្តាកុំរិះគន់នាងដែលបានសម្រេចចិត្ត រៀបការជាមួយមនុស្សភេទដូចគ្នាយ៉ាងនេះ។ នាងអះអាងថា ការរៀបការជាមួយមនុស្សភេទដូចគ្នា ឬផ្ទុយគ្នា វាមិនសំខាន់ទេ ប្រការសំខាន់គឺ ការមានស្នេហាស្មោះចំពោះគ្នានិងគ្នា រស់នៅប្រកបដោយសុភមង្គលទៅបានហើយ។
ពេជ្រ ម៉ារីដា ធ្លាប់បានថតខ្សែរឿងភាគ មានដូចជារឿង “ព្រហ្មលិខិត”, រឿង “សន្យាស្នេហ៍” និងរឿង “ម៉ឺនុយធ្នាក់ អន្ទាក់ស្នេហ៍” ។ ពេលកន្លងទៅ នាងធ្លាប់សម្តែងក្នុងខ្សែភាពយន្តជាច្រើនរឿង មានដូចជារឿង “បេសកកម្មតន្ត្រី”, រឿង “ល្បងស្នេហ៍ពិសោធចិត្ត” ,រឿង “ម៉ែក្មេករើសកូនប្រសា” និងរឿង “ជីវិតនាងរក្សា” ជាដើម...៕
© រក្សាសិទ្ធិដោយ thmeythmey.com