ជាតិ
នយោបាយជាតិ
អ្នកវិភាគ អ្នកនយោបាយ ៖ «ក្នុងជីវិតលោក ជា ស៊ីម លះបង់ច្រើនណាស់សម្រាប់កម្ពុជា»
×![]()
អ្នកនយោបាយ អ្នកវិភាគ សោកស្តាយយ៉ាងខ្លាំងចំពោះមរណភាពរបស់លោក ជា ស៊ីម ប្រធានគណបក្សប្រជាជនកម្ពុជា។ អ្នកទាំងនោះ សុទ្ធតែសរសើរពីវីរភាពរបស់លោក ជា ស៊ីម ដែលបានលះបង់ ដើម្បីបុព្វហេតុប្រទេសជាតិរាប់សិបឆ្នាំកន្លងមក។
លោក ម៉ម សូណង់ដូ ប្រធានវិទ្យុសំបុកឃ្មុំ ៖« ខ្ញុំសោកស្តាយ និងសូមចូលរួមរំលែកទុក្ខយ៉ាងក្រៀមក្រំចំពោះការបាត់បង់ជីវិតរបស់លោកតា។ គាត់គឺជានិមិត្តរូបរបស់ជាតិមួយ ដែលខំតស៊ូប្រឆាំងនឹងការឈ្លានពានរបស់បរទេស គាត់ស្រឡាញ់ជាតិ។ ក៏ប៉ុន្តែដោយសារតែពេលវេលា កាលៈទេសៈមិនផ្តល់ឲ្យអំណោយផលដល់គាត់ ទើបគាត់មិនអាចធ្វើការបានច្រើនដើម្បីជាតិ តាមចិត្តខ្លួន។មិត្តភក្តិខ្ញុំលោក វ៉ាន់ ឌីកាអុន អ្នកសរសេរសៀវភៅប្រវត្តិសាស្ត្រ និងធ្លាប់សរសេរសៀវភៅទាក់ទងនឹងសម្តេច ជា ស៊ីម នេះ បានប្រាប់ខ្ញុំថា លោក ជា ស៊ីម លះបង់ដើម្បីជាតិមាតុភូមិច្រើនណាស់ក្នុងជីវិតរបស់លោក» ។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ៖« ក្នុងនាមគណបក្សសង្គ្រោះជាតិ យើងសោកស្តាយបំផុតចំពោះមរណភាពរបស់សម្តេច ជា ស៊ីម នៅពេលនេះ។ សម្តេច ជា ស៊ីម គាត់បានបំពេញកាតព្វកិច្ចច្រើន ដើម្បីបុព្វហេតុប្រទេសជាតិ។ ខ្ញុំគិតថា ពេលនេះ មេបក្សខ្ញុំ ដែលកំពុងនៅក្រៅប្រទេសទំនងជាកំពុងត្រៀមធ្វើសេចក្តីថ្លែងការណ៍ ដើម្បីចូលរួមមរណៈទុក្ខ»។
អ្នកវិភាគនយោបាយ លោក សុខ ទូច ៖«ខ្ញុំមានការសោកស្ដាយចំពោះការបាត់បង់អ្នកនយោបាយចាស់ទុំ ដែលមានបទពិសោធន៍ច្រើន មានភាពស្ងាត់រងំ ដែលគិតប្រយោជន៍ជូនជាតិជាងខ្លួន ក្នុងការកសាងប្រទេស។ ចំពោះការបាត់បង់នេះ គឺជាការបាត់បង់នូវស្ថាបនិកនៅក្នុងគណបក្សប្រជាជន ស្ថាបនិកថ្ងៃ៧មករា ស្ថាបនិកសន្ធិសញ្ញាទីក្រុងប៉ារីស ស្ថាបនិករណសិរ្សរំដោះជាតិ»។
លោក អ៊ូ វីរៈ អ្នកវិភាគ៖«ខ្ញុំសូមចូលរំលែកទុក និងសោកស្ដាយ កាន់ទុកក្នុងការបាត់បង់អ្នកនយោបាយចាស់ទុំ ដែលមានចិត្តធម៌ ពូកែសម្របសម្រួលបានច្រើន មិនឲ្យមានការបែកបាក់ផ្ទៃក្នុងនៅក្នុងគណបក្សប្រជាជនកម្ពុជា»៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 6 ថ្ងៃ
