ជាតិ
តំណាងយូណេស្កូសាទរគម្រោងសង់ប្រាសាទឥណ្ឌា ដោយចម្លងតាមប្រាសាទអង្គរវត្ត
×
ភ្នំពេញ ៖តំណាងអង្គការយូណេស្កូប្រចាំកម្ពុជា លោកស្រី អែននី ឡីម៉ៃស្រែ្ទ (Anne Lemaistre) បានសាទរ ចំពោះគម្រោងសង់ប្រាសាទឥណ្ឌា ដោយចម្លងតាមប្រាសាទ អង្គរវត្ត។ លោកស្រីបញ្ចេញទស្សនផ្ទាល់ខ្លួនថា លោកស្រីរីករាយ នៅពេលដែលឥណ្ឌាមាន បំណងចង់សង់យកគំរូតាមប្រាសាទអង្គវត្ត ដោយលោកស្រីយល់ឃើញថា នេះនឹងធ្វើប្រាសាទអង្គវត្តកាន់តែល្បីឈ្មោះលើពិភពលោក។
លោកស្រី Anne Lemaistreបាននិយាយបែបនេះ បន្ទាប់ពីពិធីប្រកាសផ្សព្វផ្សាយរបាយការណ៍ស្តីពីការអប់រំសម្រាប់ទាំងអស់គ្នាសម្រាប់ការអប់រំ ឆ្នាំ២០០០-២០១៥រវាងអង្គការយូណេស្កូនិងក្រសួងអប់រំ យុវជន និងកីឡា នាវិទ្យាស្ថានជាតិអប់រំ នៅថ្ងៃទី១០ ខែមិថុនានេះ។
លោកស្រី អែននី ឡីម៉ៃស្រែ្ទ បានថ្លែងប្រាប់អ្នកសារព័ត៌មានបន្តថា បេកតិភណ្ឌល្បីឈ្មោះលើ ពិភលោកមួយចំនួនក៏មានប្រទេសផ្សេងទៀត សង់យកគំរូតាមដែរ ដោយសារប្រទេសនោះ ចង់ល្បីឈ្មោះតាមប្រទេសដែលខ្លួនចម្លងនោះ។
លោកស្រីថា៖«ខ្ញុំរីករាយពេលដែលប្រទេសឥណ្ឌា មានបំណងសង់ប្រាសាទដោយយកគំរូ តាមប្រាសាទអង្គរវត្ត ព្រោះបេកតិភណ្ឌពិភពលោកមួយចំនួនដែលមានឈ្មោះល្បីល្បាញក៏មានប្រទេសផ្សេងទៀត ធ្វើតាមផងដែរ ដូចជាទួលអេហ្វហ្វ៊ែល ប្រទេសបារាំង»។
គួររម្លឹកថា នៅថ្ងៃទី៦ មិថុនា កន្លងមកក្រសួងការបរទេស និងសហប្រតិបត្តិការអន្តរជាតិបានផ្ញើកំណត់ទូតមួយទៅកាន់ក្រសួងការបរទេសឥណ្ឌាដោយស្នើឲ្យស្ថាប័ននេះ ចាត់ការទៅក្រុមហ៊ុនមួយរបស់ឥណ្ឌាឈ្មោះក្រុមហ៊ុន MAHAVIR MANDIR TRUST ឲ្យបញ្ឈប់គម្រោងសាងសង់ប្រាសាទអង្គរវត្តដែលចម្លងរចនាបថទាំងស្រុងពីប្រាសាទអង្គរវត្តកម្ពុជា។
ខ្លឹមសារក្នុងកំណត់ទូតតវ៉ា បានសរសេរបញ្ជាក់ថាការសង់ប្រាសាទ ដោយចម្លងតាមប្រាសាទអង្គរវត្តនោះ គឺក្នុងបំណងផលប្រយោជន៍ពាណិជ្ជកម្មនិងបង្ហាញពីការរំលោភបំពានយ៉ាងធ្ងន់ធ្ងរដល់សម្បត្តិបេតិកភ័ណ្ឌពិភពលោក។ជាងនេះ ប្រាសាទអង្គរវត្ត គឺជានិមិត្តរូបដ៏សំខាន់ក្នុងទង់ជាតិកម្ពុជាជាច្រើនសតវត្សមកហើយនោះ។ តាមរយៈកំណត់ទូត អាជ្ញាកម្ពុជាទូតកម្ពុជាបានស្នើក្រសួងការបរទេសឥណ្ឌាឲ្យពិចារណាយ៉ាងម៉ត់ចត់ជាបន្ទាន់នូវគម្រោងសាងសង់ចម្លងតាមប្រាសាទអង្គរវត្តខ្មែរ ដើម្បីថែរក្សាទំនាក់ទំនងប្រពៃណីជាប្រវត្តិសាស្ត្ររវាងប្រទេស និងប្រជាជនយើងទាំងពីរ ។
ទាក់ទិនករណីនេះ ប្រធានសមាគមទីភ្នាក់ងារទេសចរណ៍កម្ពុជា អាងគឹមអៀង ក៏បានអបអរសាទរចំពោះចំណាត់ការរដ្ឋាភិបាលនេះដែរ។ លោកថ្លែងសារព័ត៌មានថ្មីៗកន្លងមកថា
ប្រសិនបើឥណ្ឌាពិតជាកសាងប្រាសាទអង្គរវត្តបានពិតប្រាកដមែននោះទេសចរនឹងបែងចែកជាពីរ ទីមួយគឺអ្នកដែលចង់ទៅឃើញរបស់ពិតនិងទីពីរ គឺចង់ឃើញរបស់ថ្មី។របស់ថ្មីដែលអាចមានការសាងសង់ទំនើបជាង។ «ធម្មតារបស់ចាស់វាមានតម្លៃជាងរបស់ថ្មី តែអ្វីដែលថ្មីវាក៏មានអាយុវែងជារបស់ចាស់ដែរ»។ នេះបើតាមការយល់ឃើញរបស់លោក អាងគឹមអៀង។
បើតាមព័ត៌មានកន្លងមក ឥណ្ឌាកំពុងដំណើរសាងសង់ប្រាសាទអង្គរវត្តដោយយកគំរូតាមប្រាសាទអង្គរវត្តរបស់ខ្មែរ។ ការសាងសង់នេះគ្រោងចំណាយថវិកាចំនួន៧៨លានដុល្លារសហរដ្ឋអាមេរិក នៅលើផ្ទៃដីជាង ២០០ហិកតា។
គួរបញ្ជាក់ថា ឥណ្ឌាគឺជាប្រទេសមួយដែលវិនិយោគលើការជួយជួសជុលប្រាសាទក្នុងតំបន់រមណីយដ្ឋានអង្គរក្នុងនោះមានប្រាសាទអង្គរវត្ត ហើយបច្ចុប្បន្នប្រទេសនេះកំពុងដំណើរការជួសជុលនៅបរិវេណប្រាសាទតាព្រហ្ម។តើអាចនិយាយបានទេថា ឥណ្ឌាមានគំនិតចម្លងស្នាដៃអង្គរវត្តមុននឹងខ្លួនចូលខ្លួនវិនិយោគជួយជួសជុលប្រាសាទរបស់ខ្មែរ?
© រក្សាសិទ្ធិដោយ thmeythmey.com