អន្តរជាតិ
នយោបាយអន្តរជាតិ
×![]()
ក្រោយចំណាយពេលចរចាគ្នាក្នុងបរិយាកាសយ៉ាងតឹងតែង ក្រិកនិងម្ចាស់បំណុលគ្មានលទ្ធភាពអាចត្រូវរ៉ូវគ្នាដើម្បីបង្កើតកិច្ចព្រមព្រៀងរួមគ្នាឡើយ។ កាលណាគ្មានកិច្ចព្រមព្រៀង ក្រិកប្រាកដណាស់ពិតជាគ្មានលទ្ធភាពសងបំណុលមូលនិធិរូបីយវត្ថុអន្តរជាតិឡើយ។ នេះជាលើកទីមួយហើយក្នុងប្រវត្តិសាស្ត្រ ដែលប្រទេសអ្នកមានដូចក្រិកប្រកាសមិនសងបំណុលទៅស្ថាប័នហិរញ្ញវត្ថុនេះ។
លោក មុំ ពិទូរ្យ លម្អិតព័ត៌មាននេះ
ដូចការរំពឹងទុកមែន ក្រិកគ្មានលទ្ធភាពសងបំណុលមូលនិធិរូបីយវត្ថុអន្តរជាតិឡើយ បន្ទាប់ពីអឺរ៉ុបមិនបន្ថែមពេលឲ្យក្រិកសម្រាប់ជម្រះបំណុល។ ក្រិកនិងម្ចាស់បំណុលបន្តចរចាកាលពីម្សិលមិញគ្មានបានផ្លែផ្កាសោះ ហើយក្រិកក៏នៅប្រកាន់ជំហរមិនទទួលយកសំណើរចុងក្រោយរបស់ម្ចាស់បំណុលដូចគ្នា។
ក្នុងកិច្ចចរចាត្រីភាគីមានគណកម្មការអឺរ៉ុប តំណាងធនាគារកណ្តាលអឺរ៉ុប និងតំណាងមូលនិធិរូបីយវត្ថុអន្តរជាតិផងនោះ ម្សិលមិញនៅតែបន្តទាមទារឲ្យក្រិកកាត់បន្ថយការចំណាយសាធារណ និងតំឡើងពន្ធថែមទៀតដើម្បីឲ្យប្រទេសនេះមានលទ្ធភាពបំពេញកាតព្វកិច្ចសងបំណុលផង។
ដោយកាលបរិច្ឆេទសងបំណុលផុតកំណត់កាលពីម្សិលមិញ ហើយក្រិកគ្មានលុយសងបំណុលទៅ IMF មានន័យថា ក្រិកក្លាយជារដ្ឋអឺរ៉ុប និងជារដ្ឋមានសេដ្ឋកិច្ចរីកចម្រើនដំបូងបំផុតក្នុងប្រវត្តិសាស្ត្រដែលគ្មានលទ្ធភាពជម្រះបំណុលស្ថាប័នហិរញ្ញវត្ថុនេះ។ ជុំវិញការប្រកាសមិនសងបំណុលនេះ ហ្ស៊ីមបាបវ៉េជាប្រទេសចុងក្រោយគេបង្អស់ដែលធ្វើដូច្នេះ កាលពីឆ្នាំ ២០០១។ តាមពិតទៅ ម្សិលមិញក្រិកបានស្នើសុំជាថ្មីម្តងទៀតទៅក្រុមរដ្ឋមន្ត្រីហិរញ្ញវត្ថុតំបន់ចាយលុយអឺរ៉ូពន្យារពេលកម្មវិធីដោះបំណុលរបស់ខ្លួន ប៉ុន្តែក្រុមរដ្ឋមន្ត្រីទាំងនោះបានបដិសេធ។ រដ្ឋមន្ត្រីហិរញ្ញវត្ថុហូឡង់លោក JeroenDijsselbleom បានឲ្យដឹងថា ការស្នើសុំពន្យារពេលសម្រាប់ដោះបំណុលនេះជារឿងឆ្កួតលីលា ហើយលោកសង្កត់ធ្ងន់ថា វាមិនអាចកើតឡើងឡើយ ហើយវាក៏គ្មានថ្ងៃកើតឡើងដែរ។
ក្រោយផុតកំណត់ថ្ងៃសងបំណុល អ្នកនាំពាក្យមូលនិធិរូបីយវត្ថុអន្តរជាតិ Gerry Rice បានទទួលស្គាល់ថា ក្រិកពិតជាមិនមានលទ្ធភាពបង់បំណុលដល់ស្ថាប័នខ្លួនពិតមែន។ អ្នកនាំពាក្យខាងលើបានបញ្ជូនរបាយការណ៍និងព័ត៌មានពាក់ព័ន្ធជុំវិញការប្រកាសមិនសងបំណុលរបស់ក្រុងអាថែនទៅកាន់ក្រុមប្រឹក្សាភិបាលរបស់ខ្លួនរួចរាល់ហើយ។ កាលណាក្រិកប្រកាសមិនសងបំណុល ក្រិកត្រូវដាក់បញ្ចូលក្នុងបញ្ជីរដ្ឋហួសកាលបរិច្ឆេទសងបំណុល។ មូលនិធិរូបីយវត្ថុអន្តរជាតិមិនអាចផ្តល់កម្ចីដល់ប្រទេសនេះឡើយ បើសិនក្រិកមិនទូទាត់សងបំណុលរបស់ខ្លួនដែលនៅសល់ជាមុនទេនោះ។
យ៉ាងណាក៏ដោយ រឿងរ៉ាវសំខាន់មួយទៀតគឺ គម្រោងរៀបចំប្រជាមតិនៅថ្ងៃ ៥កក្កដាខាងមុខនេះ ដែលជាថ្ងៃប្រជាជនក្រិកត្រូវចេញមុខបោះឆ្នោតសម្រេចជោគវាសនារបស់ខ្លួនថាគួរទទួលសំណើររបស់ម្ចាស់បំណុលឬអត់ ។ កន្លងមកប្រមុខរដ្ឋាភិបាលក្រិកលោក Alexis Tsiprasបានអំពាវនាវឲ្យប្រជាជនទាត់ចោលសំណើររបស់ម្ចាស់បំណុលដែលតម្រូវឲ្យក្រិកអនុវត្តគោលនយោបាយត្បិតត្បៀត។ កាលពីថ្ងៃចន្ទគេសង្កេតឃើញមានចលនាប្រជាជនបាតុកម្មដោយបង្ហាញការប្រឆាំងសហភាពអឺរ៉ុប ចំណែកនៅថ្ងៃម្សិលមិញប្រជាជនមួយក្រុមទៀតបានបាតុកម្មទាមទារឲ្យក្រិកបន្តនៅជាសមាជិកសហភាពអឺរ៉ុបនិងក្រុមចាយលុយអឺរ៉ូ៕
© រក្សាសិទ្ធិដោយ thmeythmey.com
