ជាតិ
នយោបាយជាតិ
លោក វ៉ា គឹមហុង មិនខ្លាចនឹងយកផែនទីលោក សម រង្ស៊ី មកផ្ទៀងផ្ទាត់ជាមួយរដ្ឋាភិបាល
× ពីក្នុងសន្និសីទកាសែតនៅទីស្តីការគណៈរដ្ឋមន្រ្តីនៅព្រឹកនេះ លោក វ៉ា គឹមហុង ទេសរដ្ឋមន្រ្តីទទួលបន្ទុកកិច្ចការព្រំដែន និងជាប្រធានកិច្ចការចម្រុះព្រំដែន បានអះអាងថា រូបលោក ស្វាគមន៍ចំពោះផែនទីដែលលោកប្រធានគណបក្សសង្គ្រោះជាតិនាំមកពីប្រទេសបារាំង ដើម្បីផ្ទៀងផ្ទាត់ជាមួយផែនទីរដ្ឋាភិបាល។ សន្និសីទកាសែតរបស់លោក វ៉ា គឹមហុង ស្តីពីការបង្ហាញផែនទីផ្លូវការដែលរដ្ឋាភិបាលកម្ពុជា បាន និងកំពុងប្រើប្រាស់ក្នុងខណ្ឌសីមា និងបោះបង្គោលព្រំដែនគោករវាងកម្ពុជា និងវៀតណាម។
លោក វ៉ា គឹមហុង អះអាងថា រូបលោករីករាយនឹងយកផែនទីរបស់លោក សម រង្ស៊ី ទៅត្រួតពិនិត្យជាមួយនឹងផែនទីរបស់រដ្ឋាភិបាល។ លោកថា ផែនទីរបស់រដ្ឋាភិបាលយកមកពីវិទ្យាស្ថានជាតិរបស់ប្រទេសបារាំង ហើយបើផែនទីលោក សម រង្ស៊ី នាំមកពីប្រទេសបារាំងដែរនោះ ទំនងមិនខុសពីផែនទីរដ្ឋាភិបាលនោះទេ។ លោក វ៉ា គឹមហុង បញ្ជាក់ដូច្នេះថា៖« ផែនទី លោក សម រង្ស៊ី យកមកពីបារាំង ហើយរដ្ឋាភិបាលក៏យកពីបារាំងដែរ។ ដូច្នេះប្រហែលមិនខុសគ្នាទេ។ តែយើងស្វាគមន៍ផែនទីលោក សម រង្ស៊ី» ។
ក្នុងកម្មវិធីទទួលថវិកាទ្រទ្រង់ទូរទស្សន៍ព្រះអាទិត្យកាលពីពេលកន្លងទៅ លោក សម រង្ស៊ី បាននិយាយថា គណបក្សរបស់លោក បានទទួលផែនទីដែលទាក់ទងនឹងព្រំដែនកម្ពុជា-វៀតណាមប្រវែង ១២៧០ គីឡូម៉ែត្រ និងផែនទីខ្នាត ១/១០០.០០០ ដែលគួសដោយបារាំងរួចហើយ។ បើតាមលោក សម រង្ស៊ី ផែនទីនេះ គណបក្សរបស់លោក យកពីក្នុងបណ្ណាល័យរបស់ប្រទេសបារាំង ដែលជាកន្លែងតម្កល់ទុកផែនទីប្រវត្តិសាស្រ្តរបស់កម្ពុជា។
តំណាងរាស្រ្តគណបក្សសង្គ្រោះជាតិពីររូប ដែលល្បីខាងតវ៉ារឿងព្រំដែននោះ គឺលោក រៀល ខេមរិន្ទ្រ និងលោក អ៊ុំ សំអាន នៅព្រឹកថ្ងៃព្រហស្បតិ៍នេះ ក៏បានចូលទៅស្តាប់សន្និសីទកាសែតរបស់លោក វ៉ា គឹមហុង ទេសរដ្ឋមន្រ្តីទទួលបន្ទុកកិច្ចការព្រំដែន និងជាប្រធានកិច្ចការចម្រុះព្រំដែន ផងដែរ៕
© រក្សាសិទ្ធិដោយ thmeythmey.com