ជាតិ
នយោបាយជាតិ
សន្តិសុខទីស្តីការគណៈរដ្ឋមន្រ្តី ដេញតំណាងរាស្រ្ត CNRP មិនឲ្យផ្តល់បទសម្ភាសន៍ដល់អ្នកកាសែត លោក រៀល ខេមរិន្ទ្រ នៅខាងឆ្វេង និងលោក អ៊ុំ សំអាន នៅខាងស្តាំ
× សន្តិសុខប្រមាណ ១០ នាក់ របស់ទីស្តីការគណៈរដ្ឋមន្រ្តី បានបណ្តេញ លោក រៀល ខេមរិន្ទ្រ និងលោក អ៊ុំ សំអាន តំណាងរាស្រ្តគណបក្សសង្គ្រោះជាតិ មិនឲ្យផ្តល់បទសម្ភាសន៍ដល់អ្នកកាសែតនៅក្នុងបរិវេណទីស្តីការគណៈរដ្ឋមន្រ្តី ក្រោយពីសន្និសីទកាសែតរបស់លោក វ៉ា គឹមហុង ស្តីពីការបង្ហាញផែនទីរបស់រដ្ឋាភិបាលទាក់ទងនឹងព្រំដែនកម្ពុជា- វៀតណាម នៅថ្ងៃព្រហស្បតិ៍នេះ។
បន្ទាប់ពីលោក វ៉ា គឹមហុង ទេសរដ្ឋមន្រ្តីទទួលបន្ទុកកិច្ចការព្រំដែន បញ្ចប់សន្និសីទកាសែត ក្រុមអ្នកសារព័ត៌មានបានសម្រុកទៅសួរលោក រៀល ខេមរិន្ទ្រ និងលោក អ៊ុំ សំអាន តំណាងរាស្រ្តគណបក្សសង្គ្រោះជាតិក្នុងបរិវេណទីស្តីការគណៈរដ្ឋមន្រ្តី ដើម្បីឆ្លើយតបនឹងការលើកឡើងរបស់លោក វ៉ា គឹមហុង ស្តីពីផែនទី។ ប៉ុន្តែស្របពេលដែលលោកតំណាងរាស្រ្តទាំងពីររូបនោះ កំពុងផ្តល់បទសម្ភាសន៍ដល់អ្នកកាសែត បានជិត ១០ នាទីក្រុមសន្តិសុខទីស្តីការគណៈរដ្ឋមន្រ្តីប្រមាណ ១០ នាក់ ក៏បានចេញមកដេញតំណាងរាស្រ្តទាំងនោះចេញពីបរិវេណទីស្តីការគណៈរដ្ឋមន្រ្តី។
យ៉ាងណាក៏ដោយ ក្រុមសន្តិសុខដែលបណ្តេញលោកតំណាងរាស្រ្តបក្សប្រឆាំង និងអ្នកកាសែត មិនបញ្ជាក់ឈ្មោះមន្រ្តីរូបណា បញ្ជាឲ្យដេញនោះទេ ដោយពួកគេគ្រាន់តែ និយាយថា ដល់ម៉ោងដែលពួកខ្លួន ត្រូវហូបបាយ ហើយមិនអាចឲ្យលោកតំណាងរាស្រ្តផ្តល់បទសម្ភាសន៍ដល់អ្នកកាសែតទៀតនោះទេ។
ជាការកត់សម្គាល់ លោក អ៊ុំ សំអាន កាលពីម្សិលមិញ ក៏ត្រូវលោក ឈាង វុន បណ្តេញមិនឲ្យផ្តល់បទសម្ភាសន៍ដល់អ្នកកាសែតនៅក្នុងបរិវេណវិមានរដ្ឋសភាផងដែរ៕
© រក្សាសិទ្ធិដោយ thmeythmey.com