ជាតិ
ព្រំដែន
នយោបាយជាតិ
លោក សម រង្ស៊ី និងលោក វ៉ា គឹមហុង បង្ហាញឆន្ទៈផ្ទៀងផ្ទាត់ផែនទីរួមគ្នា
×
ទាំងប្រធានគណបក្សសង្គ្រោះជាតិ លោក សម រង្ស៊ី និងទាំងលោកទេសរដ្ឋមន្ត្រីទទួលបន្ទុកកិច្ចការព្រំដែន និងជាប្រធានកិច្ចការចម្រុះព្រំដែនលោក វ៉ា គឹមហុង អ្នកទាំងពីរសុទ្ធតែមានឆន្ទៈ ក្នុងការផ្ទៀងផ្ទាត់ផែនទី ដែលខ្លួនអះអាងថា ត្រឹមត្រូវរៀងៗខ្លួន។ ប៉ុន្តែលោក វ៉ា គឹមហុង បញ្ជាក់ថា ការផ្ទៀងផ្ទាត់នេះ គឺមិនអនុញ្ញាតឲ្យមានអ្នកបច្ចេកទេសផែនដីបរទេសចូលរួមទេ។
ក្នុងពិធីបង្សុកូលឧទ្ទិសកុសលដល់អ្នកសា្លប់ក្នុងព្រឹត្តិការណ៍ផ្ទុះអាវុធ នៅរាជធានីភ្នំពេញ ថ្ងៃទី៥-៦ខែកក្កដា ឆ្នាំ១៩៩៧ នៅថ្ងៃទី៥នេះ ប្រធានគណបក្សសង្គ្រោះជាតិ លោក សម រង្ស៊ី ស្វាគមន៍នឹងការ អញ្ជើញរបស់លោក វ៉ា គឹមហុង ដើម្បីផ្ទៀងផ្ទាត់ផែនទីដែលលោក យកមកពីប្រទេសបារាំង។
«បើគេ(លោក វ៉ា គឹមហុង) យល់ព្រម ខ្ញុំនឹងផ្តល់ភ្លាម ដើម្បីផ្ទៀងផ្ទាត់ទៅវិញទៅមកថា តើខាងគេបានធ្វើរបៀបយ៉ាងដូចម្តេច? មិនមែនយកផែនទី ក្រដាសមួយផ្ទាំង ពីរផ្ទាំងថា ជាផែនទីត្រឹមត្រូវ គឺអត់គ្រប់គ្រាន់ទេ»។ នេះជាប្រសាសន៍ លោកសម រង្ស៊ី។
ប្រធានគណបក្សសង្គ្រោះជាតិ បានបញ្ជាក់យ៉ាងច្បាស់ពីទិញផែនទីដែលកំណត់ពីខ្សែបន្ទាត់ព្រំដែនរវាងកម្ពុជា និងវៀតណាម ពីប្រទេសបារាំង។ ផែនទីទាំង ២៦ ផ្ទាំង ខ្នាត ១/១០០.០០០ នេះ គឺជាផែនទីដែលរដ្ឋាភិបាលបារាំងបានធ្វើនៅអំឡុងសម័យអាណានិគមក្នុង ចន្លោះឆ្នាំ ១៩៣៣ ដល់ ១៩៥៣ ហើយវាបានបញ្ជាក់យ៉ាងច្បាស់អំពីព្រំដែនរវាងកម្ពុជា និងវៀតណាម។
ជាការឆ្លើយតប លោក វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែន និងជាប្រធានកិច្ចការចម្រុះព្រំដែន បានប្រាប់សារព័ត៌មានថ្មីៗថា រូបលោកស្វាគមន៍ចំពោះផែនទីដែលលោកប្រធាន គណបក្សសង្គ្រោះជាតិនាំមកពីប្រទេស បារាំង ដើម្បីផ្ទៀងផ្ទាត់ជាមួយផែនទីរដ្ឋាភិបាល។ តែលោកថា ការផ្ទៀងផ្ទាត់គ្នានេះ គឺមិនត្រូវឲ្យជនបរទេសណាមួយ លូកដៃចូលរួមពិនិត្យឡើយ ដោយលោកលើកឡើងថា មានតែលោក សម រង្ស៊ី និងអ្នកជំនាញផែនទីជនជាតិខ្មែរទេ ដែលអាចចូលរួមការផ្ទៀងផ្ទាត់នេះ។
«នេះជារឿងរបស់ខ្មែរ ដូចនេះខ្មែរមិនចង់ឲ្យបរទេសណាមួយមក ចូលរួមផ្ទៀងផ្ទាត់ទេ បើលោក សម រង្ស៊ី អះអាងខ្លួនជាអ្នកជំនាញខាងផែនទីមែន ពុំចាំបាច់ពឹងបរទេសដែរ។ ប្រសិនបើមានជនបរទេសណាម្នាក់ចូលរួម យើងនឹងផ្ទៀងផ្ទាត់ផែនទីជាមួយទេ»។ នេះជាប្រសាសន៍បញ្ជាក់របស់ លោកទេសរដ្ឋមន្ត្រី វ៉ា គឹមហុង។
គួររម្លឹកថា ក្នុងសន្និសីទកាសែតស្តីពីការបង្ហាញផែនទីផ្លូវការដែលរដ្ឋាភិបាលកម្ពុជា បាន និងកំពុងប្រើប្រាស់ក្នុងខណ្ឌសីមា និងបោះបង្គោលព្រំដែនគោករវាងកម្ពុជា និងវៀតណាម នៅថ្ងៃទី២ កក្កដា កន្លងទៅ លោក វ៉ា គឹមហុង ក៏បានអះអាងថា រូបលោករីករាយនឹងយកផែនទីរបស់លោក សម រង្ស៊ី ទៅត្រួតពិនិត្យជាមួយនឹងផែនទីរបស់រដ្ឋាភិបាល។ លោកថា ផែនទីរបស់រដ្ឋាភិបាលយកមកពីវិទ្យាស្ថានជាតិរបស់ប្រទេសបារាំង ហើយបើផែនទីលោក សម រង្ស៊ី នាំមកពីប្រទេសបារាំងដែរនោះ ទំនងមិនខុសពីផែនទីរដ្ឋាភិបាលនោះទេ៕
© រក្សាសិទ្ធិដោយ thmeythmey.com