ជាតិ
នយោបាយជាតិ
លោក ទៀ បាញ់ ទស្សនកិច្ចនៅចិន ខណៈកម្ពុជាវៀតណាមកំពុងចរចាវិវាទព្រំដែន
× ប្រមុខការពារជាតិកម្ពុជា លោកឧបនាយករដ្ឋមន្ត្រី ទៀ បាញ់ ត្រៀមខ្លួនចេញដំណើរទស្សនកិច្ចនៅប្រទេសចិនរយៈពេល ៥ថ្ងៃ ចាប់ពីថ្ងៃ ៨ ដល់ថ្ងៃ ១២ខែកក្កដា។ ដំណើរទស្សនកិច្ចនៅចិនរបស់រដ្ឋមន្ត្រីការពារជាតិកម្ពុជា ដែលមានគោលបំណងលើកកម្ពស់ និងរឹតបន្តឹងចំណងមិត្តភាពនិងកិច្ចសហប្រតិបត្តិការយោធា ស្រាប់តែកើតឡើងនៅពេលរដ្ឋាភិបាលកម្ពុជា និងវៀតណាមកំពុងដោះស្រាយវិវាទព្រំដែននៅភ្នំពេញ។
លោក ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិកម្ពុជា គ្រោងនឹងធ្វើដំណើរទៅទស្សនកិច្ចនៅសាធារណរដ្ឋប្រជាមានិតចិន រយៈពេល៥ថ្ងៃ ចាប់ពីថ្ងៃ ៨ស្អែកនេះដល់ថ្ងៃទី១២កក្កដា។ នេះបើយោងតាមទីភ្នាក់ងារព័ត៌មាន Xinhua ដែលដកស្រង់សេចក្តីីថ្លែងការណ៍ក្រសួងការពារជាតិកម្ពុជាកាលពីថ្ងៃចន្ទម្សិលមិញ។
ដំណើរទស្សនកិច្ចរបស់ នាយឧត្តមសេនីយ៍ ទៀ បាញ់ នៅក្នុងប្រទេសចិនធ្វើឡើង ក្នុងគោលបំណងពង្រឹងនិងពង្រីកចំណងមិតភាពទ្វេភាគី និងសហប្រតិបត្តិការរួមគ្នាផង។ ប្រមុខការពារជាតិកម្ពុជា នឹងជួបពិភាក្សាដាច់ដោយឡែកជាមួយសមភាគីលោក គឺរដ្ឋមន្ត្រីការពារជាតិចិនលោក Chang Wanquan និងអនុប្រធានគណកម្មការយោធាមជ្ឈិមនៃបក្សកម្មុយនីស្តចិនលោក Xu Quiliang ផងដែរ។ ក្រៅពីនេះ លោក ទៀ បាញ់ ក៍នឹងទៅទស្សនកិច្ចនៅស្ថាប័នសំខាន់ៗរបស់ក្រសួងការពារជាតិចិនផងដែរ។
សូមបញ្ជាក់ថា កម្ពុជា និងចិនជាដៃគូយុទ្ធសាស្ត្រគ្រប់ជ្រុងជ្រោយ ហើយចំណងការទូត នយោបាយ សេដ្ឋកិច្ច និងការពារជាតិមានភាពល្អប្រសើរនិងស្អិតល្មួតខ្លាំងផង។ រដ្ឋាភិបាលក្រុងប៉េកាំងឯណោះវិញក្នុងនាមជាដៃគូយុទ្ធសាស្ត្រគ្រប់ជ្រុងជ្រោយរបស់កម្ពុជា បានបន្តផ្តល់ជំនួយសេដ្ឋកិច្ចផង យោធាផងដល់កម្ពុជាឥតដាច់៕
© រក្សាសិទ្ធិដោយ thmeythmey.com